ကျားဖြန့် ငွေလိမ်ဂိုဏ်းများထံမှ လဘ်စားမှုဖြင့် ထောင်ချခံထားရသည့် ကာကွယ်ရေးဒုဝန်ကြီး ဗိုလ်ချုပ်အောင်လင်းထွန်း နေရာတွင် ဗိုလ်ချုပ်ကိုလေး ကို အစားထိုး ခန့်အပ်လိုက်သည်ဟု စစ်ကောင်စီက ယမန်နေ့ (မေလ ၂၈ ရက်) ညပိုင်းတွင် ကြေညာသည်။
၂၀၂၁ မတ်လတွင် ကာကွယ်ရေး ဒုဝန်ကြီးဖြစ်လာသူ ဗိုလ်ချုပ်အောင်လင်းထွန်း သည် တရုတ် ဖိအားကြောင့် ယခုနှစ် မတ်လ အတွင်းက ဖမ်းဆီးခံခဲ့ရပြီးနောက် ထောင်ဒဏ် ၁၀ နှစ် ချမှတ်ခံထားရကာ ပိုင်ဆိုင်မှုများ ချိတ်ပိတ် သိမ်းဆည်းခံထားရကြောင်း စစ်ရေးသတင်းရင်းမြစ်က ဆိုသည်။
ယခု ကာကွယ်ရေး ဒုဝန်ကြီး ဖြစ်လာသူ ဗိုလ်ချုပ်ကိုလေး သည် ဒုတပ်မတော် လေ့ကျင့်ရေး အရာရှိချုပ် ဖြစ်ပြီး စစ်အာဏာမသိမ်းမီ ၂၀၂၁ ပြည့်နှစ်၊ ဇန်နဝါရီလ ၄ ရက်နေ့က သမ္မတဦးဝင်းမြင့် ဇေယျကျော်ထင်ဘွဲ့ ချီးမြှင့်ခဲ့သူ ဖြစ်သည်။
ဗိုလ်ချုပ်ကိုလေးသည် စစ်တက္ကသိုလ် အပတ်စဉ် (၂၇) ဆင်းဖြစ်ပြီး ရာထူးမှ ဖြုတ်ချခံသူ ဗိုလ်ချုပ်အောင်လင်းထွန်း သည် စစ်တက္ကသိုလ် အပတ်စဉ် (၃၃) ဆင်းဖြစ်သည်။
ပြီးခဲ့သည့် ရက်ပိုင်းကလည်း စစ်ကောင်စီသည် ဝါရင့် စီးပွားရေး ဝန်ကြီး ဦးအောင်နိုင်ဦးနှင့် သက်တော်ရှည် ဒုဝန်ကြီး ဦးမောင်မောင်ဝင်း တို့ကို အနားပေးခဲ့သေးသည်။
ထို့အပြင် စစ်ကောင်စီသည် ယခုရက်ပိုင်း အတွင်း နေပြည်တော်တိုင်းမှူး ဗိုလ်ချုပ်စောသန်းလှိုင် ကို အရန်အင်အား ပို့ပြီး ကမ်းရိုးတန်းတိုင်း စစ်ဌာနချုပ် တိုင်းမှူး ဗိုလ်ချုပ်စိုးမင်း (DSA-39) ကို အစားထိုး ခန့်အပ်ကာ ကမ်းရိုးတန်းစစ်တိုင်း တိုင်းမှူးသစ် အဖြစ် နေပြည်တော် စစ်ရုံးမှ ဗိုလ်မှူးချုပ်ပြည့်စုံလင်း (DSA-40) ကို အစားထိုး ခန့်အပ်ခဲ့သေးသည်။
Leave a Comments