စစ်ကောင်စီ၏ စစ်မှုထမ်းသင်တန်းများတွင် မည်သူတစ်ဦးတစ်ယောက်၏ တိုက်တွန်းချက်မျှမပါရှိဘဲ မိမိသဘောဆန္ဒအလျောက်ဝင်ရောက်လာကြသူများဖြစ်သည်ဟု စစ်ခေါင်းဆောင် ဗိုလ်ချုပ်မင်းအောင်လှိုင်က ပြောဆိုလိုက်သည်။
အဆိုပါ ပြောဆိုမှုသည် ယမန်နေ့ (မေလ ၂၉) ရက်၊ ပြင်ဦးလွင်မြို့တွင် ပြုလုပ်ခဲ့သော သန္ဓေအရာရှိများနှင့် ဗိုလ်လောင်းများအား တွေ့ဆုံပွဲအခမ်းအနား၌ ပြောကြားခဲ့ခြင်းဖြစ်သည်။
“သင်တန်းသားများအနေဖြင့် မည်သူတစ်ဦးတစ်ယောက်၏ တိုက်တွန်းချက်မျှမပါရှိဘဲ တပ်မတော်အတွင်းသို့ မိမိတို့သဘောဆန္ဒအလျောက် ဝင်ရောက်လာကြသူများဖြစ်သည်နှင့်အညီ မိမိကိုယ်ကို အားကိုးသည့်စိတ်ဖြင့် နေထိုင်ကျင့်ကြံဆောင်ရွက်ကြရန်လိုကြောင်း” ဟု ပြောကြားခဲ့သည်။
ထို့အပြင် တပ်မတော်တွင် ခေါင်းဆောင်မှုပညာရပ်သည် အလွန်အရေးကြီးပြီး အမိန့်နာခံတတ်မှု၊ စစ်စည်းကမ်း ကောင်းမွန်မှုတို့ ပြည့်စုံသည့် နောက်လိုင်ကောင်းဖြစ်ခဲ့မှသာလျှင် ခေါင်းဆောင်အဖြစ်သို့ ရောက်ရှိချိန်၌လည်း ပြည့်စုံကောင်းမွန်သည့် ခေါင်းဆောင်တစ်ဦးဖြစ်လာနိုင်မည်ဟု ထပ်လောင်းပြောကြားခဲ့သည်။
သို့သော် စစ်ကောင်စီသည် ဖေဖော်ဝါရီလ ၁၀ ရက်မှစ၍ ပြည်သူ့စစ်မှုထမ်း ဥပဒေကို စတင်အသက်သွင်းပြီးနောက် သင်္ကြန်ရုံးပိတ်ရက်များအပြီး စစ်မှုထမ်းရန်အတွက် လူသစ်စစုမည်ဟု ကြေညာထားသော်လည်း အပတ်စဉ် (၁) စစ်သင်တန်းကို အင်္ကြန်မတိုင်မီကတည်းက စတင်ခဲ့သည်။
ထိုစဉ်က စစ်မှုထမ်းဆင့်ခေါ်ခဲ့ရာ စစ်မှုထမ်းသူနာမည်နှင့် နေရပ်လိပ်စာအတိအကျကို ဆင့်ခေါ်စာပို့ပြီး ခေါ်ယူခြင်း၊ ရပ်ကွက်အသီးသီးတွင် မဲနှိုက်ခိုင်းပြီး မဲပေါက်သူများကို ခေါ်ယူခြင်း ပြလုပ်ခဲ့သည်။
အများစုမှာ စစ်မှုမထမ်းချင်ကြသောကြောင့် ပိုက်ဆံပေးပြီး လူအစားထိုးခဲ့ရာ၌လည်း ကျပ်သိန်း ၁၀၀ အထိပေါက်ဈေး ရှိခဲ့သည်။
ထို့နောက် ပြည်သူ့စစ်မှုထမ်း အမှတ် (၂) အတွက် တပ်သားသစ်ထပ်မံ ကောက်ခံခဲ့ရာတွင် လူနေအိမ်ပေါ်ထိ ပေါ်တာဆွဲယူခဲ့သည်ဟု ပင်လောင်းမြို့ဒေသခံတစ်ဦးက မေလ ၁၅ ရက်က သျှမ်းသံတော်ဆင့်ကိုပြောသည်။
စစ်ကောင်စီသည် စစ်မှုထမ်းသင်တန်းတက်ရောက်ပြီးသူများကို တိုက်ပွဲဖြစ်ပွားရာဒေသ ဟိုပုံး၊ ပင်လောင်းနှင့် ညောင်ရွှေ ရှေ့တန်းသို့ ပို့ဆောင်မှုရှိခဲ့ကြောင်းနှင့် သေဆုံးမှုရှိခဲ့ကြောင်း ဒေသခံများကပြောသည်။
ပြီးခဲ့သည့် ဧပြီလ ၂၇ ရက်တွင် မဲနယ်တောင်ဒေသအတွင်းနေထိုင်သူ အသက် ၃၁ နှစ်အရွယ် ခွန်အောင်ရွှေကို စစ်သင်တန်းပေးခြင်းမရှိဘဲ ရှေ့တန်းသို့ပို့ဆောင်ခဲ့ရာ ထမ်းယမ်းတိုက်ပွဲ၌ သေနတ်ထိမှန်ပြီး သေဆုံးသွားသည်။
ကျောက်တလုံးကြီးမြို့ နောင်လုံရပ်ကွက်နေ အသက် ၂၅ နှစ် ခွန်မောင်ပိုးသည်လည်း စစ်ကောင်စီလက်အောက်ခံ ပြည်သူ့စစ် PNO ခေါ်သည့် ပြည်သူ့စစ်မှုထမ်းတွင် အလှည့်ကျရှေ့တန်းတက်ရစဉ် ဧလပြီလဒုတိယအပတ် တိုက်ပွဲ၌ သေဆုံးသွားခဲ့သည်။
အဆိုပါ သေဆုံးမှုနှင့် ပတ်သက်၍ စစ်ကောင်စီဘက်မှ လျော်ကြေးပေးအပ်ခြင်းမရှိခဲ့သကဲ့သို့ တိုက်ပွဲအတွင်း သေဆုံးသွားသည့် အချို့အလောင်းများကိုလည်း ပြန်မရကာ မိသားစုဝင်များက ရက်လည်ဆွမ်း ပြုလုပ်ပေးခဲ့ရသည်။
ပြည်သူ့စစ်မှုထမ်း ဥပဒေထုတ်ပြီး သုံးလေကျော်အတွင်း ထိုင်းနိုင်ငံသို့ ထွက်ပြေးလာသည့် မြန်မာနိုင်ငံသားထဲမှ အထောက်အထားမရှိသူ ၃,၆၀၀ နီးပါး ဖမ်းဆီးခံနေရကြောင်း သိရသည်။
Leave a Comments