စစ်ကောင်စီ အခြေစိုက်ရာ နေပြည်တော်တိုင်း စစ်ဌာနချုပ် တိုင်းမှူး အပါအဝင် အရေးကြီးနေရာများကို ကိုင်တွယ်ရသည့် တပ်မှူး တချို့ကို အရန်အင်အားပို့ပြီး အစားထိုးခန့်အပ်ခဲ့ကြောင်း စစ်ရေးသတင်းရင်းမြစ်က ယနေ့ (မေလ ၂၈ ရက်) တွင် ပြောသည်။

စစ်ကောင်စီသည် နေပြည်တော်တိုင်းမှူး ဗိုလ်ချုပ်စောသန်းလှိုင် ကို အရန်အင်အား ပို့လိုက်ပြီး ကမ်းရိုးတန်းတိုင်း စစ်ဌာနချုပ် တိုင်းမှူး ဗိုလ်ချုပ်စိုးမင်း (DSA-39) ကို အစားထိုး ခန့်အပ်ကာ ကမ်းရိုးတန်းစစ်တိုင်း တိုင်းမှူးသစ် အဖြစ် နေပြည်တော် စစ်ရုံးမှ ဗိုလ်မှူးချုပ်ပြည့်စုံလင်း (DSA-40) ကို အစားထိုး ခန့်အပ်ခဲ့ကြောင်း ဆိုသည်။

ထို့အပြင် အမြောက်တပ်ဖွဲ့ ညွှန်ကြားရေးမှူးသစ် အဖြစ် အမှတ် (၉၀၉) အမြောက်စစ်ဆင်ရေး ကွက်ကဲရေးမှူး ဗိုလ်မှူးချုပ် ထင်ကျော်စိုး (DSA-33)၊ သံချပ်ကာ ယန္တရားတပ်ဖွဲ့ ညွှန်ကြားရေးမှူးသစ် အဖြစ် ဗိုလ်မှူးချုပ်ထူးမြတ်တိုး (DSA-34)၊ ဆက်သွယ်ရေးတပ် ညွှန်ကြားရေးမှူးသစ် အဖြစ် ပြင်ဦးလွင် တပ်မတော် အီလက်ထရောနစ် ဆက်သွယ်ရေးကျောင်းအုပ် ဗိုလ်မှူးချုပ်ရဲမြင့်နိုင် (OTS-79) ကို အစားထိုး ခန့်အပ်ခဲ့သည်ဟု စစ်ရေး သတင်းရင်းမြစ်က ပြောဆိုသည်။

“အသက်အရွယ်ရလာတဲ့ လူတွေကို အရန်အင်အားပို့ပြီး ငယ်ရွယ်တဲ့လူတွေနဲ့ အစားထိုးတယ်လို့တော့ သိရပါတယ်၊ စစ်ဆင်ရေးတွေ အတွက် အရေးကြီးနေရာတွေပါ” ဟု စစ်ရေးသတင်းရင်းမြစ်က ရှင်းပြသည်။

နိုင်ငံတ၀ှမ်း စစ်ရှုံးနေသည့် စစ်ကောင်စီသည် အရေးကြီးသည့် စစ်ဖက်ဆိုင်ရာ ရာထူးများအား မကြာခဏ အပြောင်းအလဲ လုပ်လေ့ရှိရာ နေပြည်တော် တိုင်းမှူး ရာထူးသည့် အပြောင်းအလဲ အများဆုံး ဖြစ်ခဲ့ပြီး ၃ နှစ်ကျော် ကာလအတွင်း ၄ ကြိမ် ပြောင်းလဲခဲ့ခြင်း ဖြစ်သည်။

လက်ရှိ ကချင်ပြည်နယ်၊ ချင်းပြည်နယ် အပါအဝင် နိုင်ငံတဝှမ်း တိုက်ပွဲများ ပြင်းထန်နေပြီး မြို့ကြီးများ အပါအဝင် မြို့ပေါင်း ၅၀ ကျော်ကို တော်လှန်ရေးတပ်များက သိမ်းယူထားချိန်တွင် စစ်ကောင်စီက ယခုကဲ့သို့ အရေးကြီး စစ်ရာထူးများ မကြာခဏ အပြောင်းအလဲ ပြုလုပ်နေခြင်း ဖြစ်သည်။