သျှမ်းပြည် အရှေ့ပိုင်း မိုင်းပျဉ်းတောင်တွင် မိုးရွာသွန်းမှုကြောင့် တောင်များပြိုပြီး လမ်းပျက်စီးသဖြင့် တစ်လကျော်ကြာ တွဲကားကြီးများနှင့် ယာဉ်ငယ်များ ရာနှင့်ချီ နေ့စဉ်ပိတ်မိနေကြောင်း စုံစမ်းသိရသည်။

ဇွန်လဆန်းမှ စတင်ပြီး ယခုဇူလိုင်လ တတိယပတ်အထိ ကျိုင်းတုံမြို့သို့ သွားသည့် ပြည်ထောင်စု လမ်းပိုင်းရှိ မိုင်းပျဉ်းတောင်တွင် မိုးရွာသွန်းမှုကြောင့် တောင်ပြိုပြီး လမ်းချော်မှု ဖြစ်ပွားနေသဖြင့် တွဲကားကြီးများနှင့် ယာဉ်ငယ်များ အစီးရေ ရာနှင့်ချီ နေ့စဉ်ပိတ်မိနေကြောင်း တောင်ကြီး-ကျိုင်းတုံ ခရီးစဉ် ပြေးဆွဲနေသည့် ကားသမားများက ပြောသည်။

“ကားတွေ များတာရယ်၊ ကားကျပ်တာရယ်၊ လမ်းမကောင်းလို့ ကားနှစ်စီးဆိုရင် တစ်စီးနဲ့တစ်စီး ရှောင်လို့ တောင်မရဘူး။ ၁၂ ဘီးကားကြီးနဲ့ ကုန်တင်ကားတွေ များတယ်။ သွားနေတဲ့လမ်းက ပုံမှန်မရှိဘူး၊ တခါတလေလည်း နှစ်ည ၊ သုံးညလောက် အိပ်ရတယ်။ ဒီလိုကားတွေပိတ်ပြီး လမ်းတွေ သွားလာရ ခက်နေတာ တစ်လကျော် ကြာနေပြီ”ဟု အသက် ၂၅ ဝန်းကျင် ယာဉ်မောင်း အမျိုးသားတစ်ဦးက သျှမ်းသံတော်ဆင့်ကို ပြောသည်။

အလားတူ ကာလိမြို့နှင့် မိုင်းပြင်းမြို့အကြားရှိ သံလွင်မြစ်ကူး တာကော်တံတားတွင်လည်း ကုန်တင်တွဲကားကြီးများ ပိတ်ဆို့မှု ဖြစ်ပွားနေပြီး မိုင်းပျဉ်းတောင် အတက်နှင့် တောင်ပေါ်တွင်လည်း ကုန်တင်ကားကြီးနှင့် ယာဉ်ငယ်များ ညအိပ်စောင့်ဆိုင်းခဲ့ရကြောင်း ခရီးသည် အမျိုးသမီးတစ်ဦးက ဆက်ပြောသည်။

“နမ့်လန်ကနေ လာတုန်းကတော့ နှစ်ည အိပ်ခဲ့ရတယ်။ ပြီးရင် နောက်တစ်ရက်မှ တောင်ပေါ်တက်တာ၊ တောင်ပေါ်တက်တော့လည်း ကားကြီးတွေအများကြီး ပိတ်မိနေတော့ ‌ရှေ့ဆက်လည်းမရတာနဲ့ ကားပေါ်မှာ အကုန်လုံး ဖြစ်သလို အိပ်ခဲ့ရတယ်။ အစားအသောက်က ရွာကလူတွေ လာရောင်းပေးလို့ တော်သေးတယ်။ ထမင်းတစ်ဗူးကို ၅ ထောင် ပေးခဲ့ရတယ်”ဟု ခရီးသည် အမျိုးသမီးတစ်ဦးက သျှမ်းသံတော်ဆင့်ကို ပြောသည်။

မိုင်းပြင်းမြို့နှင့် မိုင်းပျဉ်းတောင်ကြား ကားများ သွားလာရန် သက်ဆိုင်ရာ တာဝန်ရှိသူများမှ အချိန်အကန့်အသတ်ဖြင့် သွားလာနိုင်ရန် ပြုလုပ်ပေးနေသော်လည်း ကုန်တင်တွဲကားကြီးနှင့် ကားငယ်များ ရာနှင့်ချီ ရှိနေသောကြောင့် သွားလာရန် ခက်ခဲနေကြောင်း သိရသည်။

လက်ရှိတွင် ကားကြီးများကြောင့် လမ်းများ ပျက်စီးခြင်း၊ ကားကြီးများ ပိတ်ဆို့၍ သွားလာရန် ခက်ခဲခြင်းများကြောင့် ခရီးသွားယာဉ်ငယ်အချို့နှင့် ကုန်တင်ယာဉ်များကို ရပ်နားထားရကြောင်း ကားသမားများက ပြောသည်။

သျှမ်းပြည်မြောက်ပိုင်းတွင် “၁၀၂၇ စစ်ဆင်ရေး” နောက်ပိုင်း စစ်ကောင်စီနှင့် ညီနောင်မဟာမိတ်တို့ တိုက်ပွဲများ ကြောင့် မန္တလေး-မူဆယ် ပြည်ထောင်စုလမ်းမကြီးတွင် ကုန်တင်ယာဉ်များ သွားလာ၍ မရတော့ဘဲ နယ်စပ်ကူး သန်းရောင်းဝယ်ရေးအတွက် မန္တလေး-မိတ္ထီလာ-တောင်ကြီး-ကျိုင်းတုံ-မိုင်းလား လမ်းမကြီးကို အဓိကထား အသုံးပြု သွားလာနေရကြောင်း ကုန်သည်များထံမှ သိရသည်။