သျှမ်းပြည် သီပေါမြို့နယ် ကွန်စံလိတ်ရွာအနီးရှိ သီပေါ-နမ္မတူလမ်းမကြီးပေါ်တွင် မြောင်းတူးပြီး စစ်ကောင်စီတပ်က လမ်းကြောဖြတ်တောက်ထားလိုက်ကြောင်း စုံစမ်းသိရသည်။
ယမန်နေ့ (ဇွန်လ ၁၂ ရက်) ညနေ ၃ နာရီကျော်မှစတင်ပြီး သီပေါမြို့နယ် ပန်နေကျေးရွာနှင့် ကွန်စံလိတ်ကျေးရွာအကြားရှိ သီပေါ-နမ္မတူလမ်းမကြီးပေါ်တွင် စစ်ကောင်စီက မြောင်းတူးပြီး လမ်းကြောဖြတ်တောက်လိုက်ခြင်းကြောင့် ကားသွားလာ၍ မရတော့ဘဲ တိုက်ပွဲပြန်လည်ဖြစ်ပွားမည်ကို စိုးရိမ်နေရကြောင်း ဒေသခံများက ပြောသည်။
“လူနဲ့တူးပြီး နောက်မှ စက်ရောက်လာတာလို့ပြောတယ်၊ ဗမာစစ်တပ်က တူးတာ။ ပန်နေရွာနားမှာတော့ စစ်ကောင်စီတပ်က ရှေ့ရက်ကတည်းက လာစောင့်နေတာ။ အခုတူးတာက ပန်နေရွာနဲ့ ကွန်စံလိတ်ရွာကြားမှာ လာတူးတာ။ မြောင်းတူးထားတာက လူတစ်ရပ်စာလောက် နက်တယ်၊ သူတို့စစ်တပ်နားမှာ ကတုတ်ကျင်း တူးထားသလိုမျိုး မြောင်းအကျယ်ကြီး တူးတာ”ဟု သီပေါမြို့နယ်မှ ဒေသခံအမျိုးသမီး တစ်ဦးက သျှမ်းသံတော်ဆင့်ကို ပြောသည်။
![](https://burmese.shannews.org/wp-content/uploads/2024/06/signal-2024-06-13-165737_003.jpeg)
သီပေါစစ်ကောင်စီတပ်မှ မိုးတေကျေးရွာအုပ်စုအတွင်းရှိ ပန်နေနှင့် ကွန်စံလိတ်ကျေးရွာအကြား သီပေါ-နမ္မတူ ကားလမ်းမကြီးအပေါ် မြောင်းတူးလိုက်ခြင်းကြောင့် အနီးအနားရှိ လယ်ကွက်ထဲမှ ရှောင်ကွင်းသွားလာရပြီး စားသောက်ကုန် ပြတ်လပ်ကာ အခက်အခဲဖြစ်မည်ကို စိုးရိမ်နေရကြောင်း ဒေသခံများထံမှ သိရသည်။
“ရွာတွေမှာ ထပ်ဖျက်ဦးမယ်လို့ ပြောသေးတယ်။ စစ်တပ်က လမ်းဖျက်လိုက်တော့ စစ်ဖြစ်တော့မယ်ဆိုပြီး ရွာထဲက ကုန်စုံဆိုင်တွေမှာ အလုအယက် ဝယ်ကြတာ ဈေးတက်ကုန်တယ်။ ရှေ့တခေါက်က လေယာဉ်နဲ့ လာပစ်တုန်းကဆိုရင် ထွက်ပြေးရတယ်၊ အခုအိမ်ပြန်လာတာ ၄ လပဲ ရှိသေးတယ်”ဟု သီပေါမြို့နယ် ကွန်စံလိတ်ရွာဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
TNLA တပ်ဖွဲ့ သိမ်းပိုက်ထိန်းချုပ်ထားသည့် နမ္မတူနှင့် နမ့်ဆန်မြို့များသို့ သွားရောက်နိုင်သည့် သီပေါ-နမ္မတူ လမ်းမကြီးပေါ်တွင် စစ်ကောင်စီတပ်ဘက်မှ ယခုကဲ့သို့ မြောင်းတူး၍ လမ်းကြောပိတ်ဆို့လိုက်ခြင်းကြောင့် ဒေသခံများမှာ တိုက်ပွဲပြန်လည်ဖြစ်ပွားမည်ကို စိုးရိမ်နေပြီး မြို့ပေါ်သို့ ထွက်ပြေးတိမ်းရှောင်ရန် မဖြစ်နိုင်တော့ကြောင်း ပြောဆိုသည်။
![](https://burmese.shannews.org/wp-content/uploads/2024/06/signal-2024-06-13-165737_005.jpeg)
“အခုလည်း အဝတ်တွေသိမ်းထားပြီး သတင်းပဲ နားစွင့်နေရတယ်။ ဘယ်သူမဆို တိုက်ပွဲပြန်ဖြစ်တော့မယ် သတိနဲ့နေထားကြလို့ ပြောတာ။ လမ်းပေါ် မြောင်းတူးလိုက်တော့ မြို့ပေါ်ရှောင်လို့လည်း မရတော့ဘူး၊ တောတောင်ထဲပဲ ပြေးရတော့မှာ။ အကုန်လုံးက တိုက်ပွဲထပ်ဖြစ်မှာပဲ စိုးရိမ်ကြတယ်”ဟု သီပေါမြို့နယ်မှ ၎င်းဒေသခံအမျိုးသားက သျှမ်းသံတော်ဆင့်ကို ဆက်ပြောသည်။
ပြီးခဲ့သည့် ၂၀၂၃ ဒီဇင်ဘာလ ၂၉ ရက်ကလည်း သီပေါ-နမ္မတူ ကားလမ်းမကြီးပေါ်ရှိ မိုးတေတံတားကိုလည်း စစ်ကောင်စီတပ်သားများက ဗုံးခွဲဖျက်ဆီးခဲ့ပြီး ကားလမ်းဘေးတလျှောက်တွင်လည်း မြေမြှုပ်မိုင်းများ ထောင်ထားခဲ့ခြင်းကြောင့် ဒေသခံပြည်သူ (၆) ဦးထက်မနည်းနှင့် ကျွဲ၊ နွားများ မိုင်းနင်းမိခဲ့၍ ထိခိုက်ဒဏ်ရာရရှိခဲ့ကြောင်း သိရသည်။
အလားတူ ယမန်နေ့ (ဇွန်လ ၁၂ ရက်) ညနေပိုင်းကလည်း လားရှိုးမြို့နယ်အတွင်း မိုင်းယော်တိုက်နယ်ရှိ ကောင်းဟုန်းကျေးရွာတွင်လည်း လမ်းမကြီးပေါ် စစ်ကောင်စီတပ်က မြောင်းတူးဖော်ကာ လမ်းကြောပိတ်ဆို့လိုက်ခြင်းကြောင့် ကားအများအပြား ပိတ်မိနေကြောင်း လားရှိုးဒေသခံများက ပြောသည်။