သျှမ်းပြည် ရွာငံရှိ စစ်ကောင်စီ တပ်များက ကျေးရွာများတွင် စစ်ကြောင်းထိုးပြီး ပြည်သူများကို ရိုက်နှက်ခြင်းများ ပြုလုပ်ခဲ့ကြောင်း သတင်းရရှိသည်။
သျှမ်းပြည် တောင်ပိုင်း၊ ရွာငံမြို့နယ် အရှေ့ဘက်ရှိ ကျေးရွာများကို စစ်ကောင်စီက ပြီးခဲ့သည့် ဇွန်လ ၇ ရက်တွင် ဒေသခံတစ်ဦးမှပြည်သူ့ကာကွယ်ရေးတပ်ဖွဲ့ (PDF)များ တောတောင်ဘက်တွင် ရှိနေသည်ဟု စစ်ကောင်စီကို သတင်းပေးခဲ့သည်။
ထို့ကြောင့် စစ်ကောင်စီ အင်အား ၅၀ ခန့်ဖြင့် စစ်ကြောင်းထိုး ဝင်ရောက်ခဲ့ပြီး ဒေသခံပြည်သူများကို ရိုက်နှက်စစ်ဆေးမှုများ ပြုလုပ်ခဲ့ကြောင်း သတင်းအရင်းမြစ်မှ သျှမ်းသံတော်ဆင့်ကို ပြောသည်။
“ တောြခံမှာက လဖက်တွေ ပိုစိုက်ထားတယ်။ မိုးတွင်းဆိုတော့ လဖက်တွေကလဲ နုနေတော့ ကျနော်လည်း တောခြံမှာ လဖက်ခူးနေလိုက်တယ်။ စစ်သားတွေက ရောက်လာပြီး သေနတ်ဒင်နဲ့ ဆောင့်လိုက် ကန်လိုက်လုပ်သွားကြတယ်. ကျနော်က နှစ်ချက် ချုပ်လိုက်ရတယ်၊၊” ဟုဒေသခံတစ်ဦးက ဆိုသည်။
ထိုသို့ရိုက်နှက်ခံသော အမျိုးသားသည် တောင်ပေါ်ခြံသို့ လဖက်ခူးသွားနေစဉ်တွင် စစ်ကောင်စီမှ ရိုက်နှက်ခဲ့ကြောင်း သိရသည်။
အလားတူ ဒေသခံရွာသား (၅)ဦးကိုလည်း ရိုက်နှက် စစ်ဆေးမှုများပြုလုပ်ခဲ့ပြီး ဒဏ်ရာရှိသူများသည် ဆေးကုသမှု ခံယူနေရကြောင်း သိရသည်။
လက်ရှိမှာ ကျေးရွာတွင် ရွာသူကြီးမရှိသည့်အပြင်း၊ ရွာသူကြီးအဖြစ်မှ နှုတ်ထွက်ခြင်းကို သိရှိပြီး ပျူစောထီး နှင့် စစ်ကောင်စီတပ်ဖွဲ့က မကြာခဏ ကျေးရွာအတွင်းသို့ ဝင်ရောက်စစ်ဆေးနေကြောင်း ဒေသခံ အမျိုးသမီးတစ်ဦးက သျှမ်းသံတော်ဆင့်ကို ဆက်ပြောသည်။
“ခုကရွာမှာ ပျူစောထီးတွေက သူတို့ စိတ်ကြိုက် ခြယ်လှယ်နေကြတယ်။ ရွာကို စစ်သားတွေ ခဏခဏ လာပြီး လာစစ်ဆေးတယ်၊၊ ရွာကလူတွေကိုလည်း လာဖမ်းတယ်။ နေ့တိုင်းက တောခြံတောင် သိပ်မသွားရဲတော့ဘူး။ တောခြံသွားရင်(PDF) နဲ့သွားတွေ့တယ် ဆိုပြီး အရိုက်ခံရမှာစိုးလို့” ဟု ဒေသခံ အမျိုးသမီးတစ်ဦးကဆိုသည်။
ထို့အပြင် ဒေသခံပြည်သူများသည် စိုးရိမ်မှုများဖြင့် နေထိုင်နေကြရပြီး တောခြံသို့ လဖက်သွားခူရန် စိုးရိမ်နေရကြောင်း သိရသည်။လက်ရှိ ရွာငံမြို့နယ်တွင် စစ်ကောင်စီမှ ကျေးရွာများတွင် တပ်စွဲထားလျက်ရှိပြီး စစ်မှုထမ်းရန်အတွက် အတင်းဖိအားပေးလုပ်ဆောင်နေကြောင်းသိရသည်။
အလုပ်သင် သတင်းထောက် နန်းလရောင် ရေးသားသည်။
Leave a Comments