သျှမ်းပြည်နယ်တောင်ပိုင်း၊ပင်လောင်းမြို့နယ် တောင်ဘက်ကျေးရွာများတွင် ပြောင်းလိုက်ဝယ်နေသူ ပြောင်းပွဲစား ၄ဦးကို ပအိုဝ်းပြည်သူ့စစ် PNO က ဖမ်းဆီးပြီး ငွေဖြင့် ပြန်လာရွေးခိုင်းကြောင်း သတင်းရရှိသည်။

ဇူလိူင်လ အတွင်းတွင် ဖမ်းဆီးခဲ့ပြီး ဖမ်းဆီးခံရသူ ပြောင်းပွဲစားမှာ နမ်းဖာမူရွာ ပွဲစား၂ဦး၊ဂျာမနီလမ်း စမ်းရေကြည်ဖက် ပွဲစား၂ဦးတို့ဖြစ်ကြောင်း သိရသည်။

“PNOက အရမ်းယုတ်မာတယ်။ အကြောင်းရင်း ဘာမှမရှိဘဲ ပွဲစားတွေကို တမင်သက်သက်ငွေလိုချင်လို့ ဖမ်းတယ်။ ဖမ်းပြီး ငွေနဲ့ သိန်း၂၀ရွေးခိုင်းတယ်။ ခုအခြေနေစဉ်းစားကြည့်လေနော် ပိုက်ဆံဒီလောက်ရှာရခက်တာ သူတို့က အလကားရတိုင်း အာချောင်လို့တိုင်း ပြည်သူကို အနိုင်ကျင့်နေတာ”ဟု ကြုံတွေ့ရသူနှင့် နီးစပ်သူအမျိုးသမီးတစ်ဦးကပြောသည်။

ယခုလိုပွဲစားများကို ဖမ်းဆီးငွေညစ်ခြင်းသည် ပင်လောင်းတောင်ဖက်တွင် လုံခြုံရေး တာဝန်ယူနေသော PNOစစ်သားများ ဖြစ်ကြောင်းသိရသည်။

“သေနတ်ကိုင်ပြီး ပြည်သူကိုအနိုင်ကျင့်နေတာ။ခုပြည်သူတွေကိုဖမ်းပြီး ငွေညစ်တာလည်း ဒီဘက်နယ်မြေလုံခြုံရေး လာယူနေတဲ့စစ်သားတွေ သေနတ်တကားကား မြောက်ကြွမြောက်ကြွနဲ့ သူတို့ဒီလိုလုပ်တာ အထက်ပိုင်းလူကြီးတွေသိရဲ့လားမသိဘူး။မဟုတ်မှ သိသိရက်နဲ့လုပ်ခွင့်ပေးထားတာလားမသိဘူး။ခုက ဉပဒေ မရှိတိုင်လို့ရတဲ့နေရာလည်းမရှိတော့ ပြည်သူတွေဘဲခံနေရတာ”ဟု ဒေသခံတစ်ဦးကပြောသည်။

ယခုလို PNOပြည်သူ့စစ် ငွေညစ်မှုများလာခြင်းကြောင်း ပိုက်ဆံရှိသူတစ်ချို့သည် အိမ်တွင်မအိပ်ရဲကြဘဲ တစ်ချို့သည် တစ်ခြားမြို့ကြီးနှင့် ပြည်ပတို့တွင်တိမ်းရှောင်ကြရကြောင်းသိရသည်။

ပင်လောင်းမြို့တောင်ဖက် ဆောင်းပြောင်း ဒေသတို့တွင် တိုက်ပွဲဖြစ်ပွားခြင်းမရှိတော့သော်လည်း PNOကရွာသားများကို ရွာထဲပြန်နေထိုင်ခြင်း ခွင့်မပြုသေးကြောင်း သိရသည်။