သျှမ်းမြောက် ဒေသတွင် ယာယီ အပစ်အခတ် ရပ်စဲမည်ဟု လားရှိုးမြို့ကို ထိုးစစ်ဆင်နေသည့် ကိုးကန့်တပ် MNDAA က ယနေ့ (ဇူလိုင်လ ၁၄ ရက်) ညနေပိုင်းတွင် ထုတ်ပြန်သည်။

သျှမ်းမြောက် တိုက်ပွဲများကြောင့် တရုတ်နိုင်ငံက စိုးရိမ်နေပြီး ယနေ့ (ဇူလိုင် ၁၄)ရက် ညသန်းခေါင်ချိိန်မှ စ၍ ဇူလိုင်လ ၁၈ ရက်နေ့ ည ၁၂ နာရီအထိ အပစ်အခတ် ရပ်စဲမည်ဖြစ်ကြောင်း ကိုးကန့်တပ်၏ ထုတ်ပြန်ချက်တွင် ဖော်ပြသည်။

လားရှိုး၌ တိုက်ပွဲ ပြင်းထန်နေစဥ် တိုက်ပွဲ ဖြစ်ပွားမှု မရှိသည့် ကိုးကန့် ဌာနချုပ် လောက်ကိုင်မြို့ကို ယမန်နေ့ ညပိုင်း စစ်ကောင်စီ ဗုံးကြဲပြီးနောက် ယခုကဲ့သို့ အပစ်ရပ်မည့် ကြေညာချက် ထွက်ပေါ်လာခြင်း ဖြစ်သည်။

လက်ရှိ ထုတ်ပြန်သည့် အပစ်အခတ် ရပ်စဲရေးတွင် သျှမ်းမြောက်၌ တိုက်ပွဲဝင်နေသည့် TNLA နှင့် မဟာမိတ်တပ်များ ပါဝင် သက်ရောက်မှုရှိမရှိ စုံစမ်းမေးမြန်းနေဆဲ ဖြစ်သည်။

၁၀၂၇ စစ်ဆင်ရေး ပထမပိုင်း ကာလက ကိုးကန့်တပ် MNDAA သည် သျှမ်းမြောက်ရှိ ချင်းရွှေဟော်၊ လောက်ကိုင်၊ ကုန်းကြမ်း၊ ဖောင်းဆိုင်၊ မုန်းကိုး၊ ပန်ဆိုင်း၊ ကွမ်းလုံ နှင့် သိန္နီမြို့များကို သိမ်းပိုက်ခဲ့ပြီး ယခု လားရှိုးမြို့ကို အကြီးအကျယ် ထိုးစစ်ဆင်နေစဥ် လောက်ကိုင်မြို့ ဗုံးကြဲခံခဲ့ရခြင်း ဖြစ်သည်။