သျှမ်းပြည် မြောက်ပိုင်း၊ လားရှိုးမြို့အနီး ဖြစ်ပွားနေသည့် တိုက်ပွဲ အတွင်း အရှေ့မြောက်တိုင်း စစ်ဌာနချုပ် (ရမခ) စစ်တီးဝိုင်း တပ်ဖွဲ့မှ တပ်ဖွဲ့ဝင် ၃ ဦး သေဆုံးသွားသည်ဟု စစ်ရေးသတင်းရင်းမြစ်က ယနေ့ (ဇူလိုင်လ ရ ရက်)တွင် အတည်ပြု ပြောသည်။
လားရှိုးမြို့အနီးတွင်ဖြစ်ပွားနေသည့် ညီနောင်မဟာမိတ်တပ်များနှင့် တိုက်ပွဲများတွင် စစ်တီးဝိုင်းတပ်ဖွဲ့ ဝင်ရောက် တိုက်ခိုက်နေရပြီး ယမန်နေ့ (ဇူလိုင်လ ၇) ရက် တိုက်ပွဲ ဖြစ်စဥ် အတွင်း သေဆုံးသွားခြင်း ဖြစ်သည်ဟု ၄င်းက ဆိုသည်။
“စစ်တီးဝိုင်း အဖွဲ့ပါ သေနတ်ပြန်ကိုင်ရတဲ့ အနေအထားရောက်နေပြီ။ လားရှိုး ရမခ မကျဖို့ ရှိသမျှ လူကုန်ထုတ်နေရတဲ့ အခြေအနေပါ” ဟု စစ်ရေးသတင်းရင်းမြစ်က ရှင်းပြသည်။
အင်အား ၅၀ ဝန်းကျင်ဖြင့် ဖွဲ့စည်းထားသည့် ရမခ စစ်တီးဝိုင်းတပ်ခွဲရှိ တပ်ဖွဲ့ဝင်များ သေနတ်ဖြင့် ဝေးကွာနေသည်မှာ နှစ်များစွာ ရှိနေပြီဖြစ် ဖြစ်သည်။
ယင်းတပ်ဖွဲ့ အနေဖြင့် စစ်တီးဝိုင်း အတွက် လေ့ကျင့်မှုနှင့် ပုံမှန် ကျင်းပလေ့ရှိသည့် ပွဲများတွင် တီးမှုတ်ရသည့် တာဝန်သာရှိသည့် အခွင့်ထူးရတပ်ဖွဲ့ ဖြစ်သည်ဟု ၎င်းက ဆက်ပြောသည်။
လက်ရှိ တိုက်ပွဲများ ပြင်းထန်နေသည့် လားရှိုးမြို့ ခံစစ် အတွက် စစ်ကောင်စီက ပြည်သူ့စစ်မှုထမ်း ဥပဒေဖြင့် စုဆောင်းထားသည့် လူငယ်များ ပို့ဆောင် အင်အားဖြည့်တင်းနေသည်ဟု သတင်းများ ထွက်ပေါ်နေသော်လည်း သျှမ်းသံတော်ဆင့် အနေဖြင့် သီးခြား အတည်ပြုနိုင်ရန် ကြိုးစားနေဆဲ ဖြစ်သည်။
ယနေ့ လားရှိုးမြို့အနီးရှိ ခမရ (၅၀၇) ၊ ဆင်တောင်၊ ကြာကန် မြို့ရှောင်လမ်းနှင့် မိုင်းတင်းရွာ များတွင် တိုက်ပွဲ ပြင်းထန်နေပြီး တိုက်ပွဲ မြို့နှင့် နီးကပ်လာသဖြင့် စစ်ကောင်စီတပ်က လားရှိုးမြို့ အဝင်အထွက် အလုံးစုံ ပိတ်ဆို့လိုက်ပြီဖြစ်ကြောင်း မြို့ခံတစ်ဦးက ပြောသည်။
Leave a Comments