သျှမ်းပြည် လားရှိုးမြို့ စစ်ကောင်စီ၏ နန်ကျိုင်းစခန်းကို ကိုးကန့်တပ်ဖွဲ့ MNDAA ကသိမ်းပိုက်ပြီးနောက် စစ်သုံ့ပန်းများအနက် အသက် (၁၈) နှစ်မပြည့်သေးသည့် ကလေး ၃ ဦးကို ဖမ်းဆီးရမိကြောင်း ထုတ်ပြန်ထားသည်။

ဇူလိုင် ၁၄ ရက်က စစ်ကောင်စီ၏ နန်ကျိုင်းစခန်းကိုး ကိုးကန့်တပ်ဖွဲ့ MNDAA က သိမ်းပိုက်ပြီးနောက် စစ်သုံ့ပန်းများအား ဖမ်းဆီးရမိကြောင်း၊ ထိုထဲတွင် အသက် (၁၈) နှစ်မပြည့်သေးသည့် ကင်းထောက်ကလေး ၃ ဦးပါဝင် တွေ့ရှိကြောင်း ကိုးကန့်တပ်ဖွဲ့ MNDAA က ဇူလိုင် ၁၆ ရက်တွင် ထုတ်ပြန်ထားသည်။

စစ်ရေးအတွင်း ကလေးငယ်များကို စစ်ကောင်စီတပ်က အသုံးပြုနေကြောင်း သိရသည်။

အလားတူ ဇူလိုင် ၁၃ ရက် နံနက်ပိုင်းတွင် လားရှိုးစစ်ပွဲဇုန်အတွင်း ဒုတိယတပ်ခွဲမှုး ၁ ဦးအပါအဝင် စစ်သုံ့ပန်း ၃၂ ဦးကို ဖမ်းရမိကြောင်း၊ ဒဏ်ရာရ စစ်သုံ့ပန်းများအား လူသားချင်းစာနာမှုဆိုင်ရာ ကုသမှုများ ပေးခဲ့ကြောင်း ဆိုသည်။

ထို့အပြင် လားရှိုးမြို့ ခိုက်တွေရွာအနီးရှိ စစ်ကောင်စီ၏ အခြေခံလေ့ကျင့်ရေးတပ် ၁၁ ကို ဇူလိုင် ၁၂ ရက်က ကိုးကန့်တပ်ဖွဲ့ MNDAA ကသိမ်းပိုက်ပြီးနောက် စစ်သုံ့ပန်းနှင့် မိသားစုဝင်များကို ဖမ်းဆီးရမိကြောင်း ထုတ်ပြန်ထားသည်။

ထိုဖမ်းဆီးရမိသော စစ်သုံ့ပန်းနှင့် မိသားစုဝင်များအား ပြန်လွတ်ပေးခဲ့ကြောင်း၊ ၎င်းတို့ကို သွားချင်သည့်နေရာအား မေးမြန်းပြီး အနီးစပ်ဆုံး လမ်းမပေါ်သို့ ပို့ဆောင်ပေးခဲ့ကြောင်း ရုပ်သံနှင့်အတူ ကိုးကန့်တပ်ဖွဲ့က ဇူလိုင် ၁၅ ရက်မှာထုတ်ပြန်ထားသည်။

သို့သော် ပြန်လွတ်ပေးသည့် အရေအတွက်ကိုတော့ အသေးစိတ်ဖော်ပြထားခြင်းမရှိပေ။

ဇူလိုင် ၁၅ ရက်တွင်လည်း သီပေါနှင့် မိုင်းရယ်မြို့အစပ် ဆင်ကျော့ကျေးရွာအုပ်စုရှိ ခလရ-၂၃ စစ်ကောင်စီ တပ်စခန်းကို ကိုးကန့်တပ်ဖွဲ့ MNDAA မှသိမ်းပိုက်ခဲ့သည်။