သျှမ်းပြည် မူဆယ်မြို့တွင် လူနာကို ဆေးကုသပေးနေစဉ် ပြန်ပေးဆွဲခံရသည့် ဆရာဝန်ကို တရုတ်ယွမ်ငွေ သိန်း ၃၀ ဖြင့် ပြန်လည်ရွေးထုတ်ခိုင်းနေကြောင်း စုံစမ်းသိရသည်။

ယမန်နေ့ (ဧပြီလ ၉ ရက်) ညနေပိုင်းတွင် မူဆယ်မြို့ ခရစ်ယာန်ရပ်ကွက်ရှိ Best House ဟိုတယ်အနီး ဖွင့်လှစ်ထားသည့် ဆေးခန်းမှ ဆရာဝန် ဒေါက်တာမိုးကျော်နိုင် ကို အမည်မသိ လက်နက်ကိုင်အဖွဲ့မှ ဝင်ရောက်ဖမ်းဆီး၍ ပြန်ပေးဆွဲ ခေါ်ဆောင်သွားခဲ့သည်။

ယနေ့ (ဧပြီလ ၁၀ ရက်) နံနက်ခင်းတွင် ဆရာဝန်ကို ပြန်ပေးဆွဲ ခေါ်ဆောင်သွားသည့် အမည်မသိအဖွဲ့မှ မိသားစုထံ ဆက်သွယ်လာပြီး တရုတ်ယွမ်ငွေ သိန်း ၃၀ (မြန်မာကျပ်ငွေ ကာလပေါက်ဈေး သိန်း ၁၅၀၀ ကျော်) ပေးဆောင်မှသာ ဖမ်းဆီးထားသည့် ဆရာဝန်ကို ပြန်လွှတ်ပေးမည်ဟု ငွေခြိမ်းခြောက်တောင်းဆိုခဲ့ကြောင်း မူဆယ်ဒေသခံများက ပြောသည်။

“ပြန်ပေးဆွဲခံရပြီး ငွေခြိမ်းခြောက်တောင်းခံရတာက ဆေးကုပေးတဲ့ ဆရာဝန်ပဲ။ သူ့အိမ်က ချမ်းသာလား၊ မချမ်းသာလား‌တော့ မသိရဘူး။ အခုက တရုတ်ယွမ်ငွေ သိန်း ၃၀ (မြန်မာငွေ ကာလပေါက်ဈေး ကျပ်သိန်း ၁၅၀၀ ‌ကျော်) နဲ့ ပြန်ရွေးခိုင်းနေတာ”ဟု မူဆယ်မြို့မှ ဖြစ်စဉ်သိရှိသူ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

မူဆယ်မြို့လယ်ခေါင်ရှိ ဆေးခန်းတွင် လူနာများကို ဆေးကုသပေးနေစဉ် ဖမ်းဆီးခံခဲ့ရသည့် ဒေါက်တာမိုးကျော်နိုင် ကို ၎င်းအမည်မသိ အဖွဲ့အစည်းက ပြန်ပေးဆွဲပြီး မည်သည့်နေရာသို့ ခေါ်ဆောင်သွားသည်ကို မသိရသေးသည့်အတွက် မိသားစုနှင့် ဆွေမျိုးများက စိုးရိမ်နေကြကြောင်း သိရသည်။

“ပြန်ပေးဆွဲပြီး ဖမ်းခံရလို့ လွတ်လာတဲ့လူတွေကို မေးကြည့်တော့ သူတို့ဖမ်းခံရတာ အများကြီးရှိတယ်၊ ကိုယ်တစ်ယောက်တည်း ဖမ်းခံရတာ မဟုတ်ဘဲနဲ့ နေရာတိုင်းက ဖမ်းလာတာလို့ ပြောတယ်။ ဘယ်သူမှ အသံမထွက်ရဲတော့ အခုလို ခြိမ်းခြောက်ဖိနှိပ်မှုက ဆက်ရှိနေဦးမှာပဲ။ တရားဥပဒေ စိုးမိုးမှုကလည်း မြို့ပေါ်မှာ လုံးဝ မရှိတော့တာ”ဟု မူဆယ်မြို့မှ ၎င်းဒေသခံ အမျိုးသားတစ်ဦးက သျှမ်းသံတော်ဆင့်ကို ဆက်ပြောသည်။

မတ်လဆန်းမှ စတင်ပြီး မူဆယ်မြို့ရှိ ၎င်းလက်နက်ကိုင် အယောင်ဆောင်အဖွဲ့များက မြို့ပြပျောက်ကြားအဖွဲ့၊ မြို့တွင်းတော်လှန်သော အုပ်စုအဖွဲ့ (MRTTD) နှင့် မူဆယ် PDF အယောင်ဆောင်အဖွဲ့ (MSPDF) စသည့် နာမည်အမျိုးမျိုးဖြင့် မြို့နေလူထုကို အွန်လိုင်းမှ စာပို့ခြိမ်းခြောက် ငွေညှစ်တောင်းခံပြီး လူပြန်ပေးဆွဲမှုများ နေ့စဉ်နီးပါး ဆက်ရှိနေသေးကြောင်း သိရသည်။

ယခင်က ဖြစ်ပွားခဲ့သည့် ဓားပြတိုက်မှုနှင့် ပြန်ပေးဆွဲမှုများတွင် ကျူးလွန်သူများကို ပြည်သူများမှ ပြန်လည်ဖမ်းဆီးရမိလျှင် စစ်ကောင်စီလက်အောက်ခံ လက်နက်ကိုင်ဆောင်သည့် ပြည်သူ့စစ်အဖွဲ့ဝင်များသာ ဖြစ်ကြောင်း မူဆယ်‌ဒေသခံများက ပြောသည်။

လက်ရှိတွင် မူဆယ်မြို့နယ်အတွင်း သွားလာလှုပ်ရှားနေသည့် စစ်ကောင်စီလက်အောက်ခံ ပြည်သူ့စစ်အဖွဲ့များမှာ ကောင်းခါး၊ မြို့မ၊ ပန်းဆေး၊ လုံထန်၊ ပိန်းဆာ၊ မန်ဂျယ်၊ စိန်ကျော့၊ မန်ပြိန်း၊ ရှောက်ဟော်၊ တာမိုးညဲ၊ မုံးပေါ် စသည်ဖြင့် ၁၅ ဖွဲ့ထက်မနည်း ရှိနေသည်။