သျှမ်းပြည် ပင်လောင်းမြို့မှ တောင်ကြီးမြို့သို့ သွားသည့် လိုင်းကားများကို စစ်ကောင်စီက ဂိတ်များတွင် ငွေကြေး အတင်းကြပ်တောင်း နေပြီးသဖြင့် ကားသမားများ အခက်အခဲကြုံတွေ့နေရကြောင်း သတင်းရရှိသည်။

သျှမ်းပြည် “၁၁၁၁” စစ်ဆင်ရေး စသည့် နောက်ပိုင် ပင်လောင်းမှ တောင်ကြီးသို့ သွားသည့် လမ်းတကြောတွင် စစ်ကောင်စီနှင့် ရဲသားများအပါအဝင် ဂိတ်များတွင် စစ်ဆေးရေးတင်းကြပ်၍ ငွေအတင်းတောင်းနေကြောင်း ကြုံတွေ့သူ ကားသမား အမျိုးသားတစ်ဦးက သျှမ်းသံတော်ဆင့်ကို ပြောသည်။

“ဂိတ်က ၃ ခုလောက်ရှိတယ်။လူပါလည်းကောက်တယ် မပါလည်း ကောက်တယ်။ စစ်ရှောင်တွေပါရင်လည်း ကောက်တယ်။အောင်ပန်းမှာ စစ်တာပိုကြမ်းတယ်။လွိုင်ကော်လမ်းခွဲနားပေါ့။သူတို့က ၁ သောင်းကနေ ၁ သိန်း ကျော်ထိကောက်တယ်။မလွယ်ဘူး ‌အခုက ပိုက်ဆံနဲ့ လမ်းခင်းနေရသလိုပါပဲ။”ဟု ကြုံတွေ့ခဲ့သူ အမျိုးသားတစ်ဦးက ပြောသည်။

ထိုသို့ ငွေကြေးအဆမတန်တောင်ခံမှုများကြောင့် ကားသမားများ အခက်ခဲကြုံတွေ့နေရပြီး စားဝတ်နေရေးအတွက် ထိခိုက်လာနေကြောင်း ၎င်းက ဆက်ပြောသည်။

“ကျနော်တို့အတွက်က ရှုံးတယ် ပုံမှန်တောင်မရှိဘူး။ ဒီနောက်ပိုင်းထောက်ခံစာ မရှိရင်လည်း မတင်ရဲဘူးလေ။ ရဲလည်းပေးရတယ် ‌ယာဉ်ထိန်းရဲလည်းပေးရတယ်။ တခါတလေ ၁ သိန်းကျော်ထိပေးရတယ် ပုံမှန်မရှိဘူး။ အခုတောင်လူတင်ရင် ၁ ယောက် ၁သောင်းလောက်ပဲရတယ်လေ။ဆီဖိုးကလည်း ဈေးကြီးလာတယ်။ စားဝတ်နေရေးအတွက်ကလည်း ဒါက အဓိကအလုပ်ပဲလေ။”ဟု ကြုံတွေ့ခဲ့သူ အမျိုးသားတစ်ဦးက ပြောသည်။

ပြီးခဲ့သည့် မေလ ၅ ရက်တွင်လည်း ပင်လောင်းမြို့နယ် လုံးပျဉ်ရွာ စစ်ရှောင် လင်မယားနှစ်ဦးသည် ရွာသို့ ဆိုင်ကယ်ဖြင့် ရိက္ခာပြန်ယူစဉ် ရွာမရောက်ခင် ဆိုင်းဘုတ်အနီးတွင် ဆိုင်ကယ်က မိုင်းနင်းမိပြီး ပြင်းထန်စွာ ဒဏ်ရာရရှိခဲ့ကြောင်း သိရသည်။