သျှမ်းပြည် တာချီလိတ်မြို့တွင် နေ့စဉ်နီးပါး ဆိုင်ကယ်များ ခိုးယူခံနေရပြီး သူခိုးများ သောင်းကျန်းနေကြောင်း စုံစမ်းသိရသည်။
ယမန်နေ့ (ဇူလိုင်လ ၁၈ ရက်) နံနက် ၉ နာရီ ဝန်းကျင်တွင် တာချီလိတ်မြို့ရှိ စျေးအဝင်နား ဆိုင်ကယ်ရပ်ထားပြီး အမျိုးသမီးတစ်ဦး ဈေးသွားဝယ်နေစဉ် အမည်မသိ အမျိုးသားနှစ်ဦးမှ ၎င်းဆိုင်ကယ်ကို ခိုးယူသွားခဲ့ကြောင်း ဒေသခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။
တာချီလိတ်မြို့တွင် ယမန်နေ့ တစ်ရက်အတွင်း ဆိုင်ကယ် ၅ စီးခိုးခံရပြီး ဆိုင်ကယ်များကို အမည်မသိ အဖွဲ့များမှ နေ့စဉ် လိုက်လံခိုးယူနေကြောင်း ဒေသခံများကပြောသည်။
“ကျမဆိုင်ကယ်က ပျောက်သွားတာ ခုထိတော့ မတွေ့သေးဘူး။ မနေ့ မနက်က (ဇူလိုင် ၁၈ ရက်) တစ်ရက်ထဲကို ၅ စီးပျောက်တာပါ။ ဆိုင်ကယ်ခိုးတဲ့ လူကိုတော့ CCTV ကနေ တွေ့ရတယ်၊ မျက်နှာတော့ သေချာမမြင်ရဘူး”ဟု တာချီလိတ်မြို့ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
တာချီလိတ်မြို့တွင် ဇွန်လမှ စတင်၍ ဆိုင်ကယ်များ နေ့စဉ်ပျောက်ဆုံးနေပြီး တစ်ရက်လျှင် ဆိုင်ကယ် နှစ်စီးမှ လေးစီးအထိ ပျောက်နေကာ သက်ဆိုင်ရာ အာဏာပိုင်များမှ တာဝန်ယူ ဖမ်းဆီးအရေးယူခြင်းများလည်း မပြုလုပ်ပေးသည့်အတွက် ဒေသခံများမှာ လုံခြုံရေး စိုးရိမ်နေကြောင်း သိရသည်။
“တာချီလိတ်မှာ နေ့တိုင်းကို ပျောက်တယ်၊ တစ်ရက်ကို ဆိုင်ကယ် ၃/၄ စီး ပျောက်တယ်။ ခိုးတဲ့ လူကိုလည်း CCTV မှာ အကုန်တွေ့လည်း မဖမ်းပေးကြဘူး၊ ဖမ်းလည်း ဟန်ပြပဲ ဖမ်းကြတာ။ အများစုကတော့ ဆိုင်ကယ်ခေါင်းချိုးလို့ လွယ်တဲ့ဆိုင်ကယ်တွေ ပျောက်ကြတယ်။ တချို့က ရဲတွေကို သွားတိုင်လည်း သူတို့က အရေးမယူပေးဘူး”ဟု တာချီလိတ်မြို့ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
အလားတူ ကျိုင်းတုံမြို့တွင်လည်း ဆိုင်ကယ်များ နေ့စဉ်ပျောက်ဆုံးနေပြီး ဆိုင်ရှေ့၊ ဈေးနှင့် အိမ်ခြံဝင်းထဲတွင် ရပ်ထားသော ဆိုင်ကယ်များလည်း ဝင်ရောက်ခိုးယူခံရကြောင်း ကျိုင်းတုံမြို့ ဒေသခံများထံမှ သိရသည်။
ယခုကဲ့သို့ ခိုးဆိုးလုယက်မှုများ နေ့စဉ်နီးပါး ဖြစ်ပွားနေသည့်အပြင် လက်ရှိတွင် မည်သူမှ ဖမ်းဆီးအရေးယူ ဆောင်ရွက်ခြင်း မရှိသည့်အတွက်ကြောင့် ပြည်သူများ လုံခြုံရေးအတွက် စိုးရိမ်နေရကြသည်။
တာချီလိတ်မြို့သည် ထိုင်း-မြန်မာနယ်စပ် ကုန်သွယ်ရေးမြို့ဖြစ်ပြီး မြန်မာနိုင်ငံတဝှမ်း စစ်အာဏာသိမ်းပြီးနောက် နေရာအနှံ့ တိုက်ပွဲဖြစ်ပွားနေသော်လည်း တာချီလိတ်မြို့တွင် တိုက်ပွဲမဖြစ်ပွားသေးဘဲ ကူးသန်းရောင်းဝယ်ရေး စည်ကားသည့် နေရာဒေသဖြစ်သည်။
Leave a Comments