စစ်ကောင်စီမှ ပုဂ္ဂလိက ဘဏ်များကို ထိန်းချုပ်မှု ပြုလုပ်မည်ဟုဆိုသော သတင်းသည် ယနေ့ (ဇွန် ၄)ရက်တွင် လူမှုကွန်ရက်စာမျက်နှာတွင် ပျံ့နှံ့နေပြီး ဘဏ်၌ ငွေစုထားသူများ စိုးရိမ်မှု မြင့်တက်နေကြောင်း စုံစမ်းသိရသည်။
စစ်ကောင်စီမှ ဇွန်လ ၂ရက်နေ့တွင် ရွှေဆိုင်ပိုင်ရှင်(၂၁)ဦးကို ရွှေစျေးနှုန်း မတည်မငြိမ် ဖြစ်အောင် လုပ်ဆောင်နေသည် ဟုဆိုကာ ဖမ်းဝရမ်းထုတ်ခဲ့ပြီးနောက် ပုဂ္ဂလိကဘဏ်များကိုလည်း စစ်ကောင်စီမှ ထိန်းချုပ်မည်ဆိုသည် သတင်းထပ်မံ ထွက်ပေါ်လာခဲ့သည်။
စစ်ကောင်စီ ထိန်းချုပ်မည့် ပုဂ္ဂလိက ဘဏ်များမှာ ကမ္ဘောဇဘဏ်၊ ဧရာဝတီဘဏ်၊ ရိုးမဘဏ်၊ CB ဘဏ်နှင့် A ဘဏ်တို့ ဖြစ်ပြီး၊ ထိုဘဏ်များတွင် ငွေစုထားသည့် ပြည်သူများအနေဖြင့် ငွေတန်ဖိုးကျဆင်းကာ ငွေများဆုံးရှုံးသွားခြင်း၊ စစ်ကောင်စီမှ သိမ်းဆည်းသွားမည်ကို စိုးရိမ်နေကြကြောင်း ငွေစုထားသူများက သျှမ်းသံတော်ဆင့်ကိုပြောသည်။
“ ဒီနေ့ ဘဏ်သတင်းကြားတော့ စိတ်တော့ပူတာပေါ့။ ဘဏ်ဘက်က တရားဝင်ပြောဆိုတာမရှိသေး ပေမယ့် တခါတလေ ကောလဟာလ က မှန်တက်တယ်လေ။ စစ်ကောင်စီက သူလုပ်ချင်တာလုပ်နေတာပဲ။ ငွေကတော့မများပေမယ့် ပြည်သူတွေ ဘဝက ဒီထက်ခက်ခဲလာနိုင်တယ်” ဟု တောင်ကြီး ကမ္ဘောဇ ဘဏ်တွင် ငွေစုထားသည့် အမျိုးသမီး တစ်ဦးက ဆိုသည်။
ထိုသို့ ဘဏ်များကို ထိန်းချုပ်ပိတ်သိမ်းလိုက်လျှင် ပြည်သူများ စားဝတ်နေရေး စီးပွားရေးသည် ယခင်ကထက် ပိုမိုခက်ခဲလာနိုင်ကြောင်းလည်း တောင်ကြီးမြို့ နေ အမျိုးသမီးတစ်ဦးက ပြောသည်။
“ အခုကာလက ပြည်သူတွေက အဆင်မပြေတဲ့အချိန်၊ ကုန်စျေးနှုန်းတွေလဲ ဆက်တိုက်တက်နေတာ ၊ဒီလိုသာ ဘဏ်တွေကို ထိန်းချုပ်လိုက်ရင်တော့ စားဝတ်နေရေးက ပိုခက်ခဲလာမယ်။ အထူးသဖြင့် ပြည်ပက အလုပ်လုပ်နေတဲ့ သူတွေရဲ့ ငွေကို မှီခိုနေရမယ်ဆို ပြည်တွင်းမှာ ဘဏ်တွေ အခက်ခဲဖြစ်ရင် သူတို့က ပိုပြီး ခက်ခဲစေမယ်။ အစစရာရာ ခက်ခဲသွားမယ်” ဟု ကမ္ဘောဇဘဏ်မှာ ငွေစုထားသည့် အမျိုးသမီး တစ်ဦးက ထပ်လောင်းပြောသည်။
အလားတူ ဧရာဝတီဘဏ်တွင် ငွေစုထားသူတစ်ဦးမှာလည်း ငွေများဆုံးရှုံးသွားလျှင် မိသားစုအတွက် အစစရာရာ ခက်ခဲစေနိုင်ပြီး ကျန်းမာရေးစောင့်ရှောက်မှု နှင့် ပညာရေးပါဆုတ်ယုတ်သွားနိုင်သည်ဟုဆိုသည်။
“ရှာလို့ရသမျှကို ဘဏ်မှာပဲ အများဆုံးအပ်ထားတာ။ ခုလိုသာ စစ်ကောင်စီထိန်းချုပ်ပြီး ဘဏ်တွေကို ခြိမ်းခြောက်လာရင်တော့ ငွေတွေ ပြန်ထုတ်ထားရလိမ့်မယ်။ တိုင်းပြည်တော့ တော်တော်ပျက်စီးသွားနိုင်တယ်။” ဟု ၎င်းအမျိုးသားက ထပ်လောင်းပြောသည်။
စစ်အာဏာသိမ်းပြီးနောက် မြန်မာနိုင်ငံ၏ စီးပွားရေးသည် တရိပ်ရိပ်ကျဆင်းလာပြီး၊ ငွေကြေးဖောင်းပွမှုလည်း အလွန်မြင့်တက်လာသကဲ့သို့ ဘဏ်လုပ်ငန်းကိုလည်း ယုံကြည်မှု လျော့နည်းလာကြကြောင်း မူဆယ်မြို့ စီးပွားရေးလုပ်ငန်းရှင် အမျိုးသမီး တစ်ဦးက ပြောသည်။
“ စစ်အာဏာသိမ်းပြီးနောက်မှာ ဘဏ်ကနေ ငွေတွေပြန်ထုတ်ကြတယ်။ လွန်ခဲ့တဲ့ ၃နှစ်သာ ကာလတုန်းကတော့ ဘဏ်နဲ့ပတ်သက်ပြီး အသံမထွက်ခဲ့ပေမယ့် စိုးရိမ်စိတ်တော့ရှိကြတယ်။ ဒီနေ့လိုလိုင်းပေါ်သတင်းကြောင့် လူတွေက ပိုစိုးရိမ်လာကြတယ်။ အပြင်မှာထုတ်ထားရင်လည်း ဓားပြကြောက်သလို ဘဏ်မှာအပ်ရင်လည်း ပြဿနာဖြစ်မှာကြောက်” ဟု ၎င်းစီးပွားရေးလုပ်ငန်းရှင် အမျိုးသမီးက ဆိုပြန်သည်။
လက်ရှိမြန်မာနိုင်ငံတွင် ငွေကြေးဖောင်းပွမှုများမြင့်တက်လာကာ စားဝတ်နေရေး အဆင်မပြေမှုကို ပြည်သူများ ရင်ဆိုင်နေရပြီး အင်တာနက်လိုင်းများကိုလည်း စစ်ကောင်စီမှ တရုတ်နည်းပညာရှင်များဖြင့် ပူးပေါင်းကာ ထိန်းချုပ်မှုများပြုလုပ်နေလျက်ရှိသည်။
အလုပ်သင် သတင်းထောက် နန်းလရောင် ရေးသားသည်။
Leave a Comments