သျှမ်းပြည် လားရှိုးမြို့နယ်တွင် တိုက်ပွဲများအကြား စက်သုံးဆီ ဈေးနှုန်းများ အဆမတန် မြှင့်တက် နေကြောင်း သတင်းရရှိသည်။

ဇူလိုင်လ ၂ ရက်နေ့မှ စတင်၍ အရှေ့မြောက်တိုင်း စစ်ဌာနချုပ် ရမခ အခြေစိုက် လားရှိုးမြို့ကို ညီနောင်မဟာမိတ်တပ်များက ထိုးစစ်ဆင် တိုက်ခိုက်လျက်ရှိရာ စစ်ကောင်စီတပ်နှင့် တိုက်ပွဲပြင်းထန်နေပြီး ဒေသခံအများအပြား ထွက်ပြေးတိမ်းရှောင်နေခြင်းကြောင့် စက်သုံးဆီ ဈေးနှုန်းများ အဆမတန် မြှင့်တက်လာကြောင်း လားရှိုးဒေသခံများက ပြောသည်။

“ဆီဈေးတွေက ရှယ်တက်တာ။ တစ်ပုံးကို ၃ သိန်း၊ ၁ လီတာကို တစ်သောင်းခွဲထိ ရှိတယ်။ ခုက စက်သုံးဆီတွေက ရှိတော့ ရှိတယ်၊ ရှားတာပေါ့။ မြို့ထဲလည်း လူတွေ သိပ်မရှိ‌တော့ဘူး၊ ၅ ပုံမှာ ၁ ပုံပဲ ကျန်တော့မှာ။ ထွက်တဲ့လူတွေလည်း နေ့တိုင်းရှိနေတယ်”ဟု လားရှိုးမြို့ ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

ကိုးကန့်ဌာနချုပ် လောက်ကိုင်မြို့ လေကြောင်းဗုံးကြဲ တိုက်ခိုက်ခံရပြီးနောက် ရမခ အခြေစိုက် လားရှိုးမြို့ကို ထိုးစစ်ဆင်နေသည့် ကိုးကန့်တပ်ဖွဲ့ MNDAA မှ တရုတ်နိုင်ငံ၏ စိုးရိမ်မှုကို အကြောင်းပြပြီး ဇူလိုင်လ ၁၄ ရက် ညသန်းခေါင်မှ စ၍ ဇူလိုင်လ ၁၈ ရက် ည ၁၂ နာရီအထိ လေးရက်ကြာ ယာယီ အပစ်အခတ် ရပ်စဲမည်ဖြစ်ကြောင်း ထုတ်ပြန်ကြေညာခဲ့သည်။

လားရှိုးမြို့ပေါ် တိုက်ပွဲအတွင်း နှစ်ဖက်တပ်ဖွဲ့က လက်နက်ကြီး၊ ရှော့တိုက်ဒုံးများဖြင့် အပြန်အလှန် ပစ်ခတ်တိုက်ခိုက်ကြသောကြောင့် လူနေအိမ်နှင့် ရပ်ကွက်အတွင်း ကျရောက်ပေါက်ကွဲကာ ပြည်သူ ၃၀ ကျော် သေဆုံးပြီး ၄၀ ကျော် ထိခိုက်ဒဏ်ရာ ရှိနေပြီဖြစ်ကြောင်း လူမှုကူညီရေးအသင်းများထံမှ သိရသည်။

အလားတူ သီပေါမြို့နယ်တွင်လည်း စစ်ကောင်စီတပ်စခန်းများကို တအာင်း(ပလောင်)တပ်ဖွဲ့ TNLA မှ ထိုးစစ်ဆင် တိုက်ခိုက်နေပြီး ပြည်ထောင်စုလမ်းမကြီးများ၊ တံတားများ ချိုးဖျက်ခံထားရခြင်းကြောင့် စားသောက်ကုန်များ၊ စက်သုံးဆီများ ဈေးမြှင့်တက်နေကြောင်း သီပေါဒေသခံများက ပြောသည်။

တစ်ဖက်တွင်လည်း TNLA ၊ ပြည်သူ့ကာကွယ်ရေးတပ် PDF ပူးပေါင်းတပ်ဖွဲ့တို့နှင့် စစ်ကောင်စီတပ်တို့သည် သျှမ်းပြည်မြောက်ပိုင်း လားရှိုး၊ ကျောက်မဲ၊ သီပေါ၊ နောင်ချိုနှင့် မိုးမိတ်၊ မိုးကုတ်မြို့နယ်တို့တွင် တိုက်ပွဲပြင်းထန် နေခြင်းကြောင့် အရပ်သားပြည်သူ ၃ သောင်းကျော် ထွက်ပြေးတိမ်းရှောင်နေရပြီး စားနပ်ရိက္ခာ အကူအညီ အရေးပေါ်လိုအပ်နေကြောင်း စစ်ဘေးရှောင်ကူညီသူများထံမှ သိရသည်။