သျှမ်းပြည် မိုင်းရယ်မြို့နယ်ရှိ ကိုးကန့်တပ်ဖွဲ့ (MNDAA) စစ်ဆေးရေးဂိတ်တွင် လားရှိုးမြို့မှ စစ်ဘေးတိမ်းရှောင် လာသော စစ်ဘေးရှောင်များကို စစ်ဆေးဖမ်းဆီးမှုများပြုလုပ်နေကြောင်း စုံစမ်းသိရသည်။

သျှမ်းပြည်မြောက်ပိုင်း လားရှိုးမြို့နယ်အတွင်း စစ်ကောင်စီနှင့် ကိုးကန့်တပ်ဖွဲ့ (MNDAA) တို့ တိုက်ပွဲဖြစ်ပွားမှုကြောင့် ထွက်ပြေးတိမ်းရှောင်လာသော ဒေသခံများကို မိုင်းရယ်မြို့နယ် ဟိုယ နှင့် တန့်ယန်းလမ်းခွဲရှိ ကိုးကန့် တပ်ဖွဲ့ MNDAA စစ်ဆေးရေးဂိတ်တွင် စစ်ဆေးမှုများပြုလုပ်နေကြောင်း ကိုယ်တိုင်ကြုံတွေ့ရသည့် စစ်ဘေးရှောင်များက သျှမ်းသံတော်ဆင့်ကိုပြောသည်။

ဇူလိုင်လ ဒုတိယပတ်မှ စတင်ပြီး ယနေ့ (ဇူလိုင် ၂၇)ရက်ထိ ဟိုယ နှင့် တန့်ယန်းလမ်းခွဲရှိ MNDAA စစ်ဆေးရေးဂိတ်တွင် နိုင်ငံသားမှတ်ပုံတင်နှင့် ဖုန်းများကို စစ်ဆေးကာ ဖမ်းဆီးမှုများရှိနေကြောင်း အသက် ၄၀ ဝန်းကျင် ကိုယ်တိုင်ကြုံတွေ့ခဲ့သည့် စစ်ရှောင်အမျိုးသားတစ်ဦးက ပြောသည်။

“သူတို့တွေက မှတ်ပုံတင်စစ်တယ် ဖုန်းတွေစစ်တယ်ပြီးတော့ ဖမ်းတယ်။ သူတို့ဖုန်းစစ်လို့ ဌာနဆိုင်ရာတွေ၊ ရုံးပိုင်းတွေ ၊စစ်ကောင်စီပုံတွေ မသင်္ကာတဲ့အချက်အလက်တွေတွေ့ရင် အဝတ်အိတ်တွေကိုပါစစ်တော့တာ။ဖမ်းပြီးတော့ ဒေသခံအိမ်တွေမှာ ကြိုးနဲ့ချီထားတယ်။ပြီးရင် သူတို့ဘယ်လိုခေါ်သွားလည်းဆိုတာမသိရဘူး။”ဟု ၎င်းအမျိုးသားက ဆိုသည်။

ထို ကိုးကန့် တပ်ဖွဲ့ MNDAA စစ်းရေးဂိတ်သည် မိုင်ရယ်မြို့နှင့် ၅မိုင် ခန့်သာကွာဝေးကြောင်းသိရသည်။

လားရှိုးမြို့နယ်ရှိ ဒေသခံများထောင်နှင့် ချီထွက်ပြေးတိမ်ရှောင်နေရသည့်အတွက် ထို MNDAA စစ်ဆေးရေးဂိတ်တွင် နေ့စဉ် ကားများ ရာနှင့်ချီပိတ်မိနေကြောင်း သိရသည်။

ပြီးခဲ့သည့် (ဇူလိုင် ၂၂) ရက် တွင် စစ်ကောင်စီသည် မိုင်းရယ်မြို့နယ် ဟိုတိကျေးရွာအတွင်း MNDAA တပ် ရှိသည် ဆိုသော သတင်းကြောင့် လက်နက်ကြီးဖြင့် လှမ်းပစ်ခဲ့ပြီး လက်နက်ကြီးသံကြောင့် အသက် ၂၀ နှစ် အရွယ်ရှိ စိုင်းလင်းတို့မိသားစု ၃ဦးသည် ထိတ်လန့်ကာ ရွာတွင်းသို့ ပြေးဝင်လာစဉ် MNDAA စစ်ဆေးရေးဂိတ်တွင် ပစ်သတ်ခံလိုက်ရကြောင်း သိရသည်။

လက်ရှိ မိုင်းရယ်မြို့နယ်တွင် ကိုးကန့်တပ်ဖွဲ့ MNDAA၊ ရှမ်းပြည်တိုးတက်ရေးပါတီ/ ရှမ်းပြည်တပ်မတော် SSPP/SSA နှင့် စစ်ကောင်စီတို့သွားလာလှုပ်ရှားနေကြောင်း သိရသည်