Thursday, May 30, 2024

မိုးဗြဲ ခမရ (၄၂၂) တိုက်ပွဲပြင်းထန်၊ ၂ ဖက် ထိခိုက်ကျဆုံးမှုရှိ

Must read

သျှမ်းပြည်နယ် တောင်ပိုင်း၊ ဖယ်ခုံမြို့နယ်၊ မိုးဗြဲမြို့အနီးရှိ စစ်ကောင်စီ ခမရ (၄၂၂) တပ်ရင်းကို တော်လှန်ရေးတပ်ပေါင်းစုက တိုက်ခိုက်နေရာ ယနေ့ (ဧပြီလ ၁၄ ရက်) တွင် တိုက်ပွဲ ပြင်းထန်နေပြီး ၂ ဖက် ထိခိုက် ကျဆုံးမှုများ ရှိသည်ဟု စစ်ရေးသတင်းရင်းမြစ်က ပြောသည်။

မိုးဗြဲမြို့

နာမည်ကျော် မိုးဗြဲ ရေကာတာအနီး တည်ရှိသည့် စစ်ကောင်စီ ခမရ (၄၂၂) တပ်ရင်း သိမ်းပိုက်နိုင်ရေး တော်လှန်ရေးတပ်ပေါင်းစု တိုက်ခိုက်နေသည်မှာ ရက်အတန် ကြာမြင့်နေပြီးဖြစ်ပြီး တပ်ရင်းအနီးရှိ စခန်းငယ်များကို သိမ်းပိုက်ထားသည်ဟု သတင်းရင်းမြစ်က ဆိုသည်။

“တပ်ပေါင်းစုက ဒရုန်းတွေ လက်နက်ကြီးငယ်တွေနဲ့ အင်အားအပြည့်သုံးပြီး တိုက်ခိုက်နေပါတယ်။ တစ်ဦး ကျဆုံးထားပါတယ်။ စစ်ကောင်စီဘက်က ထိခိုက်ကျဆုံးမှု ရှိပေမယ့် အတိအကျ မသိရသေးပါဘူး” ဟု ၄င်းက ရှင်းပြသည်။

စစ်ကောင်စီ ခမရ (၄၂၂) တပ်ရင်း၏ တဖက်တွင် ရေပြင်ဖြစ်ပြီး တပ်ရင်းအနီး တောတောင်များ မရှိသဖြင့် ခက်ခက်ခဲခဲ တိုက်ခိုက်နေရကြောင်း တော်လှန်ရေးတပ်ပေါင်းစုနှင့် နီးစပ်သူ တစ်ဦးက ပြောသည်။

ခမရ (၄၂၂) တပ်ရင်း တိုက်ခိုက်ခံရမှုကို တုန့်ပြန်သည့် အနေဖြင့် စစ်ကောင်စီက ဒေသတွင်း လက်နက်ကြီးများ ပစ်ခတ်နေပြီး လေကြောင်းမှ ဗုံးကြဲတိုက်ခိုက်နေရာ ပြီးခဲ့သည့် ဧပြီလ ၁၁ ရက်နေ့၊ ည ၁၁ နာရီကျော်က ကလေးငယ် အပါအဝင် ဒေသခံ ၃ ဦး သေဆုံးခဲ့သည်။

“လွယ်ယင်းနဲ့ ပီကင်းရွာကို ဗုံးနှစ်ခါ လာကြဲတာ ၃ ယောက်သေတယ်။ ကလေးငယ်ကော” ဟု ဒေသခံ တစ်ဦးက ပြောသည်။
သေဆံးခဲ့သူများမှာ လွယ်ရင်းရွာမှ အသက် ၆၅ နှစ်အရွယ် အမျိုးသမီး၊ အသက် ၁၂ အရွယ် မိန်းခလေးနှင့် အသက် ၃ နှစ်အရွယ် ယေက်ျားလေးတို့ဖြစ်ကြောင်း သိရသည်။

လက်ရှိ တိုက်ပွဲ ပြင်းထန်နေဆဲဖြစ်ပြီး စစ်ကောင်စီတပ် လက်နက်ကြီး ပစ်ခတ်မှုများ ရှိနေကြောင်း ဒေသခံများက ဆိုသည်။

စစ်ရေးအရ အရေးပါသည့် သျှမ်း-ကရင်နီ နယ်စပ်ဒေသရှိ မိုးဗြဲမြို့ကို တော်လှန်ရေးတပ်များ ထိမ်းချုပ်ထားပြီးနောက် စစ်ကောင်စီ ခမရ (၄၂၂) တပ်ကို တိုက်ခိုက်နေသည်မှာ ရက်ပေါင်း အတန်ကြာနေပြီဖြစ်ပြီး ယခုတကြိမ် သိမ်းပိုက်နိုင်မည်ဟု စစ်ရေးသတင်းရင်းမြစ်က သုံးသပ်သည်။

SHANBurmese

Shannews

သျှမ်းသံတော်ဆင့်

မိုးဗြဲ #ခမရ_(၄၂၂) #KNDF #ရေကာတာ

Leave a Comments

- Advertisement -spot_img

Latest article