သျှမ်းပြည် မြောက်ပိုင်း၊ လားရှိုးမြို့ရှိ အထပ်မြင့် တိုက်များနှင့် အမြင့်ပိုင်း တောင်ကြောများပေါ်တွင် စစ်ကောင်စီတပ်က စနိုက်ပါသမားများ ပါဝင်သည့် တပ်ဖွဲ့ငယ် အများအပြား ဖြန့်ကျက်ထားကြောင်း စစ်ရေးသတင်းရင်မြစ်က ယနေ့ (ဇူလိုင်လ ၈ ရက်) တွင်ပြောသည်။
ယမန်နေ့ ညပိုင်းက အရှေ့မြောက်တိုင်း စစ်ဌာနချုပ် လက်အောက်ခံ လာရှိုးမြို့စောင့်တပ် ဖြစ်သည့် ခမရ (၅၀၇) တပ်ရင်းကို MNDAA သိမ်းပိုက်နိုင်ပြီ ဆိုသည့် သတင်းများ ထွက်ပေါ်လာပြီးနောက် မြို့အခြေပြု ခံစစ်သေဖြင့် ခုခံရန် စနိုက်ပါသမားများ ပါဝင်သည့် တပ်ဖွဲ့ငယ် အများအပြား ဖြန့်ကျက် ပြင်ဆင်နေခြင်း ဖြစ်သည်။
“ခမရ (၅၀၇) ကိုရပြီလို့ ဆိုနိုင်ပေမယ့် အဓိက နေရာတွေ ကျန်ပါသေးတယ်။ လားရှိုးကို ဝိုင်းပတ်ထားတဲ့ ခံစစ်နေရာ ၂၂ ခုလည်း ကျန်နေပါသေးတယ်။ ကိုးကန့်တပ်ကလည်း မြို့ဆင်ခြေဖုံးနေရာတွေ စဝင်နေပြီ ဆိုတော့ မြို့တွင်း တိုက်ပွဲတွေ ပြင်းထန်နိုင်ပါတယ်။ ပြည်သူတွေ အနေနဲ့ စနိုက်ပါတွေ ရှိနေတယ်ဆိုတာကို သတိပြုကြပါ” ဟု စစ်ရေးသတင်းရင်းမြစ်က ရှင်းပြသည်။
စစ်တပ် အနေဖြင့် တပ်ဖွဲ့ငယ်များစွာ ဖြန့်ခွဲ၍ မြို့တွင်း ပြောက်ကျား နည်းဗျူဟာ အသုံးပြု ခံစစ်ဆင်ရန် ပြင်ဆင်နေပြီး အထပ်မြင့် အဆောက်အအုံများနှင့် မြို့ကိုစိုးမိုးထားသည့် တောင်ကြောများတွင် စနိုက်ပါများဖြင့် နေရာယူထားကြောင်း ၎င်းကဆက်ပြောသည်။
ယနေ့ မနက်ပိုင်း လားရှို့မြို့စွန် နေရာတချို့တွင် တိုက်ပွဲငယ်များ ဖြစ်ပွားနေပြီး မယ်ဟန်ဂိတ်တွင်လည်း အစီးရေ ရာနှင့်ချီသည့် ကားများ မြို့မှထွက်ခွာခွင့်ရရန် တန်းစီ ကြိုးစားနေသည်ဟု မြို့ခံ တစ်ဦးက ပြောသည်။
ပြီးခဲ့သည့် ဇူလိုင်လ ၅ ရက်နေ့က ခလရ (၂၉၁) တွင် ခံစစ်ဆင်နေတဲ့ စစ်ကောင်စီတပ်များ အကျအဆုံးများစွာဖြင့် တပ်ရင်းကို စွန့်ခွာ၍ လားရှိုးမြို့သို့ ဆုတ်ခွာသွားပြီးနောက် ယခု ခမရ (၅၀၆) တပ်ရင်း ထပ်မံ ကျဆုံးခြင်း ဖြစ်သည်။
ယင်းနောက် လားရှိုးမြို့တွင်း ဝင်ရောက်နိုင်ရေး ညီနောင်မဟာမိတ်တပ်များ တိုက်စစ်အရှိန်မြှင့်နေသည့် နည်းတူ စစ်ကောင်စီတပ်က ခံစစ်သေဖြင့် မြို့တွင်းမှ ခုခံရန် ပြင်ဆင်နေသဖြင့် မြို့တွင်း တိုက်ပွဲများ ပြင်းထန်လာနိုင်ပြီး မြို့ကြေမွ ပျက်စီးမည့် အရေး ကြုံတွေ့နေရခြင်း ဖြစ်သည်။
ယမန်နေ့ညက မြို့ပတ်ဝန်းကျင် တိုက်ပွဲများ အတွင်း အပြန်အလှန် လက်နက်ကြီးများ ပစ်ခတ်သဖြင့် လူနေရပ်ကွက်များ အတွင်း လက်နက်ကြီးကျည် ကျရောက်ပြီး ရပ်ကွက် (၅)၊ ရပ်ကွက်(၇) နှင့် ရပ်ကွက် (၁၂) ရှိ တရုတ်ဘုရားကျောင်း ထိခိုက် ပျက်စီးခဲ့သည့်နည်းတူ လူနေအိမ်များ ပျက်စီးပြီး လူထိခိုက်မှုများ ရှိခဲ့ကြောင်း မြို့ခံများက ပြောသည်။
Leave a Comments