သျှမ်းပြည် အောင်ပန်းမြို့တွင် ဒုတိယအကြိမ် မီးလုံးပြုလုပ်ရန်ယမ်းထောင်းရာမှ မတော်တဆ ပေါက်ကွဲမှုကြောင့် ဒဏ်ရာအပြင်းအထန်ရရှိခဲ့သည့် အမျိုးသား ၂ ဦးထဲမှ ၁ ဦးသေဆုံးကြောင်း သိရသည်။
သျှမ်းပြည် အောင်ပန်းမြို့ အမှတ် (၃) ရပ်ကွက် နယ်မြေ (၉) တွင် ပြီးခဲ့သည့် မေလ ၂၅ ရက် ညနေတွင် မီးလုံးပြုလုပ်ရန် ယမ်းထောင်းရာမှ မတော်တဆကြောင့် ပေါက်ကွဲမှုဖြစ်ပွားပြီး အမျိုးသားနှစ်ဦး ဒဏ်ရာအပြင်းအထန်ရရှိခဲ့ရာ ထိုထဲမှ တစ်ဦးသည် သေဆုံးသွားကြောင်း အောင်ပန်းမြို့ ဒေသခံ အမျိုးသားတစ်ဦး က သျှမ်းသံတော်ဆင့်ကို ပြောသည်။
ထို အပြင်းအထန် ဒဏ်ရာရရှိခဲ့သော အမျိုးသား ၂ ဦးကို တောင်ကြီး စဝ်စံထွန်းဆေးရုံသို့ ပို့ဆောင်ခဲ့ပြီး၊ ယမန်နေ့ (မေလ ၂၆) ရက်တွင် အမျိုးသားတစ်ဦး သေဆုံးခဲ့ကြောင်း ၎င်း က ပြောသည်။
“ယမ်းထောင်ပြီး မီးလောင်သွားတာကတော့ အဲ့တစ်အိမ်ပဲလောင်သွားတာ။သျှမ်းတောင်ဘက်မှာ မီးလုံးပွဲတွေရှိနေတော့ ယမ်းတွေထောင်းကြတာပေါ့။အသက် ၅၄ နှစ် ဆိုတဲ့တစ်ယောက်ကတော့ မနေ့က ဆုံးသွားတယ်။ ၁၉ နှစ်ကလေးကတော့ အခြေနေမကောင်းဘူး။”ဟု အောင်ပန်းမြို့ ဒေသခံအမျိုးသား တစ်ဦးက ပြောသည်။
လက်ရှိတွင် သက်ဆိုင်ရာများမှ ယမ်းထောင်းခြင်းကို မြို့ထဲတွင် မထောင်းရန် ပြောဆိုထားပြီး မြို့ပြင်တွင် ပြုလုပ်ရန် ပြောဆိုမှုများရှိနေကြောင်း ၎င်းက ဆက်ပြောသည်။
ယင်း မီးလုံးခေါ် ပအိုဝ်းဘာသာ နှင့် လုဖုဲင် ဒုံးပြိုင်ပွဲသည် တောင်ကြီးမြို့ ဝန်းကျင်ရှိ ရွာတိုင်းလိုလိုပင် ကျင်းပသည့် ရိုးရာပြိုင်ပွဲတစ်ခုဖြစ်ပြီး တောင်ကြီးမြို့မြောက်ဘက် ပေါမူရွာပြိုင်ပွဲသည် အကြီးဆုံးဖြစ်ကြောင်း သိရသည်။
ပြီးခဲ့သည့် မေလ ၁၃ ရက်တွင်လည်း အောင်ပန်းမြို့ မင်္ဂလာရပ်ကွက်တွင် ရိုးရာပွဲ အတွက် မီးလုံးပြုလုပ်ရန် ယမ်းထောင်ရာမှ မတော်တဆ ပေါက်ကွဲမှုကြောင့် အမျိုးသား ၂ ဦးသေဆုံးခဲ့ပြီး ၁ ဦးအပြင်းအထန်ဒဏ်ရာရရှိခဲ့ကြောင်းသိရသည်။
Leave a Comments