သျှမ်းပြည် မိုင်းရယ်မြို့နယ် စစ်ကောင်စီတပ်က ပြည်သူများ ထင်ယောင်ထင်မှားဖြစ်အောင် တပ်အရွှေ့အပြောင်း ပြုလုပ်နေကြောင်း စုံစမ်းသိရသည်။
ဧပြီလ ၉ ရက်နှင့် ၁၀ ရက်တို့တွင် မိုင်းရယ်နှင့် ကျေးသီးမြို့နယ်အကြားရှိ မန်ဖြတ်ကျေးရွာ အခြေစိုက် ခြေလျင်တပ်ရင်း ခလရ-၂၂ သို့ လားရှိုးမြို့ စစ်ကောင်စီတပ်မှ အရပ်ဝတ်ဖြင့် တပ်သား ၄၀၀ ကျော်ကို ကားကြီး ၈ စီးခန့်ဖြင့် ညအချိန်တွင် ပို့ဆောင်လာခဲ့ကြောင်း မိုင်းရယ်ဒေသခံများက ပြောသည်။
“ဒီတခေါက် လာပို့တာ ဆေးစွဲတဲ့လူတွေ မဟုတ်ဘူး၊ အရပ်ဝတ်နဲ့ စစ်သားတွေကို တွဲကား ၈ စီးနဲ့ လာပို့သွားတာ။ ဒီတခေါက်လာတာ လူကောင်ထွားထွားနဲ့၊ ဆေးသမားတွေတော့ မဟုတ်ဘူး။ တချို့လည်း သေနတ်လွယ်ထားတယ်။ ရှေ့နောက်မှာလည်း လုံခြုံရေးလိုက်ပေးတဲ့ကား ပါတယ်။ လားရှိုးကနေ မိုင်းရယ်ကို လာတာ”ဟု မိုင်းရယ်မြို့နယ်မှ ကိုယ်တိုင်မြင်တွေ့ခဲ့သည့် ဒေသခံတစ်ဦးက သျှမ်းသံတော်ဆင့်ကို ပြောသည်။
မိုင်းရယ်မြို့နယ်သို့ ရောက်ရှိလာသည့် အရပ်ဝတ်နှင့် တပ်သားများကို လားရှိုး စစ်ကောင်စီတပ်များမှ ၆ ဘီးကား၊ ၁၀ ဘီးကား (၈)စီးခန့်ဖြင့် လာရောက်ပို့ဆောင်ခဲ့ခြင်း ဖြစ်ကြောင်း ဒေသခံများထံမှ သိရသည်။
ဧပြီလ ၉ ရက်တွင် ၎င်းကားများကို မိုင်းရယ်မြို့နှင့် မိုင် ၂၀ ကျော် ကွာဝေးသည့် ဝမ်ပုံကျေးရွာအနီး တွေ့ရှိခဲ့ရပြီး မိုင်းရယ်နှင့် ကျေးသီးမြို့နယ်အကြား ဝမ်ဖြတ်ကျေးရွာရှိ ခလရ-၂၂ တပ်ရင်းအတွင်းသို့ ဝင်ရောက်သွားပြီး ဧပြီလ ၁၀ ရက်နေ့ နံနက်ပိုင်းတွင် လားရှိုးသို့ ပြန်လည်ထွက်ခွာသွားကြောင်း မိုင်းရယ်ဒေသခံများက ပြောသည်။
“ရှေ့ညကတော့ ဝမ်ဖြတ်က ခလရ-၂၂ တပ်ရင်းမှာ အိပ်လောက်တယ်၊ မိုင်းရယ်-ကျေးသီး အစပ်က။ ပြီးတော့ မနေ့မနက်မှာ ပြန်သွားတယ်။ တချို့ရက်တွေဆိုရင် သုံးလေးရက် တစ်ခါ လက်နက်အပြည့်အစုံနဲ့ တွဲကား ၄/၅ စီးလောက် သွားလာလှုပ်ရှားနေတာ တွေ့ရတယ်။ တစ်ဖွဲ့တည်း ဖြစ်မယ်ထင်တယ်”ဟု မိုင်းရယ်မြို့နယ်မှ ၎င်းဒေသခံ အမျိုးသားက သျှမ်းသံတော်ဆင့်ကို ဆက်ပြောသည်။
ထို့အပြင် မတ်လအတွင်းကလည်း စစ်ကောင်စီလက်အောက်ခံ လားရှိုးရဲ့တပ်ဖွဲ့နှင့် မူးယစ်တပ်ဖွဲ့များမှ မူးယစ်ဆေးစွဲ လက္ခဏာရှိသူများကို လိုက်လံဖမ်းဆီးပြီး မိုင်းရယ်မြို့အနီး မန်ပုံကျေးရွာဘက်သို့ (၂) ကြိမ်တိုင်တိုင် ကားတင်ပို့ဆောင်ခဲ့သည်။
ယခုအခါ လားရှိုးစစ်ကောင်စီတပ်မှ တပ်သားများကို အရပ်ဝတ်ဖြင့် ကားတင်ခေါ်ဆောင်လာပြီး မိုင်းရယ်မြို့နယ်သို့ ထပ်မံရောက်ရှိလာခြင်းကြောင့် ပြည်သူများမှာ လုံခြုံရေး စိုးရိမ်ထိတ်လန့်နေရကြောင်း မိုင်းရယ်မြို့နယ် ဒေသခံများက ပြောသည်။
“ရှေ့တခေါက်တုန်းကဆိုရင် ဆေးစွဲနေတဲ့ လူတွေကို တွဲကားနဲ့ နှစ်ခေါက် လာချတာ။ အခုကျတော့ အဲ့လိုပုံစံ ကားတင်ပြီးတော့ အရပ်ဝတ်နဲ့ စစ်သားတွေ ထပ်လာချတာဆိုတော့ ပြည်သူတွေကို ထင်ယောင်ထင်မှားဖြစ်အောင် လုပ်နေတာ။ နောက်ပိုင်း စစ်သားတွေက ဆေးသမားလို ပုံဖမ်းပြီး အများကြီး ထပ်လာမှာ စိုးရိမ်ရတာပေါ့”ဟု မိုင်းရယ်မြို့နယ်မှ အသက်(၄၀) ကျော်အရွယ် အမျိုးသားတစ်ဦးက သျှမ်းသံတော်ဆင့်ကို ပြောသည်။
စစ်ကောင်စီလက်အောက်ခံ လားရှိုးရဲ့တပ်ဖွဲ့နှင့် မူးယစ်တပ်ဖွဲ့များမှ လားရှိုးမြို့နယ်အတွင်း မူးယစ်ဆေးစွဲ လက္ခဏာရှိသူများကို ဖမ်းဆီးပြီး မတ်လ ၂၂ ရက်နှင့် ၂၉ ရက်တို့တွင် မိုင်းရယ်မြို့နယ်သို့ ကားတင်ပို့ဆောင်ခဲ့ရာ မိုင်းရယ်ဒေသခံများက ၎င်းတို့ကို ကားဖြင့် လားရှိုးမြို့ဘက်သို့ ပြန်လည်ပို့ဆောင်ပေးခဲ့ကြောင်း သိရသည်။
