စစ်တပ် လော်ဘီတယ်ဂရမ်ချယ်နယ်များ လှုံ့ဆော်မှုကြောင့် နေအိမ်ဗုံးကြဲခံရမှုဖြစ်စဉ်

စစ်တပ် အားပေးထောက်ခံသည့် တယ်လီဂရမ်ချယ်နယ်များမှ မည့်သည့်နေရာတွင် မည့််သည့်အဖွဲ့အစည်းရှိ နေကြောင်း ဗုံးကြဲရန် ဝါဒဖြန့်ပြီး လှုံ့ဆော်ခြင်း၊ သတင်းအမှားဖြန့်ချိခြင်းကြောင့် ပြည်သူနေအိမ်များ ဗုံးကြဲခံနေရသည်။

Subscribers ၁၂၀,၀၀၀ ကျော်ရှိသည့် စစ်တပ်ထောက်ခံတယ်လီဂရမ်ချယ်နယ် မှိုင်းဝေ ချယ်နယ်မှ လားရှိုးမြို့နယ် နမ့်ပေါင်ရွာနှင့် သံလွင်ရွာတွင် ရွာသားများမရှိတော့ဘဲ တော်လှန်ရေးအင်အားစုများသာ ခိုအောင်းနေသဖြင့် လေကြောင်းမှ ဗုံးကြဲရန်လိုအပ်သည်ဟု ဇူလိုင် ၄ ရက် မနက်ပိုင်းက လှုံ့ဆော်ခဲ့သည်။

ထိုသို့ လှုံ့ဆော်အပြီး ၂၄ နာရီအတွင်း စစ်တပ်က လေကြောင်းမှ ဗုံးကြဲခဲ့သည်။

လားရှိုးမြို့နယ် နမ့်ပေါင်ရွာ၏ ဒေသခံများပြောပြချက်အရ စစ်ကောင်စီတပ်က လေယာဉ်ဖြင့် တစ်စီးပြီးတစ်စီး လာရောက် ဗုံးကြဲခဲ့ကြောင်း၊ ကျေးရွာအတွင်း ရွာသားများရှိနေစဉ်မှာပင် ဗုံးကြဲခဲ့ကြောင်း ဆိုသည်။

သို့သော် စစ်ကောင်စီ ဝါဒဖြန့်ချယ်နယ်များကမှု ကျေးရွာအတွင်း ရွာသားများမရှိကြောင်း လှုံ့ဆော်ခဲ့ရာ
စစ်ကောင်စီတပ်မှ အမှန်တကယ် ဗုံးကြဲပြီးနောက် ပြည်သူများ ထိခိုက်သေဆုံးမှု ရှိနေသည်။

အလားတူ Subscriber ငါးသော်ကျော်ရှိသည့် U Kyaw Soe Oo တယ်လီဂရမ်ချယ်နယ်မှ သိန္နီမြို့ကို ပေါင် ၅၀၀ ဗုံးဖြင့်ကြဲရန် ဇူလိုင် ၃ ရက် မနက်ပိုင်းက လှုံ့ဆော်ခဲ့သည်။

၎င်းက “သိန္နီမြို့ ရဲစခန်းထဲမှာ TNLA နဲ့ MNDAA အများကြီး နေရာယူထားတယ်လို့ သိရတယ်။ ပေါင် ၅၀၀ ဗုံး ၄ လုံးလောက်ကြဲရင် ပွဲပြီးပြီ” ဟု (မူရင်းအတိုင်း) လှုံ့ဆော်ခဲ့ခြင်း ဖြစ်သည်။

ယင်းကဲ့သို့ လှုံ့ဆော်အပြီး ညတွင်းချင်းမှာ စစ်တပ်က လေကြောင်းမှ ဗုံးကြဲခဲ့သည်။ စစ်ကောင်စီတပ်မှ ဂျက်လေယာဉ်ဖြင့် ဗုံး ၃ လုံး လာရောက်ကြဲချပြီး ပြည်သူနေအိမ် ၁၀ လုံးထက်မနည်း ထိခိုက်မနည်း ထိခိုက်ပျက်စီးသွားကြောင်း သိန္နီမြို့ဒေသခံတစ်ဦးက သျှမ်းသံတော်ဆင့်ကို ပြောသည်။

ဆက်စပ်ဖတ်ရှု့ရန် သတင်းလင့်ခ် – https://shorturl.at/50jIZ

ထိုနေ့တစ်ရက်တည်းတွင် သိန္နီ-လားရှိုးကြား၊ သိန္နီမြို့နှင့် ၁၁ မိုင်ကျော်ကွာဝေးသည့် မိုင်းလီကျေးရွာအုပ်စုရှိ စာသင်ကျောင်းအနီးကိုလည်း စစ်တပ်က လေကြောင်းဖြင့် ဗုံးကြဲတိုက်ခိုက်ခဲ့ရာ အသက် ၃၀ ကျော်အရွယ် အမျိုးသားတစ်ဦး သေဆုံးသွားခဲ့ကြောင်း သိရသည်။

သိန္နီမြို့ဗုံးကြဲအပြီး စစ်ကောင်စီကို ထောက်ခံရေးသားလေ့ရှိသည့် နေပြည်တော်အခြေစိုက် People Media ကလည်း သိန္နီမြို့ပေါ်ရပ်ကွက် ၂ ရှိ ရဲစခန်းအနောက်ဘက်သို့ တပ်မတော်မှ ဂျက်လေယာဉ်ဖြင့် ဗုံး ၃ လုံး ပစ်ခတ် ရှင်းလင်းလိုက်ကြောင်း ဇွန်လ ၄ ရက် မွန်းလွှဲပိုင်းက ဝမ်းသာအားရ ရေးသားဖြန့်ချိထားသည်။

မူရင်းလင့်ခ် – https://archive.ph/VIezp

ဇွန်လ ၂၅ ရက်ကစပြီး သျှမ်းမြောက်တွင် “၁၀၂၇ စစ်ဆင်ရေး” တိုက်ပွဲတစ်ကျော့ပြန် ဖြစ်ပွား လာပြီးသည့်နောက် တိုက်ပွဲနှင့်ဆက်စပ်၍ သတင်းမှားဖြန့်ချိနေသည့် စစ်ကောင်စီဝါဒဖြန့် တယ်လီဂရမ်ချယ်နယ် ပေါင်း ၁၀ ခုကျော်ကို သျှမ်းသံတော်ဆင့် အချက်အလက်စစ်ဆေးသူများက စောင့်ကြည့်လေ့လာခဲ့သည်။

စစ်ကောင်စီဝါဒဖြန့် တယ်လီဂရမ်ချယ်နယ်များက “ပြည်သူများသည် အကြမ်းဖက်အားပေးသည့် NLD ထောက်ခံသူများ၊ PDFများ၏ အကြမ်းဖက်မှုများကြောင့် မိုးထဲရေထဲတွင် စစ်ဘေးရှောင်ပြီး ဒုက္ခရောက်နေကြရကြောင်း၊

သျှမ်းမြောက် စစ်မျက်နှာပြင်တွင် စစ်တပ်သည် စစ်နိုင်နေသော်လည်း တရားဝင် တပ်မတော်ဖြစ်၍ ပြည်တွင်းစစ် စည်းကမ်းများအား လိုက်နာရခြင်းကြောင့် တော်လှန်ရေး အင်းအားစုများ၏ ကျဆုံးနေသည့် ဓာတ်ပုံများရိုက်ခွင့်၊ ဆိုရှယ်မီဒီယာတွင် တန်ပြန်ဝါဒဖြန့်ချိခွင့်မရကြောင်း” စသည့်ဖြင့် သတင်းမှားများ ဖြန့်ချိနေသည်။

ကျောက်မဲမြို့ စစ်ဘေးရှောင် ၃ ဦး ပလောင်စကားမတတ်ဟုဆိုကာ TNLA ပစ်သတ်ခဲ့သည်ဆိုသည့် ဗီဒီယိုဖိုင်အမှားကိုလည်း သျှမ်းသံတော်ဆင့်မှ စီစစ်ခဲ့သည်။

သတင်းလင်ခ့် – https://burmese.shannews.org/archives/42471

ဇူလိုင် ၇ ရက် ညပိုင်းတွင်လည်း စစ်ကောင်စီကို ထောက်ခံရေးသားသည့် Ko Thet ချယ်နယ်က လားရှိုးမြို့ကို ဖျက်အားပြင်းဗုံးများဖြင့် လေကြောင်းမှ ဗုံးကြဲပေးရန် လှုံ့ဆော်ခဲ့နည်းတူ ကိုးကန့်သိမ်းပိုက်ထားသည့် လောက်ကိုင်ဒေသအား ဗုံးကြဲရှင်းလင်းရန် လှုံ့ဆော်ခဲ့သည်။

သို့ရာတွင် စစ်တပ်ထောက်ခံ ချယ်နယ်များက ပြည်သူမရှိကြောင်း ဝါဒဖြန့်၍ ဗုံးကြဲတိုက်ခိုက်မှုများ လှုံ့ဆော်သကဲ့သို့ နေ့စဉ်ဗုံးကြဲတိုက်ခိုက်မှုများလည်း ပြုလုပ်နေ၍ မြေပြင်တွင် ပြည်သူသေဆုံးမှု မြင့်တက်လျက်ရှိသည်။

စစ်ကောင်စီတပ်သည် တစ်ကျော့ပြန် “၁၀၂၇ စစ်ဆင်ရေး” တွင် စစ်ရေးရှုံးနိမ့်မှုကို ရင်ဆိုင်နေရသဖြင့် လက်နက်ကြီး၊ လေကြောင်းတိုက်ခိုက်မှုအား အလွန်ကျွံ့သုံးစွဲခုခံလျက်ရှိပြီး၊ ၁၂ ရက်အတွင်းမှာတင် အရပ်သားသေဆုံးသူ ၄၄ ဦး နှင့် ထိခိုက်ဒဏ်ရာရသူ ၆၀ ဝန်းကျင်ရှိကြောင်း TNLA က ဇူလိုင် ၆ ရက်တွင် ထုတ်ပြန်ထားသည်။

စစ်တပ်အာဏာသိမ်းပြီးနောက်ပိုင်း အင်တာနက်၊ လှုမှုကွန်ရက်နှင့် မိုဘိုင်းအီလက်ထရွန်နစ် နည်းပညာအခြေခံ မီဒီယာမျိုးစုံမှ ဖယ်ရှားခံထားရသည့် စစ်ကောင်စီက တယ်လီဂရမ် (Telegram) တွင် ချယ်နယ်မျိုးဖွင့်၍ ဝါဒမှိုင်းတိုက်နေခြင်းပင်။

ထိုသို့လုပ်ဆောင်ရန်အတွက် စစ်ကောင်စီ တပ်တွင်း ညွှန်ကြားချက်များ ပေးထားသည်ဟု Myanmar Now သတင်းတစ်ခုတွင် ဖော်ပြထားသည်။

ဆက်စပ်ဖတ်ရှု့ရန် သတင်းလင့်ခ် – https://myanmar-now.org/mm/news/8813/

တယ်လီဂရမ်မှ စစ်တပ်လော်ဘီ ချယ်နယ်များသည် NUG ၊PDF နှင့် တိုင်းရင်းသား လက်နက်ကိုင် အဖွဲ့အစည်းများ၊ စစ်အာဏာရှင် ဆန့်ကျင်သူများနှင့် CDM ဝန်ထမ်းများကို အပုပ်ချရန်၊ တိုက်ခိုက်ရန်၊ ဖမ်းဆီးရန် ကွန်ရက်သဖွယ် ချိတ်ဆိတ် လုပ်ဆောင်နေသလို ဝါဒဖြန့်ချိမှုအတွက်ပါ စစ်ကောင်စီက အသုံးချခွင့် ရနေသည်။

ထို့အပြင် သူတစ်ပါး၏ ကိုယ်ရေးကိုယ်တာ၊ လိင်ပိုင်းဆိုင်ရာ ကိစ္စများကို တော်လှန်ရေးနှင့် ချိတ်ပြီး အသရေဖျက်သည့် အကြောင်းအရာများ၊ မည်သူတစ်ဦးမှမသိသေးသည့် အတွင်းသတင်းများကို ထုတ်ပြန်ပေးသည့် ပုံစံမျိုးသာမက ၎င်းတို့ကို စစ်တပ်က အရေးပါသည့်ပုဂ္ဂိုလ်ဟု ထင်အောင် နာမည်ကအစ စစ်တပ်နှင့် ဆက်နွယ်သည့် နာမည်ပေးပြီး စစ်တပ်အားပေး အကြောင်းအရာ ဖန်တီးဖြန့်ဝေခြင်းများ လုပ်ကြသည်။

တယ်လီဂရမ်တွင် စစ်လော်ဘီများက မည်သို့လုပ်ဆောင်နေသလဲ၊ မည်သည့်နည်းစနစ်ဖြင့် ဝါဒဖြန့် ပုံဖျက်နေသလဲ စသည့်ဖြင့်အကြောင်းအရာကို Mizzima သတင်းဌာနမှ သုတေသနပြုလုပ်ပြီး ရေးသားဖော်ပြထားသည်။

ဆက်စပ်ဖတ်ရှု့ရန် သတင်းလင့်ခ် – https://www.mizzimaburmese.com/article/94953

သျှမ်းသံတော်ဆင့် စာဖတ်ပရိတ်သတ်များအနေဖြင့် လူမှုကွန်ရက် စာမျက်နှာများတွင် ဖော်ပြနေသည့် သတင်းများကို ချက်ချင်းမယုံကြည်ဘဲ စိတ်ချရသော သတင်းမီဒီများသို့ သွားရောက်ဖတ်ရှု့ကြရန် တိုက်တွန်းပါသည်။