ကရင်နီပြည်(ကယားပြည်နယ်) လွိုင်ကော်မြို့သို့ ခေတ္တပြန်သည့် စစ်ရှောင်များကို လမ်းတွင် စစ်ကောင်စီမှ ဆန်အိတ်ပါလာလျှင် စစ်ဆေးမေးမြန်းမှုများပြုလုပ်ကြောင်းစုံစမ်းသိရှိရသည်။
“လမ်းမှာ ကိုယ်စားဖို့ ဆန်အိတ်ပါရင်တောင်ရစ်တာပါ၊ ကိုယ်အိမ်နဲ့ကိုယ်နေမယ့်သူတွေကတော့ ပြန်ကြတာပေါ့၊ ဒါပေမယ့် ဘာအလုပ် ဘာဝင်ငွေမှမရှိတဲ့အတွက် ဒုက္ခရောက်ပါလိမ့်မယ်၊ ကျမတို့အိမ်ကတော့ ၁၅ ရက်လောက် ပြန်နေခဲ့ပြီးတော့ ညောင်ရွှေကိုပဲပြန်ရောက်လာတာပါ” ဟု ညောင်ရွှေမြို့တွင် စစ်ဘေးရှောင်နေသည့် အမျိုးသမီးတစ်ဦးကပြောသည်။
ယခုအချိန်တွင် ကုန်စည်ပစ္စည်းများလည်း ဝင်ရောက်နိုင်ရန်ခက်ခဲသည့်အတွက် စားသောက်ကုန်များ ဈေးနှုန်းမြင့်တက်လျက်ရှိနေပြီး ခရမ်းချဉ်သီး တစ်ပိဿာလျှင် ၈၀၀၀ ထောင်ကျပ်အထိရောက်ရှိနေကြောင်း အထက်ပါအမျိုးသမီးကဆက်ပြောသည်။
ထိုအပြင် မြို့တွင်း၌ လည်း သူခိုးများလည်း များပြားနေပြီး မှောင်ခိုဈေးကွက်များပါရှိနေကြောင်း သိရသည်။
“မှောင်ခိုဈေးကွက်ကတော့ ရှယ်ပဲ၊ သူခိုးတွေ အရမ်းအလုပ်ဖြစ်ပါတယ် တစ်ယောက်အိပ် ဒန်းလော့တွေဆို ၃ သောင်း၊ နှစ်ယောက်အိပ်တွေမှာ ၈ သောင်း ၉ သောင်း၊ ဘာလိုလိုအကုန်ရတယ်၊ အထည်တွေဆိုရင်လည်း တစ်ထည်် ၅၀၀၊ ၁၀၀၀ အိုးခွက်တွေလည်း ၁၀၀၀၊ ၂၀၀၀ပဲ အသီးအရွက်ကတော့ အရမ်းရှားတယ်” ဟု သူမက ဆက်ပြောသည်။
လက်ရှိတွင် လျှပ်စစ်မီးရနေသော်လည်း အင်တာနက်လိုင်းများ ပြတ်တောက်နေပြီး ပြန်နေထိုင်ရန် မသင့်သေးကြောင်း သူမကဆက်ပြောသည်။
စစ်ကောင်စီမှ ၎င်းတို ခြေကုတ်ရယူထားတော့ စစ်စခန်းများကို လက်မလွတ်စေရေးအတွက် အပြင်းအထန် ကြိုးစားနေပြီး နည်းအမျိုးမျိုးဖြင့် ကာကွယ်ထိုးစစ်ဆင်လျက်ရှိကြောင်း သိရသည်။
စစ်ကောင်စီ၏ စစ်ကြောင်းအလုံးအရင်း အင်အားဖြည့်မှုကြောင့် သျှမ်းတောင် ဆီဆိုင်မြို့နှင့် ကရင်နီပြည် လွိုင်လင်လေးကျေးရွာများတွင် စစ်ရေး ထိတွေ့မှုရှိလာနိုင်သဖြင့် ပြည်သူများ သတိဖြင့်နေထိုင်ကြရန်လည်း JOBS For Kayah မှ တာဝန်ရှိသူက ပြောကြားထားသည်။
လက်ရှိတွင် ကရင်နီပြည်မှ သျှမ်းပြည်တွင်းသို့ စစ်ဘေးရှောင်လာသူ (၆၀၀၀၀) ဝန်းကျင်ရှိလာပြီဖြစ်ကြောင်း သိရသည်။
အလုပ်သင် သတင်းထောက် ယူဂျင်း ရေးသားသည်။
Leave a Comments