သျှမ်းပြည် လားရှိုးမြို့နယ် ဟိုပိတ်ကျေးရွာအုပ်စုဘက်သို့ စစ်ကောင်စီတပ်မှ လေကြောင်းဖြင့် ဗုံးကြဲတိုက်ခိုက်ခဲ့ခြင်းကြောင့် အရပ်သားသေဆုံးမှုနှင့် ပြည်သူနေအိမ် ထိခိုက်ပျက်စီးမှု များပြားကြောင်း စုံစမ်းသိရသည်။
ယမန်နေ့ (ဇူလိုင်လ ၁၆ ရက်) ညနေပိုင်းတွင် လားရှိုးမြို့ ဟိုပိတ်ကျေးရွာဘက်သို့ စစ်ကောင်စီတပ်မှ လေကြောင်းဖြင့် ဗုံးကြဲတိုက်ခိုက်ခဲ့ခြင်းကြောင့် အရပ်သား သေဆုံးဒဏ်ရာရရှိသည့်အပြင် ဘုန်းကြီးကျောင်းနှင့် ပြည်သူနေအိမ် ထိခိုက်ပျက်စီးမှုရှိကြောင်း လားရှိုးဒေသခံများက ပြောသည်။
“မနေ့ညက ဟိုပိတ်မှာ လေယာဉ်နဲ့ ဗုံးလာကြဲတာ လူနေအိမ်ကော ဘုန်းကြီးကျောင်းကော ပျက်စီးကုန်တယ်။ ၁၄ ရက်နေ့ကလည်း ရှော့တိုက်ဒုံးနဲ့ ပစ်လာတာ ဟိုပိတ်ကျေးလက် ဆေးပေးခန်းကို မှန်တယ်။ အိမ်ထိပြီးတော့ လူသေတာလည်း ရှိတယ်၊ အလောင်းလည်း မထုတ်ရဲသေးဘူး။ ဘယ်သူမှလည်း မနေရဲတော့ဘူးလေ”ဟု လားရှိုးမြို့နယ်မှ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
လားရှိုးမြို့နယ် ဟိုပိတ်ကျေးရွာနှင့် နည်းပညာတက္ကသိုလ်ဘက်သို့ စစ်ကောင်စီတပ်မှ လေကြောင်းဖြင့် ဗုံးကြဲတိုက်ခိုက်ခဲ့ခြင်းကြောင့် အမျိုးသားတစ်ဦး သေဆုံးခဲ့ပြီး ထိခိုက်ဒဏ်ရာ ရရှိသူများမှာ သိန္နီနှင့် ကွတ်ခိုင်မြို့တွင် သွားရောက်ကုသရကြောင်း ၎င်းဒေသခံအမျိုးသားက ဆက်ပြောသည်။
အလားတူ ယမန်နေ့ (ဇူလိုင်လ ၁၆ ရက်) နံနက်ပိုင်းတွင် လားရှိုးမြို့ ရပ်ကွက်(၁)ရှိ လားရှိုးမိုတယ်အနီး ထွေအုပ်ရိပ်သာတွင် ရှော့တိုက်ဒုံး ကျရောက်ပေါက်ကွဲခဲ့ရာ ၎င်းရိပ်သာထဲ လာရောက်တည်းခိုနေသည့် သိန္နီမြို့နယ် ဒုတိယ အုပ်ချုပ်ရေးမှူးအပါအဝင် မိသားစုဝင် ၃ ဦး သေဆုံးခဲ့ကြောင်း လားရှိုးဒေသခံများထံမှ သိရသည်။
လက်ရှိတွင် လေးရက်ကြာ တစ်ဘက်သက် အပစ်ရပ်ထားသည့် ကိုးကန့်တပ်ဖွဲ့ MNDAA နှင့် စစ်ကောင်စီတပ်တို့ မယ်ဟန်ကျေးရွာတွင် နှစ်ဘက်အပြန်အလှန် တိုက်ပွဲဖြစ်ပွားနေကြောင်း ဒေသခံများက ပြောသည်။
ဇူလိုင်လ ၂ ရက်နေ့တွင် စတင်ခဲ့သည့် စစ်ကောင်စီတပ်နှင့် ညီနောင်မဟာမိတ်တပ်များ၏ လားရှိုးတိုက်ပွဲ နှစ်ပတ်အတွင်း မြို့ပေါ်ရပ်ကွက်ထဲ လေကြောင်းဗုံး၊ လက်နက်ကြီးနှင့် ရှော့တိုက်ဒုံး ကျရောက်ပေါက်ကွဲခြင်းကြောင့် အရပ်သား (၄၀) နီးပါး သေဆုံးခဲ့ပြီး (၃၀) ကျော် ထိခိုက်ဒဏ်ရာရရှိထားကြောင်း လူမှုကူညီရေးအသင်းများထံမှ သိရသည်။
Leave a Comments