သျှမ်းပြည်၊ တန့်ယန်းမြို့မှ လားရှိုးမြို့သို့ အင်အားဖြည့်တင်းမည့် စစ်ကောင်စီယာဉ်တန်းကို ကိုးကန့်တပ်ဖွဲ့ MNDAA က ကြားဖြတ်တိုက်ခိုက်ရာ ဦးဆောင်သူ ဗိုလ်မှူးချုပ် သန်းထွန်းအောင် ဒဏ်ရာအပြင်းအထန် ရရှိသဖြင့် အရှေ့အလယ်ပိုင်းတိုင်း စစ်ဌာနချုပ်-ရလခ ခိုလမ် စစ်ဆေးရုံတွင် ဆေးကုသနေရကြောင်း စစ်ရေးသတင်းရင်းမြစ်က ယနေ့ (ဇူလိုင်လ ၃၁ ရက်) တွင် ပြောသည်။
ယမန်နေ့ (ဇူလိုင်လ ၃၀ ရက်) နံနက် ၃ နာရီခန့် တန့်ယန်းမြို့မှ လားရှိုးမြို့နယ် နမ့်ပေါင်ဘက်သို့ စစ်ကား (၈) စီး အင်အား (၄၀၀) ခန့်ဖြင့် ချီတက်လာသည့် စစ်ယာဉ်တန်းကို ကိုးကန့်တပ်ဖွဲ့ MNDAA နှင့် BPLA ပူးပေါင်းတပ်တို့က လားရှိုးမြို့နယ် မန်ပန်နှင့် ဟိုနားကျေးရွာအနီး ကြားဖြတ်တိုက်ခိုက်ရာ စစ်ကောင်စီတပ်သား ထိခိုက် သေဆုံးမှုများကြောင်း စစ်ရေးသတင်းရင်းမြစ်က ပြောသည်။
“ရလခ တိုင်းစစ်ဦးစီးချုပ် ဗိုလ်မှူးချုပ်သန်းထွန်းအောင် ဒဏ်ရာပြင်းထန်လို့ အခု ခိုလမ် စစ်ဆေးရုံမှာပါတယ်။ သေတယ်ဆိုတာတော့ မဟုတ်ပါဘူး။ သူက NLD အစိုးရလက်ထက်က စစ်ကိုင်းတိုင်း နယ်လုံ ဝန်ကြီးပါ။ တေဇ (၂၂) ဆင်းပါ” ဟု စစ်ရေးသတင်းရင်းမြစ်က ပြောသည်။
၎င်းကို ခိုလမ်သို့ သယ်ဆောင်ရန် စစ်ကောင်စီတပ်က နယ်မြေခံ သျှမ်းတော်လှန်ရေးတပ်ကို လမ်းကြောင်း တောင်းခံခဲ့ရကြောင်း ၄င်းကဆက်ပြောသည်။
အဆိုပါ စစ်အင်အား (၄၀၀) ခန့်ပါ စစ်ကားကြီး (၈) စီးကို ကြားဖြတ် တိုက်ခိုက်ရာ တစ်နေကုန် တိုက်ပွဲ ပြင်းထန်ပြီး စစ်ကောင်စီတပ်သား ၅၀ ကျော် သေဆုံးကာ ၈၀ ကျော် ဒဏ်ရာရခဲ့ကြောင်း ဒေသခံ စစ်ရေးသတင်းရင်းမြစ်က သျှမ်းသံတော်ဆင့်ကို ပြောဆိုထားသည်။
အလားတူ ဇူလိုင်လ ၂၉ ရက်ကလည်း စစ်ကားကြီးများဖြင့် စစ်ကောင်စီတပ် အင်အား (၁၀၀၀) ခန့် မိုင်းကိုင်မြို့မှ တန့်ယန်းမြို့သို့ ဦးတည် ချီတက်နေကြောင်း စစ်ရေးသတင်းရင်းမြစ်က ဆိုသည်။
ဇူလိုင်လ ၂၇ ရက် ညပိုင်းမှ စတင်ပြီး အရှေ့မြောက်တိုင်း စစ်ဌာနချုပ် ရမခ အခြေစိုက်ရာ လားရှိုးမြို့ရှိ ‘ဝ’ပြင်ပဆက်ဆံရေးရုံးနှင့် ပိုင်ဆိုင်မှုများကို ကာကွယ်ရန်ဟုဆိုကာ ‘ဝ’တပ်ဖွဲ့များ လားရှိုးမြို့ပေါ် ဝင်ရောက် တပ်စွဲခဲ့ပြီးနောက် စစ်ကောင်စီတပ် ထပ်မံအင်အားဖြည့်တင်းလာခြင်း ဖြစ်သည်။
တိုက်ပြွများပြင်းထန်နေသည့် လားရှိုးတွင် စစ်မြေပြင်တွင် ကြီးကြပ် ကွက်ကဲနေသည့် ရမခ ဒုစစ်တိုင်းမှူး ဗိုလ်မှူးချုပ် တင်ထွန်းအောင် ဒဏ်ရာပြင်းထန် သဖြင့် ပြင်ဦးလွင် စစ်ဆေးရုံ၌ ဆေးကုသမှု ခံယူနေရာက ဇူလိုင်လ ၂၈ ရက်နေ့တွင် သေဆုံးသွားကြောင်း သိရသည်
Leave a Comments