အာဏာသိမ်း စစ်ကောင်စီတပ်ဖွဲ့က တိုင်းနှင့်ပြည်နယ်အသီးသီးတွင် ပြည်သူ့စစ်မှုထမ်းအမှတ်စဉ် (၂) ကို ဆက်လက်ဖွင့်လှစ် ကျင်းပနေပြီး နေအိမ်ပေါ်ထိ ပေါ်တာလာရောက်ဆွဲကြောင်း စုံစမ်းသိရသည်။

အဆိုပါ ပြည်သူ့စစ်မှုထမ်း အမှတ်စဉ် (၂)ကို ဆက်လက်ဖွင့်လှစ်နေကြောင်းလည်း ယနေ့ (မေလ ၁၅ )ရက်တွင် ကြေညာလိုက်သည်။

စစ်မှုထမ်းဥပဒေကို ဖေဖော်ဝါရီ ၁၀ ရက်တွင် စတင်အသက်သွင်းပြီးနောက် သင်္ကြန်ရုံးပိတ်ရက်များအပြီး စစ်မှုထမ်းရန်အတွက် လူသစ်စစုမည်ဟု ကြေညာထားသော်လည်း အပတ်စဉ် (၁) စစ်သင်တန်းကို သင်္ကြန်မတိုင်မီကတည်းက စတင်ခဲ့သည်။

ထိုနောက် ပြည်သူ့စစ်မှုထမ်းအမှတ် (၂) အတွက် တပ်သားသစ်လိုက်လံကောက်ခံခဲ့ရာတွင် လူနေအိမ်ပေါ်ထိ ပေါ်တာဆွဲယူခဲ့သည်ဟု ပင်လောင်းမြို့ဒေသခံတစ်ဦးက သျှမ်းသံတော်ဆင့်ကိုပြောသည်။

“သင်္ကြန်ပြီးတော့ စင်းတောင်းရွာမှာ လူနေအိမ်ပေါ်ထိ ပေါ်တာတက်ဆွဲတာ။ လူငယ်တချို့တွေ ပါသွားတယ်။ တချို့တွေကကြောက်လို့၊ မနေရဲလို့ပြေးကုန်တာ။ အခုလည်းမြို့ပေါ်မှာ တစ်ရပ်ကွက်ကို လူနှစ်ယောက် တောင်းတယ်။ ဘယ်သူမှမသွားချင်လို့ လူငှားဖို့အတွက် တစ်အိမ်ကို ကျပ် ၈ သောင်းထည့်ရတယ်” ဟု ၎င်းကဆိုသည်။ 

လက်ရှိ ပင်လောင်းမြို့နယ်တွင် တော်လှန်ရေးအင်အားစုတပ်ဖွဲ့များနှင့် စစ်ကောင်စီတပ်ဖွဲ့တို့အကြား တိုက်ပွဲဆက်လက်ဖြစ်ပွားနေသောကြောင့် စစ်ကောင်စီသည် ၎င်း၏လက်အောက်ခံ ပြည်သူ့စစ် PNO တပ်ဖွဲ့အား တပ်သားသစ်စုဆောင်းခိုင်းစေပြီး ရှေ့တန်းပို့ဆောင်ခဲ့သည်ဟု သိရသည်။ 

ထိုကဲ့သို့ ရှေ့တန်းသို့ပို့ဆောင်ခဲ့ရာမှာ ဧပြီလ ၂၇ ရက်တွင် မဲနယ်တောင်ဒေသက စစ်သင်တန်းမတက်ဖူးသူ အသက် ၃၁ နှစ်အရွယ် ခွန်အောင်ရွေသည် ထမ့်ယမ်းတိုက်ပွဲ၌ သေနတ်ထိမှန်ပြီးသေဆုံးသွားသည်၊ ကျောက်တလုံးကြီးမြို့ နောင်လုံရပ်ကွက်နေ အသက် ၂၅ နှစ် ခွန်မောင်ပိုးသည်လည်း PNO ခေါ်သည့် ပြည်သူ့စစ်မှုထမ်းတွင် အလှည့်ကျရှေ့တန်းတက်စဉ် ဧပြီလဒုတိယပတ်တွင် တိုက်ပွဲ၌ သေဆုံးသွားခဲ့သည်။

ထို့အပြင် ပြည်သူ့စစ်မှုထမ်း အမှတ် (၂) အတွက် လူသစ်စုဆောင်းမှုများ ပြုလုပ်နေစဉ် စစ်ကောင်စီ၏ အလုပ်သမားဝန်ကြီးဌာနက အမျိုးသားများပြည်ပသို့ တရားဝင်အလုပ်သွားရောက် လုပ်ကိုင်ခွင့်ကို မေလ ၁ ရက်မှစ၍ ယာယီတားမြစ်ပိတ်ပင်လိုက်သည်။

စစ်မှုထမ်းဥပဒေကြောင့် လူငယ်များအပြား တရားဝင်နှင့် တရားမဝင်လမ်းကြောင်း နှစ်ခုစလုံးမှတဆင့် ပြင်ပနိုင်ငံများသို့ ထွက်ခွာနေစဉ် ယခုကဲ့သို့ ထပ်မံပိတ်လိုက်သဖြင့် လူငယ်များတရားမဝင်ထွက်ခွာမှု ပိုတိုးလာနေကြောင်း၊ BACS အစီရင်ခံစာအရ စစ်မှုထမ်းဥပဒေပြဋ္ဌာန်းပြီးနောက် နည်းအမျိုးမျိုးဖြင့် နေရပ်စွန့်ခွာရန် ကြိုးစားနေကြသည့် လူငယ် ၁ သိန်းထက်မနည်းရှိနေကြောင်း ထုတ်ပြန်ထားသည်။