သျှမ်းပြည် အရှေ့မြောက်တိုင်း စစ်ဌာနချုပ် ရမခ အခြေစိုက်ရာ လားရှိုးမြို့ပေါ်ရှိ ‘ဝ’ ပြင်ပဆက်ဆံရေးရုံးနှင့် ပိုင်ဆိုင်မှုကို ကာကွယ်ရန် အတွက် UWSA မှ ဝင်ရောက်နေရာယူ တပ်စွဲထားကြောင်း စုံစမ်းသိရသည်။

စစ်ကောင်စီတပ်နှင့် ကိုးကန့်တပ်ဖွဲ့ MNDAA တို့ တိုက်ပွဲပြင်းထန်နေသည့် လားရှိုးမြို့ပေါ်သို့ ယမန်နေ့ (ဇူလိုင်လ ၂၇ ရက်) ညပိုင်းမှ စတင်ပြီး ‘ဝ’တပ်ဖွဲ့ UWSA မှ လုံခြုံရေးတပ်ဖွဲ့ဝင်များ ဝင်ရောက်တပ်စွဲခဲ့သည်မှာ မှန်ကန်ကြောင်း ‘ဝ’ ပြင်ပဆက်ဆံရေးတာဝန်ခံ ဦးညီရမ်းက သျှမ်းသံတော်ဆင့်ကို အတည်ပြုသည်။

“လားရှိုးမြို့နယ်ရှိ ကျနော်တို့ ပြင်ပဆက်ဆံရေးရုံးများနှင့် ပိုင်ဆိုင်မှုများကို ကာကွယ်ရန်အတွက် ‘ဝ’လုံခြုံရေး တပ်ဖွဲ့ဝင်များကို ၂၇ရက်နေ့ညက လားရှိုးမြို့သို့ တရားဝင် ဝင်ရောက်ခဲ့တာ မှန်ပါတယ်။ မြို့သို့ မဝင်မီတွင် တိုက်ပွဲဖြစ်ပွားနေတဲ့ အဖက်ဖက်တို့ကို အကြောင်းကြားခဲ့ပြီး ၎င်းတို့၏ သဘောတူညီချက်နှင့် အဆင်ပြေစွာ ဝင်ရောက်ခဲ့တာ ဖြစ်တယ်”ဟု ‘ဝ’ ပြင်ပဆက်ဆံရေး တာဝန်ခံ ဦးညီရမ်းက သျှမ်းသံတော်ဆင့်ကို ဖြေကြားသည်။

လားရှိုးမြို့ရှိ ‘ဝ’တပ်ဖွဲ့ UWSA ၏ ပြင်ပဆက်ဆံရေးရုံးနှင့် ပိုင်ဆိုင်မှုများကို ကာကွယ်ရန်အတွက် မြို့ထဲသို့ မဝင်ရောက်ခင်ကတည်းက တိုက်ပွဲဖြစ်ပွားနေသည့် အဖက်ဖက်တို့ကို အကြောင်းကြားခဲ့ပြီး ၎င်းအဖွဲ့များ၏ သဘောတူညီချက်နှင့် ဝင်ရောက်ခဲ့ခြင်းဖြစ်ကြောင်း ၎င်းက ပြောသည်။

‘ဝ’တပ်ဖွဲ့ UWSA ၏ ပြင်ပဆက်ဆံရေးရုံးသည် လားရှိုးမြို့ ရပ်ကွက်(၁) ပါရမီလမ်းအတွင်း တည်ရှိပြီး ပြည်နယ်ရဲစခန်း၊ လားရှိုးတက္ကသိုလ်တို့နှင့် နီးကပ်လျက် ရှိသည်။

လားရှိုးမြို့သို့ ဝင်ရောက်လာသည့် ‘ဝ’တပ်ဖွဲ့ UWSA အနေဖြင့် မြို့ပေါ် မည်သည့်နေရာများတွင် တပ်စွဲနေရာယူထားကြောင်း မသိရှိရသေးဘဲ သျှမ်းသံတော်ဆင့်မှ ဒေသခံများထံ ဆက်လက်စုံစမ်းနေသည်။

“လားရှိုးမြို့တွင် တပ်စွဲထားတဲ့ကျနော်တို့ ‘ဝ’လုံခြုံရေးတပ်ဖွဲ့ဝင်များ အနေဖြင့် တိုက်ပွဲဖြစ်ပွားနေတဲ့ အဖက်ဖက်တို့ကို ဝင်ရောက်စွက်ဖက်ခြင်း၊ ပူးပေါင်းခြင်းနဲ့ ပံ့ပိုးပေးခြင်းများ လုပ်ဆောင်မှာ မဟုတ်ပါ။ လားရှိုးမြို့နှင့် တစ်နိုင်ငံလုံး ငြိမ်းချမ်း‌‌‌ရေး အမြန်ဆုံးရဖို့ကို မျှော်လင့်ပါတယ်”ဟု ‘ဝ’ ပြင်ပဆက်ဆံရေး တာဝန်ခံ ဦးညီရမ်းက သျှမ်းသံတော်ဆင့်ကို ဆက်ပြောသည်။

ကိုးကန့်တပ်ဖွဲ့ MNDAA က လားရှိုးမြို့အုပ်ချုပ်ရေးကို လွှဲပြောင်းရယူလိုက်ကြောင်း ဇူလိုင်လ ၂၅ ရက်နေ့တွင် ကြေညာခဲ့ပြီးနောက် ‘ဝ’တပ်ဖွဲ့ UWSA က တိုက်ပွဲဖြစ်ပွားနေသည့် အဘက်ဘက်နှင့် ညှိနှိုင်းကာ လားရှိုးမြို့ပေါ် ဝင်ရောက်တပ်စွဲလာခြင်းဖြစ်သည်။

အလားတူ ဇူလိုင်လ ၁၀ ရက်မှ စတင်ပြီး တန့်ယန်းမြို့နယ်ထဲသို့ ‘ဝ’တပ်ဖွဲ့ UWSA မှ တပ်အင်အား ၂၀၀၀ ကျော်ဖြင့် သံလွင်မြစ်အနောက်ဘက်သို့ ကမ်းကူး၍ အင်အားဖြည့်တင်းလာခဲ့ပြီး အချို့မှာ တိုက်ပွဲပြင်းထန်နေသည့် လားရှိုးမြို့သို့ ဆက်လက်ချီတက်သွားကြောင်း ဒေသခံများထံမှ သိရသည်။

လက်ရှိတွင် လားရှိုးမြို့ကို အလုံးစုံ ထိန်းချုပ်ထားပြီဟု ကိုးကန့်တပ်ဖွဲ့က ကြေညာထားသော်လည်း လားရှိုး ရမခ စစ်တိုင်းဌာနချုပ်၊ AT ဝန်တင်တပ်ရပ်း၊ အမှတ် (၆၀၀၇) တင့်ကားတပ်၊ အမှတ် (၇) အဆင့်မြင့် ဆက်သွယ်ရေးတပ်၊ လျှပ်စစ်နှင့် အင်ဂျင်နီယာတပ်၊ အမှတ် (၃၄၆) အမြောက်တပ်၊ အမှတ် (၆၂၆) ထောက်ပို့တပ်၊ လားရှိုးလေတပ်ဆွယ်တို့ ကျန်ရှိနေသေးသဖြင့် တိုက်ပွဲများ ဆက်လက် ပြင်းထန်နိုင်ကြောင်း သိရသည်။

‘ဝ’ တပ်ဖွဲ့ UWSA အနေဖြင့် တန့်ယန်းမြို့သို့ ဦးစွာ ဝင်ရောက်တပ်စွဲပြီးနောက် ယခုအခါ လားရှိုးမြို့ပေါ်သို့ ထပ်မံဝင်ရောက်လာခြင်းသည် သျှမ်းပြည်မြောက်ပိုင်းတွင် ဖြစ်ပွားနေသည့် ညီနောင်မဟာမိတ်များ၏ စစ်ဆင်ရေးအတွင်း ဒုတိယအကြိမ် ပါဝင်ပတ်သက်လာခြင်းဖြစ်သည်။

ထို့အပြင် စစ်ကောင်စီနှင့် လက်ရှိတိုက်ပွဲဖြစ်ပွားနေသည့် ညီနောင်မဟာမိတ် (၃) ဖွဲ့တို့အပြင် ကချင်လွတ်လပ်ရေးတပ် KIA ၊ သျှမ်းတပ် SSPP/SSA နှင့် မိုင်းလားတပ်ဖွဲ့ NDAA တို့ ပါဝင်သည့် ပြည်ထောင်စုနိုင်ငံရေး ဆွေးနွေးမှုညှိနှိုင်းရေး ကော်မတီ FPNCC တွင် ‘ဝ’ တပ်ဖွဲ့ UWSA က ဉက္ကဋ္ဌ တာဝန်ယူထားသည်။