သျှမ်းပြည်တောင်ပိုင်း၊ ရွာငံမြို့နယ်တွင် စက်သုံးဆီ ပြတ်လပ်နေတာကြောင့် ဒေသခံများ စိုက်ခင်းခြံနှင့် ခရီးဝေးသွားရန်အတွက် အခက်ခဲ ဖြစ်နေကြောင်းသိရသည်။
ပြီးခဲ့သည့် ဩဂုတ်လ ၁၁ ရက်မှ စတင်ကာ ဆီဆိုင်များပိတ်ထားခြင်းကြောင့် စက်သုံးဆီဖြင့် ခြံအလုပ်လုပ်ရသော လုပ်ငန်းများကို ရပ်နားထားရပြီး စိုက်ပျိုးရေးလုပ်ငန်းများကိုပါ ရပ်နားထားရပြီး ဆီများကိုလည်း ရက်အနည်းငယ်ကြာမှ ရောင်းပေးသည့်အတွက် စက်သုံးဆီးများခက်ခဲနေကြောင်း သိရသည်။
“ ခြံမှာ တောရှင်းရတဲ့ဟာဆို စက်နဲ့မှ ပိုအဆင်ပြေတာ။ ဆီတွေပြတ်သွားတော့ ခုခြံမရှင်းရတော့ဘူး။ မြို့တက်ပြီး မျိုးစေ့တွေ သွားဝယ်မယ်ဆိုလည်း မြို့တက်မရတော့ ခက်တယ်။ အခုဆို စက်နဲ့ လုပ်ရတဲ့ အလုပ်ကို အကုန် ရပ်နားထားရတယ်။ စီးပွားရေးတွေ အကုန် နှောင့်နှေးတာပေါ့။”ဟု လက်ဖက်ခြံပိုင်ရှင် အမျိုးသားတစ်ဦးက သျှမ်းသံတော်ဆင့်ကို ပြောသည်။
ထိုသို့ စက်သုံးဆီပြတ်လပ်မှုကြောင့် ဝေးလံသည့် တောင်ပေါ် လက်ဖက်ခြံများနှင့် လိမ္မော်ခြံသို့ သွားရသည့်အခါ ခြေကျင်သွားနေရကြောင်း အဆိုပါ အမျိုးသားက ဆက်ပြောသည်။
စက်သုံးဆီ 92 တစ်လီတာကို ကျပ်ငွေ ၅၀၀၀ ပေးဝယ်နေရပြီး တခါတရံ သာဝယ်ခွင့်ရကြောင်း သိရသည်။
“ ဆီသွားဝယ်တာ တမြို့လုံးရော ရွာဖက်ဆိုင်တွေရော လိုက်ရှာတာ မရခဲ့ဘူး။တော်သေးတယ် ရှိတဲ့က လမ်းမှာမကုန်သွားတာ။ ကုန်ရင်တော့ ဆိုင်ကယ်တွန်းပြန်ရတော့မှာ။ ခုဆိုကုန်စျေးနှုန်းတွေ တက်တော့ ပိုဆိုးတာပေါ့” ဟု ဒေသခံအမျိုးသမီး တစ်ဦးက ပြောသည်။
ရွာငံမြို့နယ်ရှိ ဒေသခံများသည် စိုက်ပျိုးရေးကို အဓိကအားထားလုပ်ကိုင်နေကြရပြီး အများစုမှာ လိမ္မော်၊ လက်ဖက်နှင့် ဂေါ်ဖီထုပ် ၊မုန်ညှင်း၊ ပန်း စသည့် ရေတိုသီးနှံများကို စိုက်ပျိုးကာ အသက်မွေးဝမ်းကျောင်းပြုသည့် ဒေသဖြစ်သည်။
လက်ရှိရွာငံမြို့နယ်တွင် လျှပ်စစ်မီးပုံမှန်မရတော့သဖြင့် ဖယောင်းတိုင်းနှင့် ဆိုလာပြားကို အသုံးပြုနေရသည်။
အလုပ်သင် သတင်းထောက် နန်းလရောင် ရေးသားသည်။
Leave a Comments