သျှမ်းပြည် တောင်ပိုင်း၊ရွာငံမြို့နယ်၊ရေချမ်းရွာနှင့် ၀က်ကဘူးရွာကြား လမ်းပိုင်းတစ်နေရာတွင် စစ်ကြောင်းထိုးရန် ထွက်လာသော စစ်ကောင်စီတပ်ကို ဒေသခံတော်လှန်ရေးပူးပေါင်းအဖွဲ့က တိုက်ခိုက်ပြီး စစ်ကောင်စီဘက် ၁၂ဦးထက်မနည်း သေဆုံးခဲ့ကြောင်း ရွာငံPDF(JPRF)တပ်ထံမှသိရသည်။
ဇူလိူင်လ၅ရက် နံနက်၉နာရီကျော်တွင် ဖြစ်ပွား ခဲ့ခြင်းဖြစ်ပြီး တိုက်ပွဲ၁နာရီကျော်ကြာ ဖြစ်ပွားခဲ့ကြောင်း သိရသည်။
“သူတို့က ၁၂ဦးထက်မနည်းသေဆုံးပြီး အများအပြားဒဏ်ရာရတယ်။ကျွန်တော်တို့ဖက်ကနှစ်ဦး ဒဏ်ရာရရှိတယ်”ဟု ရွာငံPDF(JPRF)တပ်ဖွဲ့မှ ကိုကေပီက သျှမ်းသံတော်ဆင့်ကိုပြောသည်။
စစ်ကောင်စီတပ်သား၁၂ဦးထက်မနည်းသေဆုံးသည့်အပြင် လက်နက်၊စစ်အသုံးအဆောင်နှင့် မူးယစ်ဆေးဝါးများလည်း တော်လှန်ရေးအဖွဲ့ကသိမ်းဆည်းရမိခဲ့ကြောင်း သိရသည်။
“ခုတစ်လော ရွာငံ ဖက်မှာ စစ်ကောင်စီကဒေသခံတွေရဲ့ကားကို ခေါ်ခေါ်ပြီး သွားနေတာ အဲလိုခေါ်တာလည်း ဒေသခံတွေကမကြိုက်ဘူးပေါ့နော် ဒေသခံတွေကလည်း ဒီလိုကားပေးတာ ပူးပေါင်းမပါဝင်ဖို့ ပြောချင်ပါတယ်ဗျ”ဟု ကိုကေပီက ထပ်မံပြောပါသည်။
ယင်းတိုက်ပွဲကိုရွာငံPDF(ဂျိုးဖြူတော်လှန်ရေးတပ်ဖွဲ့)နှင့် အမှတ်၅၁၅ပြည်သူ့ကာကွယ်ရေးတပ်မှတော်လှန်ရေး ပူးပေါင်းအဖွဲ့တို့ ပါဝင်တိုက်ခိုက်ခဲ့ကြောင်း သိရသည်။
Leave a Comments