သျှမ်းပြည် မူဆယ်မြို့ ဆေးခန်းတစ်ခုမှ ဆရာဝန်သည် လူနာများကို ဆေးကုသမှု ပေးနေစဉ် အမည်မသိ အဖွဲ့တစ်ခုမှ ရိုက်နှက်ဖမ်းဆီးပြီး ခေါ်ဆောင်သွားခဲ့ကြောင်း စုံစမ်းသိရသည်။

ယနေ့ (ဧပြီလ ၉ ရက်‌) ညနေ ၅ နာရီကျော်တွင် မူဆယ်မြို့ ကောင်းနောင်ရပ်ကွက်ရှိ Best House ဟိုတယ်အနီး ဖွင့်လှစ်ထားသည့် ဆေးခန်းတွင် ဒေါက်တာမိုးကျော်နိုင် အမည်ရှိ ဆရာဝန်သည် လူနာများကို ဆေးကုသမှု ပေးနေစဉ် အမည်မသိ လူ ၄ ဦးက ကားဖြင့် ရောက်ရှိလာပြီး ၎င်းဆရာဝန်အား ရိုက်နှက်ဖမ်းဆီး၍ ပြန်ပေးဆွဲ ခေါ်ဆောင်သွားခဲ့ကြောင်း မူဆယ်ဒေသခံများက ပြောသည်။

“သူ့ဆေးခန်းထဲမှာ လူနာကုနေတုန်း ဖမ်းခံရတာ။ တချို့လူနာဆို ဆေးချိတ်ထားတုန်း ရှိနေသေးတယ်။ တချို့လည်း ဆရာဝန်ကို စောင့်နေတဲ့ လူနာတွေ ရှိနေတယ်။ စုစုပေါင်း ၄ ယောက်လာတာ၊ ၂ ယောက်က ကားပေါ်ကဆင်းပြီး ဆရာဝန်ကို ရိုက်နှက်ပြီးတော့ ကားပေါ် တင်ခေါ်သွားတာ”ဟု ဖြစ်စဉ်သိရှိသူ မူဆယ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

လက်ရှိအချိန်တွင် အဆိုပါဆရာဝန်ကို ပြန်ပေးဆွဲခေါ်သွားသည့် အဖွဲ့ကို မည်သည့် အဖွဲ့အစည်းမှန်း မသိရသေးဘဲ မည်သည့်နေရာသို့ ခေါ်ဆောင်သွားသည်ကိုလည်း မသိရသေးသည့်အတွက် မိသားစုနှင့် ဆွေမျိုးများက စိုးရိမ်နေကြကြောင်း သိရသည်။

ယခုကဲ့သို့ မူဆယ်မြို့လယ်ခေါင်ရှိ ဆေးခန်းတစ်ခုမှ ဆရာဝန်တစ်ဦးကို အမည်မသိအဖွဲ့မှ ဖမ်းဆီးခေါ်ဆောင်သွားခြင်းကြောင့် မြို့ပေါ်တွင် လုံခြုံမှု လုံးဝ မရှိတော့ဘဲ ဒေသခံပြည်သူများမှာ လုံခြုံ‌ရေး စိုးရိမ်ထိတ်လန့်နေရကြောင်း မူဆယ်ဒေသခံများက ပြောသည်။

“ဆေးကုတဲ့ ဆရာဝန်ကြီးကိုတောင်မှ ပြန်ပေးဆွဲတာဆိုတော့ ဘာကြောင့်ဖမ်းချင်မှန်း စဉ်းစားလို့ မရတော့ဘူး။ ကိုယ့်ဘာသာ သမ္မာအာဇီဝနဲ့ ကိုယ့်အလုပ်ကိုယ် လုပ်စားတာတောင် ဓားပြတိုက် ပြန်ပေးဆွဲချင်တဲ့လူက သက်သက်ကို ရှိတာ။ အခုက မြို့ပေါ်မှာ လုံခြုံရေးက လုံးဝကို မရှိတော့တာ။ ကိုယ့်ထမင်းကိုယ် စားပြီး နေ့နေ့ညည အဖွဲ့တိုင်းကို ကြောက်နေရတယ်”ဟု မူဆယ်မြို့မှ ၎င်းဒေသခံ အမျိုးသားက သျှမ်းသံတော်ဆင့်ကို ဆက်ပြောသည်။

အလားတူ မတ်လ ၂၆ ရက်ကလည်း မူဆယ်မြို့ရှိ ကောင်းမူးတုံနှင့် ဈေးရပ်ကွက်တို့တွင် တစ်ရက်အတွင်း လူပြန်ပေးဆွဲပြီး ငွေခြိမ်းခြောက်တောင်းဆိုမှု ၂ ကြိမ် ဖြစ်ပွားခဲ့ကြောင်း မူဆယ်ဒေသခံများထံမှ သိရသည်။

မူဆယ်မြို့တွင် လက်နက်ကိုင် အယောင်ဆောင်အဖွဲ့များက ဒေသခံပြည်သူများထံ အွန်လိုင်းစာပို့ ငွေညှစ်တောင်းခံခြင်း၊ လက်ပစ်ဗုံးပို့ကာ အသက်အန္တရာယ်အထိ ခြိမ်းခြောက်ခြင်း၊ ဆက်ကြေးမပေးသူများကို သေနတ်ပစ်ခတ် ဖမ်းဆီးခြင်း၊ ဓားပြတိုက်မှုနှင့် လူပြန်ပေးဆွဲမှုများကို ခပ်စိပ်စိပ် လုပ်ဆောင်လာခြင်းကြောင့် လုံခြုံရေး စိုးရိမ်ပူပန်ရကြောင်း မူဆယ်ဒေသခံများက ပြောသည်။

မတ်လဆန်းမှ စတင်ပြီး မူဆယ်မြို့ရှိ ၎င်းလက်နက်ကိုင် အယောင်ဆောင်အဖွဲ့များက မြို့ပြပျောက်ကြားအဖွဲ့၊ မြို့တွင်းတော်လှန်သော အုပ်စုအဖွဲ့ (MRTTD) နှင့် မူဆယ် PDF အယောင်ဆောင်အဖွဲ့ (MSPDF) စသည့် နာမည်အမျိုးမျိုးဖြင့် မြို့နေလူထုကို အွန်လိုင်းမှ စာပို့ခြိမ်းခြောက် ငွေညှစ်တောင်းခံပြီး လူပြန်ပေးဆွဲမှုများ နေ့စဉ်နီးပါး ဆက်ရှိနေသေးကြောင်း သိရသည်။

ယခင်က ဖြစ်ပွားခဲ့သည့် ဓားပြတိုက်မှုနှင့် ပြန်ပေးဆွဲမှုများတွင် ကျူးလွန်သူများကို ပြည်သူများမှ ပြန်လည်ဖမ်းဆီးရမိလျှင် စစ်ကောင်စီလက်အောက်ခံ လက်နက်ကိုင်ဆောင်သည့် ပြည်သူ့စစ်အဖွဲ့ဝင်များသာ ဖြစ်ကြောင်း မူဆယ်‌ဒေသခံများက ပြောသည်။