ထောင်ချခံထားရသည့် သျှမ်းပြည်၊ တောင်ကြီးမြို့ အအခြေစိုက် အရှေ့ပိုင်းတိုင်း စစ်ဌာနချုပ် တိုင်းမှူးဟောင်း ဗိုလ်ချုပ်လှမိုး အပါအဝင် စစ်ဗိုလ်ချုပ် ၅ ဦး၏ ပိုင်ဆိုင်မှုများကို စစ်ကောင်စီက ချိတ်ပိတ် သိမ်းဆည်းလိုက်သည်ဟု စစ်ရေးသတင်းရင်းမြစ်က ယနေ့ (မေလ ၂၅ ရက်) တွင် ပြောသည်။

တရုတ်နိုင်ငံ၊ ကူမင်းမြို့ ၌ မေလ ၁၄ ရက်နှင့် ၁၅ ရက်နေ့က ပြုလုပ်သည့် (၅) ကြိမ်မြောက် ဟိုင်ဂင် ဆွေးနွေးပွဲ အပြီး ကျားဖြန့် ခေါင်းစဥ်ဖြင့် ဖမ်းဆီးထားသည့် စစ်ဗိုလ်ချုပ် ၅ ဦးကို နှစ်ရှည်ထောင်ဒဏ်များ ချမှတ်ကာ ယခု ပိုင်ဆိုင်မှုများကို စစ်ကောင်စီက ချိတ်ပိတ် သိမ်းဆည်းခဲ့ခြင်း ဖြစ်သည်။

“ပိုင်ဆိုင်မှုတွေ ချိတ်ပိတ်သိမ်းဆည်းဖို့ အမိန့်ချထားပါတယ်။ ဘာတွေသိမ်းလဲ ဆိုတာတော့ သေသေချာချာ မသိရသေးပါဘူး” ဟု စစ်ရေးသတင်းရင်းမြစ်က ဆိုသည်။

စစ်ကောင်စီသည် တောင်ကြီးမြို့ အခြေစိုက်၊ အရှေ့ပိုင်းတိုင်း စစ်ဌာနချုပ် (ရပခ) တိုင်းမှူး ဗိုလ်ချုပ်လှမိုး၊ ကာကွယ်ရေး ဒုဝန်ကြီး ဗိုလ်ချုပ်အောင်လင်းထွန်း၊ မြောက်ပိုင်းတိုင်း စစ်ဌာနချုပ် (မပခ) တိုင်းမှူး ဗိုလ်ချုပ် စိုးလှိုင်၊ လောက်ကိုင် ဒကစမှူး ဗိုလ်ချုပ်ဇော်မင်း တို့ကို ထောင်ဒဏ် ၁၀ နှစ်စီ ချမှတ်ထားပြီး ဗိုလ်ချုပ်လှမြင့်စိုး ကို ထောင်ဒဏ် ၅ နှစ် ချမှတ်ထားခြင်း ဖြစ်သည်။

“ဗိုလ်ချုပ်လှမိုးရဲ့ ပိုင်ဆိုင်မှုတွေ စာရင်းပြုစုဖို့ ညွှန်ကြားလို့ နေပြည်တော် ပို့ထားပါတယ်” ဟု တောင်ကြီးမြို့ အခြေစိုက် သျှမ်းပြည်နယ် အစိုးရအဖွဲ့ရုံး သတင်းရင်းမြစ်က ဆိုသည်။

တောင်ကြီးမြို့ အခြေစိုက် ရပခ တိုင်းမှူး ဗိုလ်ချုပ်လှမိုး ကို ကျားဖြန့် ခေါင်းစဥ်တပ်၍ ရာထူးမှ ဖြုတ်ချပြီး ပြီးခဲ့သည့် ဇန်နဝါရီလက အရန်အင်အား ပို့ထားရာက ဖမ်းဆီးပြီး ထောင်ဒဏ် ၁၀ နှစ် ချမှတ်ခဲ့ခြင်းဖြစ်သည်။

စစ်တက္ကသိုလ် အပတ်စဥ် (၃၇) ဆင်း ဗိုလ်ချုပ်လှမိုး သည် ပြီးခဲ့သည့် ၂၀၂၃ ခုနှစ်၊ ဒီဇင်ဘာလ ၁၁ ရက်နေ့က ထုတ်ပြန်သည့် အီးယူ၏ ထပ်တိုး ပိတ်ဆို့မှု စာရင်းတွင် ပါဝင်သူဖြစ်ပြီး ကရင်နီပြည် စစ်ဆင်ရေးများ အတွင်း အရပ်သားများ သတ်ဖြတ်မှု ဖြစ်စဥ်များ အတွက် တာဝန်ရှိသူအဖြစ် စွပ်စွဲခံထားရသူ ဖြစ်သည်။

လက်ရှိ ရပခ တိုင်းမှူး အဖြစ် စစ်ခေါင်းဆောင် မင်းအောင်လှိုင် ၏ လူရင်းဖြစ်သူ နိုင်ငံတော် ကာကွယ်ရေး တက္ကသိုလ် (နေပြည်တော်) ကျောင်းအုပ်ကြီး ဗိုလ်ချုပ်ဇော်မင်းလတ် ကို ခန့်အပ် ထားသည်။

လက်ရှိ ထောင်ချခံထားရသည့် ကာကွယ်ရေး ဒုဝန်ကြီး ဗိုလ်ချုပ်အောင်လင်းထွန်း ကိုမူ ပြီးခဲ့သည့် မတ်လ ဒုတိယပတ်က ကျားဖြန့် ခေါင်းစဥ်ဖြင့်ပင် နေပြည်တော်၌ ဖမ်းဆီးခဲ့ခြင်း ဖြစ်သည်။

၎င်းစစ်ဗိုလ်ချုပ်များ သိမ်းဆည်းခံရသည့် ပိုင်ဆိုင်မှု အသေးစိတ်ကိုမူ မသိရှိရသေးပေ။

ပြီးခဲ့သည့် လပိုင်းက နေပြည်တော်တွင် နေထိုင်သည့် အငြိမ်းစား စစ်ဗိုလ်ချုပ် လယ်ဆည် ဝန်ကြီးဟောင်း ဦးမြင့်လှိုင် ဖမ်းဆီး ခံခဲ့ရပြီးနောက် စစ်ဗိုလ်ချုပ်များနှင့် နာမည်ကျော် စီးပွားရေး လုပ်ငန်းရှင် တစ်ချို့ ခေါ်ယူ စစ်ဆေးခံရသည့် သတင်းများ ဆက်တိုက် ထွက်ပေါ်ခဲ့သေးသည်။