ပြင်ဦးလွင်မြို့ရှိ စစ်တက္ကသိုလ်ကို တော်လှန်ရေးတပ်ဖွဲ့များက ရှော့တိုက်ဒုံးဖြင့် ပစ်ခတ်တိုက်ခိုက်ခဲ့ကြောင်း စုံစမ်းသိရသည်။
ယနေ့ (ဧပြီလ ၈ ရက်) နံနက် ၄ နာရီခန့်တွင် ပြင်ဦးလွင်မြို့ရှိ စစ်တက္ကသိုလ်ကို တော်လှန်ရေးတပ်ဖွဲ့များက ရှော့တိုက်ဒုံးဖြင့် ပစ်ခတ်တိုက်ခတ်ခဲ့ပြီး လက်ရှိတွင် ပြင်ဦးလွင်မြို့ပေါ်နှင့် မြို့အဝင်အထွက် နေရာများတွင် စစ်ကောင်စီတပ်က လုံခြုံရေး တင်းတင်းကျပ်ကျပ် စစ်ဆေးနေကြောင်း ပြင်ဦးလွင်ဒေသခံများက ပြောသည်။
“DSA နား လက်နက်ကြီး ကျတယ်ပြောတယ်။ ဒီမနက် အစစ်အဆေး များမှ ထူးဆန်းတယ်ပေါ့။ မြို့တွင်းထဲမှာတော့ အားလုံးပုံမှန်ဆိုတော့ ဖြစ်လို့ဖြစ်မှန်း မသိသူများတယ်။ မြို့အဝင်အထွက် တွေမှာ ပိတ်ပြီးတော့ အစစ်အဆေး လုပ်နေတယ်”ဟု စစ်ကောင်စီတပ်နှင့် နီးစပ်သူတစ်ဦးက သျှမ်းသံတော်ဆင့်ကို ပြောသည်။
NUG ၏ ကာကွယ်ရေးဝန်ကြီးဌာနကလည်း ယနေ့ (ဧပြီလ ၈ ရက်) နံနက်အစောပိုင်းတွင် ပြင်ဦးလွင်မြို့ရှိ စစ်တက္ကသိုလ် (DSA) ကို မန္တလေးတိုင်း (ပကဖ) က ၁၀၇ မမ ရှော့တိုက်ဒုံး ၅ လုံးဖြင့် ပစ်ခတ်တိုက်ခိုက်ခဲ့ပြီး စစ်ကောင်စီတပ်သားများ နေထိုင်သည့် အဆောင်အနီးသို့ (၄)လုံး ကျရောက်ပေါက်ကွဲခဲ့ကြောင်း သတင်းထုတ်ပြန်လာသည်။
အလားတူ ဧပြီလ ၄ ရက်နေ့ကလည်း နေပြည်တော်ရှိ စစ်ကောင်စီတပ်၏ စစ်ရုံးချုပ်ရှိရာ (ကက ကြည်းတပ်)၊ အေလာ လေတပ်နှင့် စစ်ခေါင်းဆောင် မင်းအောင်လှိုင်၏ နေအိမ်တို့ကို PDF အထူးတပ်ဖွဲ့များနှင့် ရှာထူးဝေါ် နည်းပညာတပ်ဖွဲ့၏ Kloud Drone တပ်ခွဲက ဒရုန်းအစီးပေါင်း ၃၀ ကျော်ဖြင့် တပြိုင်တည်း တိုက်ခိုက်ခဲ့ရာ ထိခိုက်မှု ရှိခဲ့ကြောင်း NUG ကာကွယ်ရေးဝန်ကြီးဌာနက ထုတ်ပြန်ထားသည်။
စစ်တက္ကသိုလ် တည်ရှိရာ ပြင်ဦးလွင်မြို့နှင့် ၁၅ မိုင်သာ ကွာဝေးပြီး စစ်ရေးအရ အရေးပါသည့် နောင်ချိုမြို့နယ်ရှိ သံဘိုရွာ စစ်ကောင်စီ တပ်စခန်းကို ပြီးခဲ့သည့် ဇန်နဝါရီ ၃ ရက်က တအာင်း(ပလောင်)တပ်ဖွဲ့ TNLA နှင့် မန္တလေး-PDF တပ်ဖွဲ့တို့က တိုက်ခိုက်သိမ်းပိုက်ခဲ့သည်။
ထို့အပြင် ပြင်ဦးလွင်မြို့နှင့် ၁၅ မိုင်ခန့်သာ ကွာဝေးသည့် သျှမ်း-မန္တလေး နယ်စပ်ရှိ ကျောက်မဲလေး ကျေးရွာတွင်လည်း ဇန်နဝါရီလ နောက်ဆုံးပတ်အထိ စစ်ကောင်စီတပ်နှင့် ညီနောင်မဟာမိတ်တပ်ဖွဲ့တို့ ထိတွေ့တိုက်ပွဲ ဖြစ်ပွားခဲ့ကြောင်း ဒေသခံများထံမှ သိရသည်။
