သျှမ်းမြောက်၊ လားရှိုး တိုက်ပွဲ ရှုံးနိမ့်ရာတွင် စစ်သတင်းများ ပေါက်ကြားသည်ဟု ဆိုကာ ဆက်သွယ်ရေးတပ် ညွှန်ကြားရေးမှူးရုံး၏ ညွှန်ကြားရေးမှူး ဗိုလ်ချုပ်ရဲမြင့်နိုင် ကို နေပြည်တော်၌ စစ်ခုံရုံးတင် စစ်ဆေးနေသည်ဟု စစ်ရေးသတင်းရင်းမြစ်က ယနေ့ (ဩဂုတ်လ ၅ ရက်) တွင် ပြောသည်။
တလကျော် ကြာမြင့်ခဲ့သည့် လားရှိုး တိုက်ပွဲ အတွင်း ဆက်သွယ်ရေးကွန်ရက် ကျိုးပေါက်မှု (စစ်သတင်းပေါက်ကြားမှု)၊ လားရှိုး ရမခ စစ်ဌာနချုပ်နှင့် နေပြည်တော် စစ်ရုံး အဆက်အသွယ် ပြတ်တောက်စေမှု တို့ဖြင့် ယမန်နေ့က ဖမ်းဆီးခံရပြီးနောက် စစ်ခုံရုံးတင် စစ်ဆေးခံနေရခြင်း ဖြစ်သည်။
“ဗိုလ်ချုပ်ရဲမြင့်နိုင် က OTS-79 ဆင်းပါ။ အဓိက က စစ်သတင်းတွေ ပေါက်ကြားတယ် ဆိုတဲ့ စွပ်စွဲချက်နဲ့ စစ်ခုံရုံးတင်ခံရတာပါ။ လက်ရှိ နေပြည်တော်ထောင်မှာ ချုပ်ထားပါတယ်” ဟု စစ်ရေးသတင်းရင်းမြစ်က ဆိုသည်။
ဗိုလ်ချုပ်ရဲမြင့်နိုင် သည် ပြင်ဦးလွင် တပ်မတော် အီလက်ထရောနစ်နှင့် ဆက်သွယ်ရေး ကျောင်းအုပ်ကြီး အဖြစ် တာဝန်ထမ်းဆောင်နေရာက ပြီးခဲ့သည့် မေလ ကုန်ပိုင်းတွင် ဆက်သွယ်ရေးတပ် ညွှန်ကြားရေးမှူး အဖြစ် ပြောင်းရွှေ့ခံရပြီး ၂ လ အကြာတွင် ယခုကဲ့သို့ စစ်ခုံရုံးတင် ခံရခြင်း ဖြစ်သည်။
ယနေ့ (သြဂုတ် ၅)ရက် မနက်ပိုင်းတွင် လားရှိုး ရမခ ကျဆုံးပြီး ထိပ်တန်း စစ်ဘက်အရာရှိကြီးများ ဖမ်းဆီးခံထားရကြောင်း စစ်တပ် ပြန်ကြားရေး ဗိုလ်ချုပ်ဇော်မင်းထွန်းက ဝန်ခံပြောဆိုထားသည်။
လားရှိုး ရမခ စစ်ဌာနချုပ် ကျဆုံးမှုနှင့် ပတ်သက်၍ မည်သူ တာဝန်ရှိသနည်းဟု စစ်တပ် ထောက်ခံသူများကြား မေးခွန်းထုတ်နေစဥ် ယခုကဲ့သို့ စစ်ဘက် ဌာနဆိုင်ရာ အကြီးအကဲ တစ်ဦး စစ်ခုံရုံးတင်ခံရခြင်း ဖြစ်သည်။
ပြီးခဲ့သည့် ဩဂုတ်လ ၃ ရက် လားရှိုး ရမခ အလုံးစုံ သိမ်းပိုက်မှုအတွင်း စစ်သည်နှင့် မိသားစု ၄၇၀၀ ကျော် အလံဖြူထောင် လက်နက်ချခဲ့ပြီး ထိပ်တန်း စစ်အရာရှိ ၃ ဦီးကို ကိုးကန့်တပ်က ဖမ်းမိထားကြောင်း သိရသည်။
ကိုးကန့်တပ် သိမ်းပိုက်ပြီးနောက် ယမန်နေ့ (သြဂုတ် ၄) ရက်နှင့် ယနေ့ (သြဂုတ် ၅)ရက်တွင် လားရှိုးမြို့တွင်း ပစ်ခတ်သံများ မကြားရတော့ကြောင်း သိရသည်။
Leave a Comments