သျှမ်းပြည် မိုးဗြဲမြို့နယ်ရှိ မိုးဗြဲရေကာတာကို စစ်ကောင်စီတပ်မှ ဖွင့်ချလိုက်ခြင်းကြောင့် ကျေးရွာ ၃ ရွာထက်မနည်း ရေနစ်မြှုပ်ပြီး ဒေသခံတစ်ထောင်ကျော် ရေဘေးသင့် ထွက်ပြေးတိမ်းရှောင် နေရကြောင်း စုံစမ်းသိရသည်။
ပြီးခဲ့သည့် ဇူလိုင်လ ၂၅ ရက်မှ စတင်၍ မိုးဗြဲမြို့တွင် အခြေစိုက်သည့် စစ်ကောင်စီတပ် ခြေမြန်တပ်ရင်း ခမရ – (၄၂၂) သည် မိုးဗြဲရေကာတာကို အဆင်အခြင်မဲ့ ဖွင့်ချလိုက်သဖြင့် ဘီလူးချောင်းဘေးတွင် တည်ရှိသော မိုးဗြဲမြို့ပေါ် ၄ ရပ်ကွက်၊ မိုးဗြဲအင်း၊ ဖာလိုင်အင်း၊ ဖောင်းတောအင်း၊ ဘုရားဖြူရွာနှင့် ဘုရားနီရွာတို့ ရေနစ်မြှုပ်ခဲ့ကြောင်း မိုးဗြဲစစ်ဘေးရှောင်ကော်မတီ တာဝန်ရှိသူတစ်ဦးက သျှမ်းသံတော်ဆင့်ကိုပြောသည်။
“ရေမြှုပ်တာက မိုးဗြဲနယ်မှာ မိုးဗြဲအင်း၊ ဖာလိုင်အင်းနဲ့ မိုးဗြဲမြို့ပေါ်မှာက ၄ ရပ်ကွက်ပါ၊ အဲ့ ရပ်ကွက်တွေလည်း ရေဘေးသင့်နေကြရပါတယ်။ ရေမြှုပ်သွားတဲ့ အခြားရွာတွေက ကရင်နီဘက်က အများစုပါ”ဟု မိုးဗြဲစစ်ဘေးရှောင်ကော်မတီ တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။
ရေကြီးမှုကြောင့် ရပ်ကွက်၊ ကျေးရွာများနှင့် စပါးစိုက်ဧက ၃၀၀၀ ကျော် ရေနစ်မြှုပ်သွားပြီး ဒေသခံ တစ်ထောင်ကျော်လည်း ရေဘေးသင့်ကာ နီးစပ်ရာမြို့ရွာရှိ ဆွေမျိုးများဆီသို့ ထွက်ပြေးတိမ်းရှောင်နေကြောင်း ၎င်းမိုးဗြဲစစ်ဘေးရှောင်ကော်မတီ တာဝန်ရှိသူက ဆက်ပြောသည်။
“နီးစပ်ရာ ရွာနဲ့ဆွေမျိုးဆီမှာပဲ ထွက်ပြေးနေကြရတာ။ အုပ်စုလိုက် သွားကြတာမျိုး မဟုတ်ပါဘူး။ တကွဲတပြား တစ်နေရာစီကို ထွက်သွားကြရတာပါ။ အခက်အခဲတွေတော့ ရှိကြတာပေါ့။ ရေတက်လာတော့ စားစရာ၊ ဝတ်စရာ၊ နေစရာတွေ အကုန်လုံးယူသွားလို့ မရကြတော့ ခက်ခဲနေကြပါတယ်”ဟု မိုးဗြဲစစ်ဘေးရှောင်ကော်မတီ တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။
လက်ရှိ ထွက်ပြေးတိမ်းရှောင်နေရသည် ရေဘေးသင့် ဒေသခံတစ်ထောင်ကျော်အတွက် ချိတ်ဆက်ကူညီပေးနေသည့် အဖွဲ့အစည်းများ မရှိသည့်အပြင် အခက်အခဲများလည်း ကြုံတွေ့နေရကြောင်း သိရသည်။
မိုးဗြဲမြို့တွင် အခြေစိုက်နေသည့် စစ်ကောင်စီတပ် ခြေမြန်တပ်ရင်း-(ခမရ ၄၂၂) သည် လက်ရှိအချိန်ထိ မိုးဗြဲရေကာတာကို ဆက်လက်ဖွင့်ထားကြောင်း ဒေသခံများက ပြောဆိုသည်။
ဇူလိုင်လ ၂၅ ရက်မှ စတင်၍ ၃ ရက်အတွင်း ရေများ ထပ်မံမြင့်တက်လာနိုင်ပြီး လွိုင်ကော်မြို့နှင့် အနီးတဝိုက်ရှိ လူနေရပ်ကွက်များနှင့် ကျေးရွာများတွင်လည်း ရေကြီးရေလျှံမှု အရေးပေါ် အခြေအနေ ရှိလာနိုင်ကြောင်း ကရင်နီပြည် ကြားကာလအုပ်ချုပ်ရေးကောင်စီ IEC က သတိပေးထားသည်။
ကရင်နီတော်လှန်ရေးပူးပေါင်းတပ်ဖွဲ့သည် “၁၁၁၁ စစ်ဆင်ရေး”တွင် မိုးဗြဲမြို့ကို ထိန်းချုပ်ထားနိုင်သော်လည်း မိုးဗြဲရေကာတာအနီးရှိ စစ်ကောင်စီ၏ ခြေမြန်တပ်ရင်း ခမရ-၄၂၂ ကို သိမ်းပိုက်နိုင်ခြင်း မရှိသေးကြောင်း သိရသည်။
Leave a Comments