နိုင်ငံတဝှမ်း ပြည်သူ့စစ်မှုထမ်း ဥပဒေဖြင့် လူငယ်များကို အဓမ္မ စုဆောင်းပြီး လေ့ကျင့်ရေး ကျောင်းများတွင် သင်တန်းပေးနေရာ ယနေ့ (ဇွန်လ ၂၈ ရက်နေ့) တွင် အပတ်စဥ် (၁) စစ်သင်တန်းဆင်းပြီဖြစ်ကြောင်း စစ်ရေးသတင်းရင်းမြစ်က ပြောသည်။
ပြီးခဲ့သည့် မတ်လ အတွင်းက ပြည်သူ့စစ်မှုထမ်း ဥပဒေဖြင့် စစ်သားသစ် အဖြစ် စုဆောင်းခံရသူ ၄,၀၀၀ ဝန်းကျင်ရှိပြီး စစ်သင်တန်းကျောင်းများနှင့် လေ့ကျင့်ရေးတပ်များတွင် အခြေခံ စစ်သင်တန်းပေးပြီးနောက် ယနေ့ သင်တန်းဆင်းပွဲများ စတင်ပြုလုပ်နေပြီဟု ဆိုသည်။
![](https://burmese.shannews.org/wp-content/uploads/2024/06/signal-2024-06-28-132439_003-1024x683.jpeg)
“သင်တန်းကျောင်း တစ်ခုမှာ လူ ၂၅၀ သင်တန်းပေးပါတယ်။ စုစုပေါင်း အင်အား ၄,၀၀၀ လောက် ရှိပါမယ်။ ဒီလူငယ်တွေကို တပ်ရင်းသစ်တွေအဖြစ် သပ်သပ်စုဖွဲ့ထားပါတယ်။ လူဟောင်းတွေနဲ့ ရောမထားပါဘူး။ ရှေ့တန်းပို့ဖို့ ပြင်ဆင်နေပါတယ်။ အုပ်ချုပ်မှုနဲ့ ဘယ်စစ်ရေးဂွင်တွေမှာ ထည့်သုံးမလဲ ဆိုတာကတော့ မသိရသေးပါဘူး” ဟု စစ်ရေးသတင်းရင်းမြစ်က ရှင်းပြသည်။
အဆိုပါ လုငယ်များကို ပြီးခဲ့သည့် မတ်လကုန်ပိုင်းက စတင်ပြီး နိုင်ငံတတှမ်းရှိ တပ်မတော် တန်းမြင့်လေ့ကျင့်ရေးကျောင်း (တတက) နှင့် စစ်အခြေခံ လေ့ကျင့်ရေးတပ် (စခတ) များတွင် သင်တန်းပေးခဲ့ခြင်း ဖြစ်သည်။
![](https://burmese.shannews.org/wp-content/uploads/2024/06/signal-2024-06-28-132439_005-1024x683.jpeg)
“စစ်မြေပြင် အပို့ခံရရင် ဂရုစိုက်ကြပါ။ စစ်တပ်ကတော့ အလွယ်တကူ ထွက်မပြေးနိုင်အောင် ထိန်းချုပ်ထားမှာပဲ။ ကိုယ်နဲ့ တွဲထားတဲ့ လူတွေကို မတိုက်ဖို့နဲ့ လက်နက်ချဖို့ စည်းရုံးပါ။ စောစောစီးစီး လက်နက်ချဖို့ ကြိုးစားပါ။ လက်နက်ချတဲ့ နေရာမှာလည်း ကျနော်တို့သည် စစ်မှုထမ်း အပတ်စဥ် (၁) သင်တန်း မဖြစ်မနေ တက်ခဲ့ရတဲ့ သူတွေပါ ဆိုတာကို သေချာ ရှင်းပြပါ။ တော်လှန်ရေးတပ်တွေကလည်း နားလည်မှုရှိရှိ ဖေးမကြိုဆိုပေးကြပါ” ဟု CDM ဗိုလ်ကြီးဇင်ယော် က သတင်းစကားပါသည်။
လက်ရှိ စစ်ကောင်စီသည် ပြည်သူ့စစ်မှုထမ်း အပတ်စဥ် (၂) နှင့် အပတ်စဥ် (၃) ကို သင်တန်းပေးနေပြီး မကြာမီ အပတ်စဥ် (၄) စတင်ခေါ်ယူရန် ပြင်ဆင်နေပြီ ဖြစ်သည်။
ပြည်သူ့စစ်မှုထမ်း သင်တန်း အပတ်စဥ် (၁) တွင် မိမိသဘောဆန္ဒဖြင့် ဝင်ရောက်လာသူများသာ ပါဝင်သည်ဟု စစ်ကောင်စီ ပြန်ကြားရေး ဗိုလ်ချုပ်ဇော်မင်းထွန်း က မတ်လ ၂၇ ရက်က ပြောဆိုထားသည်။