သျှမ်းပြည်တောင်ပိုင်း ပင်လောင်းမြို့နယ် လွယ်ကျိုင်းကျေးရွာမှ ဦးပဉ္ဇင်းတစ်ပါးသည် တိုက်ပွဲအတွင်း လက်နက်ကြီးထိမှန်၍ ပွဲချင်းပြီး ပျံလွန်တော်မူခဲ့ကြောင်း သတင်းရရှိသည်။
ယမန်နေ့ (ဇွန် ၁၉ ရက်) ညနေပိုင်းတွင် ပင်လောင်းမြို့နယ် လွယ်ကျိုင်းကျေးရွာ အနီး စစ်ကောင်စီတပ်နှင့် ကရင်နီတော်လှန်ရေး အင်အားစုတို့ တိုက်ပွဲဖြစ်ပွားခဲ့ပြီး လွယ်ကျိုင်းကျေးရွာအတွင်းသို့ လက်နက်ကြီး ကျရောက်ပေါက်ကွဲခဲ့၍ ဦးပဉ္ဇင်းတစ်ပါး ထိမှန်ကာ ပွဲချင်းပြီး ပျံလွန်တော်မူခဲ့ကြောင်း ပင်လောင်းဒေသခံများက ပြောသည်။
“ဦးပဉ္ဇင်းက တင်ပါး၊ ခါးနဲ့ ဗိုက်ကို လက်နက်ကြီးထိတာ ချက်ချင်းပျံလွန်တော်မူတယ်။ လက်နက်ကြီးက တနေကုန် ကျနေတာ၊ ဘုန်းကြီးကျောင်း စာသင်ကျောင်းတွေမှာတောင် မလွတ်ဘူး။ ထွက်ပြေးမယ်ဆိုလည်း လမ်းတွေအကုန် သူတို့ပိတ်တော့ ထွက်မရဘဲ တိုက်ပွဲကြား ကြောက်ကြောက်နဲ့နေနေတာ”ဟု အသက်၄၀အရွယ် လွယ်ကျိုင်းရွာအမျိုးသားတစ်ဦးက သျှမ်းသံတောင်ဆင့်ကို ပြောသည်။
အလားတူ ပင်လောင်းမြို့နယ် မိုးဦးရွာရှိ မူလတန်းကျောင်းသားများ ဖြစ်ကြသည့် အသက် (၈) နှစ်အရွယ် မအေားနှင့် မောင်ဖိုးသောကြာ တို့ကိုလည်း လက်နက်ကြီးကျည်စ ထိမှန်သည့်အပြင် နမ်းဖာမူရွာမှ ဦးဒေါင့်ကိုလည်း ထိမှန်ခဲ့ကြောင်း သိရသည်။
လက်ရှိတွင် ဒဏ်ရာရရှိသူများကို ပင်လောင်းမြို့ ဆေးရုံနှင့် တောင်ကြီးမြို့ ဆေးရုံများသို့ အရေးပေါ် ပို့ဆောင်ပေးခဲ့ကြောင်း ဒေသခံများထံမှ သိရသည်။
ဆက်လက်ပြီး လက်ရှိမှာ ပင်လောင်းမြို့တောင်ဘက် နမ်းဖာမူရွာတို့တွင် တိုက်ပွဲပြင်းထန်နေသလို စစ်ကောင်စီတပ်ဘက်မှ ပစ်ခတ်လာသည့် လက်နက်ကြီးများလည်း ဆက်တိုက် ကျရောက်လျက်ရှိကြောင်း ပင်လောင်းဒေသခံများက ပြောသည်။
“အခုထိ တိုက်ပွဲတွေက ပြင်းထန်နေတုန်းပဲ၊ လက်နက်ကြီးတွေနဲ့ပစ်နေတာ။ အိမ်ရောလူရော ထိတာပဲ၊ အိမ်တွေ မီးလောင်နေတယ်။ ရွာကနေလည်း ဘယ်သူမှ မထွက်ရဲဘူး။ ပိတ်မိနေတဲ့သဘောပဲ”ဟု လွယ်ကျိုင်းရွာဒေသခံ ၎င်းအမျိုးသားက သျှမ်းသံတော်ဆင့်ကို ဆက်ပြောသည်။
ပင်လောင်းမြို့နယ်တွင် လက်ရှိ ဖြစ်ပွားနေသည့် တိုက်ပွဲကြောင့် ပင်လောင်းမြို့တောင်ဘက် ကျေးရွာ ၃၀ နီးပါးမှ အရပ်သား (၃) သောင်းကျော် ထွက်ပြေးတိမ်းရှောင်နေရကြောင်း သိရသည်။
Leave a Comments