သျှမ်းပြည် ပင်လောင်းမြို့တွင် ၂ ပတ်ကျော်ကြာ မိုးအဆက်မပြတ် ရွာသွန်းမှုကြောင့် မကြုံစဖူး ရေကြီး၊ ရေလျှံမှု ကြုံတွေ့နေရကြောင်း သတင်းရရှိသည်။

ပင်လောင်းမြို့နယ်အတွင်း နှစ်ပတ်ကျော်ကြာ မိုးအဆက်မပြတ် ရွာသွန်းလာပြီး ဇူလိုင် ၃၀ ရက်မှ စတင်ကာ မထင်မှတ်ထားသည့် တောင်ကျရေကြောင့် မင်္ဂလာရပ်ကွက်၊ စျေးတန်းရပ်ကွက်၊ အနောက်ရပ်ကွက်ရှိ နေအိမ်များထဲသို့ တောင်ကျရေများ ဝင်ရောက်လာကြောင်း ပင်လောင်းမြို့ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“မိုးကတော့ ရွာနေတာ ၁၅ ရက်လောက် ရှိတယ်။ ရေစဝင်တာတော့ ဇူလိုင် ၃၀ရက်ပေါ့၊ မြေနိမ့်ပိုင်းနေတဲ့အိမ် တိုက်ပုတွေဆိုရင် ရေတွေ ခါးလောက်ထိ ရှိတယ်။ ဒီလို တခါမှမကြုံဖူးဘူး” ဟု ပင်လောင်းမြို့ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ပင်လောင်းမြို့သည် တောင်တန်းနှစ်ခု ဝန်းရံထားသည့် မြို့ဖြစ်ပြီး၊ ထိုတောင်တန်းများတွင် သစ်တောပြုန်းတီးမှုကြောင့် ယခုကဲ့သို့ ရေကြီးရေလျှံခြင်း ဖြစ်ကြောင်းလည်း ဒေသခံများက သုံးသပ်ပြောကြားသည်။

ပင်လောင်းမြို့သည် အဓိကအားဖြင့် စိုက်ပျိုးရေး လုပ်ကိုင်သည့် ဒေသဖြစ်သည့်အတွက် လက်ရှိမှာ ပင်လောင်မြို့နယ် အတွင်းရှိ ပင်လောင်းကြီးရွာ၊ နမ့်ပန်ရွာတို့တွင် စပါးခင်းများ၊ ခရမ်းချဉ်သီးခင်းများ၊ ငရုပ်ခင်းများ ရေလွှမ်းမိုးနေကြောင်း သိရသည်။

“ခရမ်းချဉ်သီးတွေ အပင်တွေက အခုမှ စပွင့်တာလေ။ မိုးရွာတော့ အခုက ခရမ်းချဉ်သီးပင်တွေနဲ့ ငရုတ်သီးတွေက ရေတွေ မြုပ်ကုန်တယ်။ မြုပ်သွားတဲ့ ခရမ်းချဉ်သီး အပင်တွေကတော့ ရေတွေဝင်ပြီး ၃ ရက်လောက် ကြာရင်တော့ မကောင်းတော့ဘူး။ ရေထဲမှာလည်း အမှိုက်တွေကလည်း ပါနေတယ်။ ပြန်တော့ ကောင်းမယ်မထင်ဘူး” ဟု ခရမ်းချဉ်သီး စိုက်ပျိုးသူ အမျိုးသားတစ်ဦးက ပြောသည်။

ထိုရေကြီးမှုကြောင့် ယမန်နေ့ (ဇူလိုင် ၃၁ ရက်) ညနေ ၆နာရီဝန်းကျင်မှ စပြီး ဆွေမျိုးအိမ်များနှင့် နီးစပ်ရာ ရေဘေးကင်းလွတ်သည့် နေအိမ်များသို့ ပြောင်းရွှေ့နေထိုင်ကြကြောင်း သိရသည်။

“ကျနော်တို့ က ဆွေမျိုးအိမ်ပြောင်းနေရတယ်။ အဲ့အိမ်မှာပဲ ထမင်းစားနေရတာ။ ရေကြီးတဲ့အိမ်ကိုတော့ သော့ခတ်ပြီး ဒီတိုင်းထားထားတယ်”ဟု နေအိမ်ရေလွှမ်းမိုးခံရသည့် ဒေသခံတစ်ဦးက သျှမ်းသံတော်ဆင့်ကို ပြောသည်။

လက်ရှိတွင်လည်း ပင်လောင်းမြို့နယ်တွင် မိုးသည်းထန်စွာ ရွာသွန်းမှုကြောင့် ရေများ ဆက်တိုက်တက်လာမည်ကို စိုးရိမ်နေရကြောင်း ဒေသခံများက ပြောသည်။