ရန်ကုန်တိုင်းရှိ သန်လျင်တံတား အမှတ်(၃) ဖွင့်ပွဲကို ၁၀၇ မမ ရှော့တိုက်ဒုံးများဖြင့် ပစ်ခတ် တိုက်ခိုက်ရန်ကြံစဉ်သည့် ရန်ကုန် UG အဖွဲ့ဝင်များအား ဇွန်လ ၈ ရက်၊ နံနက်ပိုင်းက ဒဂုံမြို့သစ် (ဆိပ်ကမ်း) မြို့နယ်၊ (၆၁)ရပ်ကွက်၊ သင်္ဘောကျင်းဝန်ထမ်းအိမ်ယာဝန်းအတွင်း၊ သစ်သားလိုင်းခန်း အဟောင်း၌ ဖမ်းမိကြောင်း စစ်ကောင်စီက ယမန်နေ့ (ဇွန်လ ၁၀ ရက်နေ့) ညပိုင်းတွင် ထုတ်ပြန်ကြေညာသည်။
အဆိုပါ သန်လျင်တံတားဖွင့်ပွဲ အခမ်းအနားသို့ စစ်ခေါင်းဆောင် မင်းအောင်လှိုင်နှင့် တကွ စစ်ကောင်စီ ခေါင်းဆောင်များ တက်ရောက်ခဲ့ကြရာ ရှော့တိုက်ဒုံးဖြင့် ပစ်ခတ်ရန် ကြံစည်မှုသည် စစ်ခေါင်းဆောင် မင်းအောင်လှိုင်နှင့် တကွ စစ်ကောင်စီ ခေါင်းဆောင်များကို ရည်ရွယ်သည်ဟု အဓိပ္ပါယ် ကောက်ယူနိုင်သည်။
စစ်ကောင်စီ၏ ထုတ်ပြန်ချက်တွင် ရန်ကုန် UG အဖွဲ့ဝင်များဖြစ်သည့် စိန်ကြီး(ခ)အောင်ထွေး(၂၆)နှစ်၊ ချိုကြီး(ခ) ဟိန်းထက်အောင်(၁၈) နှစ်၊ မင်းသူ (၃၀) နှစ်၊ မောင်ဟိန်း(၂၄)နှစ်၊ အောင်သူရထွန်း (၂၅)နှစ်၊ ပြည့်ဖြိုးဇော်(၁၈)နှစ်နှင့် ထက်အာကာလင်း(၂၆)နှစ်တို့ ၇ ဦးအား ၁၀၇ မမ ရှော့တိုက်ဒုံး ၂ လုံး၊ ဖြူးစ် ၂ ခု၊ လက်ပစ်ဗုံး ၂ လုံး၊ ဘတ္ထရီအိုး ၂ လုံး၊ ဝါယာကြိုးခွေ ၄ ခွေ၊ အခြားဆက်စပ်ပစ္စည်းများနှင့်အတူ ဖမ်းဆီးရမိခဲ့သည်ဟု ဆိုသည်။
၎င်းတို့၏ ထွက်ဆိုချက်အရ ဇွန်လ ၉ ရက်၊ မနက်ပိုင်းတွင် ပူးပေါင်း ကြံစည်သူများဖြစ်သည့် ချစ်ကေခိုင် (၃၈) နှစ်နှင့် ဇာနည်အောင်(ခ)ကိုဇာ (၃၂)နှစ်အား ဒဂုံမြို့သစ် (တောင်ပိုင်း) မြို့နယ်နေအိမ်မှ၁၀၇ မမ ရှော့တိုက်ဒုံး ၁ လုံး၊ ဖြူးစ်တစ်ခုတို့ဖြင့် ထပ်မံ ဖမ်းဆီးရမိခဲ့ကြောင်း ထုတ်ပြန်ချက်တွင် ဖော်ပြသည်။
ထို့အပြင် Brigate Drone Force-PDF အဖွဲ့ဝင် အာကာမင်း မှ ဧပြီလ တတိယပတ်တွင် Instagram မှတစ်ဆင့် ရှော့တိုက်ဒုံး ချိန်ရွယ် ပစ်ခတ်နည်းများ သင်ကြားပေးခဲ့ကြောင်း၊ မေလ ၁၉ ရက်တွင် ရန်ကုန် UG အဖွဲ့ဝင် ဖြူနှင်းအေး(ခ)မီးအိမ်ရှင် မှ စိန်ကြီး(ခ)အောင်ထွေး အား ဆက်သွယ်၍ ၁၀၇ မမ ရှော့တိုက်ဒုံးသီး ၃ လုံးနှင့် လက်ပစ်ဗုံး ၂ လုံးတို့အား ပို့ဆောင်ပေးခဲ့သဖြင့် ပုဇွန်တောင် မြို့နယ်၊ Ocean Center အနီးရှိ သွားရောက်ယူဆောင်ခဲ့ပြီး သိမ်းဆည်းထားခဲ့ကြောင်း ဖော်ပြသည်။
ရှော့တိုက်ဒုံး ပစ်ခတ်မည့် နေရာအား ဒဂုံဆိပ်ကမ်းမြို့နယ်၊ ဆိပ်ကမ်းသာလမ်း အောက်ဘက် “ဘုရင်ကြီး” သဲကျောက်ရောင်း ဝယ်ရေးလုပ်ငန်း အရှေ့ဘက် မီတာ ၁၀၀၀ ခန့်အကွာ သဲကွင်းပြင်နေရာကို ရွေးချယ် သတ်မှတ်ခဲ့ပြီး ဇွန်လ ၈ ရက် တံတားဖွင့်ပွဲအခမ်းအနားကျင်းပမည့်အချိန်တွင် ပစ်ခတ် ဖောက်ခွဲရန် စီစဉ်ခဲ့ကြကြောင်း စစ်ကောင်စီက စွပ်စွဲထားသည်။
ယင်းကိစ္စနှင့် ပတ်သက်၍ ရန်ကုန်တိုင်း အတွင်း လှုပ်ရှားနေသည့် ရန်ကုန်မြို့ပြ ပြောက်ကျားတပ်ဖွဲ့များက တစ်စုံတစ်ရာ ထုတ်ပြန် တုန့်ပြန်ခြင်း မရှိသေးပေ။
ယမန်နေ့က သန်လျင်တံတား ဖွင့်ပွဲ တက်ရောက်ပြီးနောက် စစ်ခေါင်းဆောင် မင်းအောင်လှိုင်သည် ရန်ကုန်တိုင်း စစ်ကောင်စီနှင့် တွေံဆုံခဲ့ရာ ရန်ကုန်တိုင်း အတွင်း တော်လှန်တိုက်ခိုက်မှုများ အငွေ့အသက်ပါ မကျန် ရှင်းလင်းရန် ပြောဆိုခဲ့ကြောင်း စစ်ကောင်စီက ထုတ်ပြန်ထားသည်။
Leave a Comments