တပ်မတော် (စစ်တပ်) တွင် ခေါင်းဆောင်မှု ပညာရပ် အလွန်အရေးကြီးပြီး အမိန့်နာခံတတ်မှု၊ စစ်စည်းကမ်း ကောင်းမွန်မှုတို့ ပြည့်စုံသည့် နောက်လိုက်ကောင်းသာ ပြည့်စုံကောင်းမွန်သည့် ခေါင်းဆောင် ဖြစ်လာနိုင်ကြောင်း စစ်ခေါင်းဆောင် မင်းအောင်လှိုင် က ဟောပြောသည်။

မေလ ၂၉ ရက် က ပြင်ဦးလွင်မြို့ တပ်မတော် နည်းပညာ တက္ကသိုလ် နည်းပြအရာရှိများ၊ ကထိကများ၊ ဆရာ၊ ဆရာမများ၊ သန္ဓေအရာရှိများနှင့် ဗိုလ်လောင်းများအား တွေ့ဆုံစဥ် ယင်းသို့ ဟောပြောခဲ့ခြင်း ဖြစ်သည်။

ခေါင်းဆောင်မှုတွင် တစ်ဦးနှင့်တစ်ဦး တူညီမှုမရှိဘဲ ခေါင်းဆောင်မှု ကောင်းမွန်ရန် ကိုယ်တိုင် လေ့ကျင့်ရန်လိုကြောင်း၊ သင်တန်းကာလအတွင်း လေ့ကျင့်သွားပါက စစ်ဘက်ခေါင်းဆောင် ကောင်းများ ဖြစ်မည် ဖြစ်ကြောင်း အာဏာသိမ်းစစ်ခေါင်းဆောင် က ဆိုသည်။

“နိုင်ငံတော် တည်ဆောက်ရေး အတွက် မိမိတို့ အနေဖြင့် ဆောင်ရွက်ရန် များစွာ ရှိနေသေးကြောင်း၊ တိုးတက် ပြောင်းလဲနေသည့် ခေတ်နှင့်အညီ တိုးတက်စေရေးအတွက် အမြဲ ကြိုးပမ်း ဆောင်ရွက်နေရမည်ဖြစ်ကြောင်း” ၎င်းက သတိပေးသည်။

ထို့အပြင် သင်တန်းသားများ အနေဖြင့် မည်သူ တစ်ဦးတစ်ယောက်၏ တိုက်တွန်းချက်မျှ မပါဘဲ စစ်တပ် အတွင်းသို့ မိမိသဘောဆန္ဒ အလျောက် ဝင်ရောက်လာကြသူများ ဖြစ်သည်ဟု စစ်ခေါင်းဆောင်က ထပ်လောင်းပြောကြားသည်။

သို့သော် စစ်တပ် အာဏာသိမ်းမှု ၃ နှစ်ကျော် ကာလ အတွင်း နိုင်ငံရေး၊ စီးပွားရေးနှင့် စစ်ရေး သမိုင်းဝင် ဆုံးရှုံးမှုများစွာ ကြုံတွေ့နေရသဖြင့် စစ်ခေါင်းဆောင် မင်းအောင်လှိုင် သည် စစ်တပ် အတွင်း ထောက်ခံမှု ဆိုးဆိုးရွားရွား ကျဆင်းမှုဖြင့် ကြုံတွေ့နေရကြောင်း တပ်တွင်း သတင်းရင်းမြစ်က မှတ်ချက်ပြုသည်။

“ဘက်စုံ ရှုံးနေတော့ တပ်သားကနေ ဗိုလ်ချုပ်ကြီးတွေ အထိ မကြိုက်တဲ့လူက များတယ်။ ဒါပေမယ့် စစ်တပ်မှာက ပေးတာယူ ကျွေးတာစား ပြန်မပြောနဲ့ ဆိုတာက အသားကျနေပြီ” ဟု ၎င်းကရှင်းပြသည်။

လက်ရှိ စစ်ရေးအရ တိုက်ပွဲများ ပြင်းထန်နေသည့် ကချင်နှင့် ရခိုင်ပြည်နယ်တွင် စစ်တပ် အရေးနိမ့်နေသည့် နည်းတူ ကျပ်ငွေတန်ဖိုး စံချိန်တင် ကျဆင်းနေမှုနှင့် အတူ ပြည်တွင်း စီးပွားရေး ပရမ်းပတာ ဖြစ်နေရာ ကျဆုံးနိုင်ငံ အဖြစ် ဦးတည်နေပြီဟု လေ့လာသူများက သုံးသပ်ထားသည်။