သျှမ်းပြည် လားရှိုးမြို့ရှိ အကျဉ်းထောင်မှ စစ်ကောင်စီလက်အောက်ခံ ဝန်ထမ်းနှင့် မိသားစုများကို ‘ဝ’တပ်ဖွဲ့ UWSA မှ ကယ်ထုတ်ပြီး မိုင်းရယ်မြို့သို့ ပို့ဆောင်လိုက်ကြောင်း စုံစမ်းသိရသည်။

ယမန်နေ့ (ဇူလိုင်လ ၃၁ ရက်) နေ့လယ်ပိုင်းတွင် လားရှိုးမြို့ ရပ်ကွက်(၁၂) ရှိ လားရှိုးအကျဉ်းထောင်မှ ဝန်ထမ်းနှင့် မိသားစုဝင် (၁၂၀) ဦးခန့်ကို ‘ဝ’တပ်ဖွဲ့ UWSA မှ တိုက်ပွဲကြား ကယ်ထုတ်သွားပြီး မိုင်းရယ်မြို့သို့ ပို့ဆောင်လိုက်ကြောင်း စစ်ရေးသတင်းရင်းမြစ်က ပြောသည်။

“တိုက်ပွဲထဲ ပိတ်မိနေတဲ့ လားရှိုးထောင်က ဝန်ထမ်းနဲ့ သူတို့မိသားစုတွေကို ခေါ်ထုတ်သွားတာ။ ‘ဝ’ရဲ့ ကားတွေနဲ့ မိုင်းရယ်ဘက် ပို့လိုက်တယ်”ဟု စစ်ရေးသတင်းရင်းမြစ်က သျှမ်းသံတော်ဆင့်ကို ပြောသည်။

‘ဝ’တပ်ဖွဲ့ UWSA မှ လားရှိုးအကျဉ်းထောင် ဝန်ထမ်းနှင့် မိသားစုများကို တိုက်ပွဲကြား ကယ်ထုတ်ကာ မိုင်းရယ်သို့ ပို့ဆောင်လိုက်သည့် ကိစ္စနှင့် ပတ်သက်ပြီး ‘ဝ’ပြင်ပဆက်ဆံရေးတာဝန်ခံ ဦးညီရမ်းထံ သျှမ်းသံတော်ဆင့်မှ စာပို့မေးမြန်းခဲ့ရာ အထက်သို့ ထပ်မံမေးမြန်းဦးမည်ဟုသာ ပြန်လည်ဖြေကြားခဲ့သည်။

လားရှိုးအကျဉ်းထောင်တွင် တိုက်ပွဲကြား ပိတ်မိနေသည့် ထောင်ဝန်ထမ်းနှင့် မိသားစုဝင် (၁၂၀) ဦးခန့်ကို ‘ဝ’တပ်ဖွဲ့ UWSA မှ ကယ်ထုတ်ပြီး မိုင်းရယ်ဘက်သို့ ပို့ဆောင်ပေးလိုက်ကြောင်း ပြောဆိုနေကြသော်လည်း သျှမ်းသံတော်ဆင့်မှ ဒေသခံများထံ သီးခြားအတည်ပြုနိုင်ရန် ဆက်လက်စုံစမ်းနေသည်။

ပြီးခဲ့သည့် ဇူလိုင်လ ၂၈ ရက် နံနက်ပိုင်းတွင် လားရှိုးမြို့ ရပ်ကွက်ကြီး (၁၂) ရှိ လားရှိုးအကျဉ်းထောင်သို့ လက်နက်ကြီး ကျရောက်ပေါက်ကွဲမှုများ ရှိခဲ့သဖြင့် ထောင်တွင် ကျန်ရှိခဲ့သည့် အရာရှိငယ်များမှ ဖွင့်ပေးလိုက်၍ အကျဉ်းကျခံနေသူ အားလုံး လွတ်မြောက်သွားကြောင်း ထောင်နှင့်နီးစပ်သည့် သတင်းရင်းမြစ်က ပြောဆိုသည်။

လားရှိုးအကျဉ်းထောင်မှ လွတ်မြောက်လာသည့် ပြည်သူ့လွှတ်တော် ဉက္ကဋ္ဌ ဦးထွန်းထွန်းဟိန်နှင့် နိုင်ငံရေးအကျဉ်းသား ၂၀၀ ကျော်ကို လားရှိုးပြည်သူ့ကာကွယ်ရေးတပ်ဖွဲ့နှင့် တော်လှန်ရေးအင်အားစုများက စောင့်ရှောက်ထားကြောင်း NUG ၏ ကာကွယ်ရေးဝန်ကြီးဌာန ပြောရေးဆိုခွင့်ရှိသူ ဦးမောင်မောင်ဆွေ၏ လူမှုကွန်ယက်စာမျက်နှာတွင် ရေးသားထားသည်။

ပြီးခဲ့သည့် ဇူလိုင်လ ၂၇ ရက် ညပိုင်းမှ စတင်ပြီး အရှေ့မြောက်တိုင်း စစ်ဌာနချုပ် ရမခ အခြေစိုက်ရာ လားရှိုးမြို့ရှိ ‘ဝ’ပြင်ပဆက်ဆံရေးရုံးနှင့် ပိုင်ဆိုင်မှုများကို ကာကွယ်ရန်ဟုဆိုကာ ‘ဝ’တပ်ဖွဲ့ UWSA ၏ မိုင်းမောမြို့ဘက်မှလာသည့် တပ်မ (၃၁၈) လုံခြုံရေးတပ်ဖွဲ့ဝင်များသည် လားရှိုးမြို့နယ် မိုင်းကျက်၊ မိုင်းယော်ဘက်မှတဆင့် မြို့ပေါ်ဝင်ရောက်တပ်စွဲခဲ့ကြောင်း စစ်ရေးသတင်းရင်းမြစ်က ပြောသည်။