သျှမ်းပြည်မြောက်ပိုင်း လားရှိုးမြို့စောင့်တပ် ဖြစ်သည့် ခမရ (၅၀၇) တပ်ရင်းကို ယနေ့ (ဇူလိုင်လ ၇ ရက်) ညပိုင်းတွင် ကိုးကန့်တပ်-MNDAA ဝင်ရောက်စီးနင်း တိုက်ခိုက်နေသဖြင့် တိုက်ပွဲ ပြင်းထန်နေပြီး စစ်ကောင်စီက အတွဲလိုက်ဒုံများ အသုံးပြု ပစ်ခတ် တုန့်ပြန်နေကြောင်း စစ်ရေးသတင်းရင်းမြစ်က ပြောသည်။
ယနေ့ ညနေပိုင်းမှ ယခုသတင်းရေးသားနေချိန် အထိ ခမရ (၅၀၇) တပ်ရင်းနှင့် အနီး တစ်ဝိုက် လက်နက်ကြီး လက်နက်ငယ်သံများ ကျယ်လောင်စွာ ကြားနေရဆဲဖြစ်ပြီး နေအိမ်ထိခိုက် ပျက်စီးမှုများလည်းရှိကြောင်း ယင်းစစ်တပ်အနီးရှိ ရပ်ကွက် (၅) တွင် နေထိုင်သည့် ဒေသခံ တစ်ဦးက ပြောသည်။
“ပေါက်ကွဲသံ ကျယ်လွန်းလို့ နားကန်းပြီလား ထင်ရတယ်။ အတွဲလိုက် ဒုံးတွေကော လေကြောင်းကကော ပစ်နေတယ်ထင်တယ်။ စခန်းသိမ်းလိုက်တာလားတော့ မသိသေးဘူး” ဟု ရပ်ကွက် (၅) တွင် နေထိုင်သူက ရှင်းပြသည်။
အဆိုပါ တပ်ရင်းကို MNDAA သိမ်းပိုက်လိုက်ပြီဟု သတင်းများ ထွက်ပေါ်နေသော်လည်း သျှမ်းသံတော်ဆင့် အနေဖြင့် သီးခြား အတည်ပြုနိုင်ရန် ကြိုးစားနေဆဲ ဖြစ်သည်။
ယင်းတပ်ရင်း သိမ်းပိုက်ခံရပါက လားရှိုးမြို့ အခြေစိုက် ရမခ စစ်ဌာနချုပ် မလုံခြုံတော့ဟု စစ်ရေးသတင်းရင်းမြစ်က ဆိုသည်။
လားရှိုးမြို့အနီး ယနေ့ နေ့လယ်ပိုင်းမှ စတင်ကာ တိုက်ပွဲ ပြင်းထန်နေပြီး စစ်ကောင်စီတပ်က မြို့ကို အလုံးစုံ ပိတ်ဆို့လိုက်သဖြင့် ပြည်သူ ထောင်ပေါင်းများစွာ ပိတ်မိနေကြောင်း မြို့ခံများက ပြောသည်။
Leave a Comments