Sunday, July 14, 2024

မိုးဗြဲ ခမရ (၄၂၂) တိုက်ပွဲ KNDF ဒုတပ်ရင်မှူး အပါအဝင် တပ်ပေါင်းစုရဲဘော် ကျဆုံးမှုများ

Must read

သျှမ်းပြည် တောင်ပိုင်း၊ ဖယ်ခုံမြို့နယ်၊ မိုးဗြဲမြို့အနီးရှိ စစ်ကောင်စီ ခမရ (၄၂၂) တပ်ရင်းကို တော်လှန်ရေးတပ်ပေါင်းစုက တိုက်ခိုက်နေရာ ယမန်နေ့ (ဧပြီလ ၂၁ ရက်) အထိ တိုက်ပွဲ ပြင်းထန်နေပြီး ၂ ဖက် ထိခိုက် ကျဆုံးမှု များပြားသည်ဟု စစ်ရေးသတင်းရင်းမြစ်က ပြောသည်။

မိုးဗြဲ

နာမည်ကျော် မိုးဗြဲ ရေကာတာအနီး တည်ရှိသည့် စစ်ကောင်စီ ခမရ (၄၂၂) တပ်ရင်း သိမ်းပိုက်နိုင်ရေး တော်လှန်ရေးတပ်ပေါင်းစု တိုက်ခိုက်နေသည်မှာ ရက်အတန် ကြာမြင့်နေပြီးဖြစ်ပြီး တိုက်ပွဲ အတွင်း ကရင်နီ အမျိုးသားများ ကာကွယ်ရေးတပ် (KNDF) တပ်ရင်း အမှတ် (၃) တပ်ရင်းမှူး အပါအဝင် တပ်ပေါင်းစု ရဲဘော် ၂၅ ဦး ဝန်းကျင် ကျဆုံးကြောင်း ၎င်းကဆိုသည်။

“တိုက်ပွဲရက်က ၂ ပတ်ကျော် ၃ ပတ်ထဲ ရောက်နေပြီ၊ တပ်ပေါင်းစုက ဒရုန်းတွေ လက်နက်ကြီးငယ်တွေနဲ့ အင်အားအပြည့်သုံးပြီး တိုက်ခိုက်နေပါတယ်။ ၂၅ ဦးကျဆုံးထားပြီး ဒဏ်ရာရသူတွေလည်းများတယ်လို့ သိရပါတယ်။ စစ်ကောင်စီဘက်ကလည်း ထိခိုက်ကျဆုံးမှု များပါတယ်။ ပွဲမပြီးသေးဘူး။ အသေးစိတ်တော့ ထုတ်ပြန်ပါလိမ့်မယ်” ဟု ၎င်းက ရှင်းပြသည်။

စစ်ကောင်စီ ခမရ (၄၂၂) တပ်ရင်း၏ တဖက်တွင် ရေပြင်ဖြစ်ပြီး တပ်ရင်းအနီး တောတောင်များ မရှိသဖြင့် ခက်ခက်ခဲခဲ တိုက်ခိုက်နေရပြီး စစ်ကောင်စီက လေကြောင်း အသုံးပြု တုန့်ပြန်ခဲ့ကြောင်း တော်လှန်ရေးတပ်ပေါင်းစုနှင့် နီးစပ်သူ တစ်ဦးက ပြောသည်။

မိုးဗြဲ ခမရ (၄၂၂) တိုက်ပွဲတွင် တော်လှန်ရေး ရဲဘော်များ တပ်အတွင်း လိုင်းခန်းများအထိ ဝင်ရောက်တိုက်ခိုက်၍ ရဲမေ (စစ်သား မိန်းမ) များပါ သေဆုံးနေသဖြင့် စစ်ကူပေးပို့ရန် စစ်တပ် ဝါဒဖြန့် လှုမှုကွန်ရက်များတွင် ရေးသားဖော်ပြနေသည်။

တိုက်ပွဲအတွင်း စစ်ကောင်စီတပ် အရေးနိမ့်နေသည့်အတွက် လေကြောင်းအကူအညီဖြင့် ပြန်လည်ခုခံနေပြီး လူနေအိမ်များကိုပါ ဗုံးကြဲတိုက်ခိုက်မှုများ ပြုလုပ်နေသည်။

ဧပြီ၂၀ ရက်၊ နေ့လယ် ၁၂ နာရီက လွိုင်ကော်မြို့အနီး ကုန်းသာရွာကို စစ်ကောင်စီ လေကြောင်းက ဗုံးကြဲ တိုက်ခိုက်ခဲ့ ကလေး ၂ ဦး အပါအဝင် အရပ်သား ၆ ဦး သေဆုံးကာ ၁၀ ဦး ဒဏ်ရာရရှိခဲ့သည်။

စစ်ရေးအရ အရေးပါသည့် သျှမ်း-ကရင်နီ နယ်စပ်ဒေသရှိ မိုးဗြဲမြို့ကို တော်လှန်ရေးတပ်များ ထိမ်းချုပ်ထားပြီးနောက် စစ်ကောင်စီ ခမရ (၄၂၂) တပ်ကို တိုက်ခိုက်နေသည်မှာ ရက်ပေါင်း အတန်ကြာနေပြီဖြစ်ပြီး ယခုတကြိမ် သိမ်းပိုက်နိုင်မည်ဟု စစ်ရေးသတင်းရင်းမြစ်က သုံးသပ်သည်။

လက်ရှိအနေအထားအရ မိုးဗြဲမြို့နေရာအများစုကို တော်လှန်ရေး အင်အားစုများ ထိန်းချုပ်ထားပြီး စစ်ကောင်စီ၏ ခမရ (၄၂၂) သာ ကျန်ရှိနေသည့်အတွက် ထိုတပ်ရင်းကို ဝိုင်းဝန်းတိုက်ခိုက်နေကြခြင်း ဖြစ်သည်။

ယခုရက်ပိုင်း ဖယ်ခုံ-ပင်လောင်း ဒေသတွင်လည်း တိုက်ပွဲများ ဖြစ်ပွားနေပြီး ဆောင်းပြောင်း-တောင်မဲသင်း- နောင်ဝိုး ဒေသများသို့ စစ်ကြောင်းထိုးရန် စစ်ကောင်စီတပ် ပြင်ဆင်နေကြောင်း ဒေသခံများက ပြောသည်။

Leave a Comments

- Advertisement -spot_img

Latest article