သျှမ်းမြောက်နှင့် နိုင်ငံတတဝှမ်း စစ်ရှိန် မြင့်တက်နေစဥ် စစ်တပ် ဆရာဝန် (စစ်ဆေးဗိုလ် DSMA) များ တိုင်ပွဲဝင်နိုင်ရေး အတွက် စစ်ကောင်စီက အထူးတပ်ခွဲမှူး (တိုက်ခိုက်ရေး) သင်တန်း ပေးနေကြောင်း စစ်ရေးသတင်းရင်းမြစ်က ယနေ့ (ဇူလိုင်လ ၁၈ ရက်) တွင် ပြောသည်။
စစ်တပ် ဖွဲ့စည်းပုံအရ တပ်ရင်းတိုင်းတွင် စစ်ဆရာဝန် တစ်ဦးစီရှိပြီး လက်ရှိ ရှေ့တန်းထွက်နေရသဖြင့် နောက်တန်းရှိ စစ်ဆေးရုံနှင့် ဆေးတပ်ရင်းများရှိ ဆရာဝန်များအား တိုက်ခိုက်ရေး သင်တန်းအဖြစ် မှော်ဘီတွင် ယခု သတင်းပတ် အတွင်းက စတင်၍ သင်တန်းပေးနေခြင်း ဖြစ်ကြောင်း ဆိုသည်။
“ဆေးဗိုလ် (စစ်ဆရာဝန်) တွေက နဂိုကတည်းက ဆေးတပ်စုမှူး အနေနဲ့ တိုက်ပွဲဝင်ရပါတယ်။ အခုက စစ်ဆေးရုံတွေ၊ ဆေးတပ်ရင်းတွေက ဆေးဗိုလ်တွေကို အထူးတပ်ခွဲမှူး သင်တန်း ထပ်ပေးတယ် ဆိုတော့ စစ်တိုက်ခိုင်း မလို့လား၊ ဆေးတပ်တွေ လုံခြုံရေး အတွက်လား ဆိုတာတော့ မသဲကွဲဘူး” ဟု စစ်ရေးသတင်းရင်းမြစ်က ရှင်းပြသည်။
ရန်ကုန်၊ မဂ်လာဒုံ၌ တည်ရှိသည့် တပ်မတော် ဆေးတက္ကသိုလ်မှ အပတ်စဥ် (၂၄) အထိ စစ်ဆရာဝန် ၄,၀၀၀ ကျော် ဘွဲရခဲ့ပြီး ယခုလအတွင်း အပတ်စဥ် (၂၅) ဗိုလ်လောင်း သင်တန်းအတွက် သင်တန်းသားများ ခေါ်ယူနေသည်။
ကျောင်းဆင်း စစ်ဆရာဝန် ၄,၀၀၀ ကျော်ရှိသော်လည်း အကြောင်းပြချက် အမျိုးမျိုးဖြင့် နှုတ်ထွက်သူ ထောင်နှင့်ချီရှိကြောင်း စစ်ဆရာဝန်ဟောင်း တစ်ဦးက ဆိုသည်။
“၂၀၁၉ တုန်းက ကြံ့ခိုင်ရေးမှာ သွားလုပ်ပေးရင် ထွက်ခွင့်ပြုတယ်။ အဲတုန်းကလည်း ဆရာဝန် ၁၀၀ ကျော် ထွက်တာရှိတယ်။ အခု စစ်မှုထမ်းဟောင်း ဥပဒေနဲ့ ပြန်ခေါ်တယ်။ ဒါပေမယ့် အများစုကတော့ နိုင်ငံခြားထွက်တာနဲ့ အကြောင်းအမျိုးမျိုးပြပြီး ရှောင်နေတာများတယ်” ဟု ၎င်းကဆိုသည်။
နိုင်ငံတဝှမ်း ဖွင့်လှစ်ထားသည့် စစ်ဆေးရုံများတွင် တာဝန်ထမ်းဆောင်နေသည့် စစ်ဆရာဝန် အားလုံးနီးပါး ပြင်ပတွင် ကိုယ်ပိုင် ဆေးခန်း ဖွင့်လှစ်ခြင်း၊ အထူးကု ဆေးရုံများတွင် သွားရောက် ကုသပေးခြင်းများဖြင့် စီးပွားဖြစ်နေပြီး မဖြစ်မနေ ရှေ့တန်းထွက်ရမည် ဆိုပါက ထွက်ပြေးသူ များပြားမည်ဟု စစ်ရေးသတင်းရင်းမြစ်က သုံးသပ်ထားသည်။
Leave a Comments