ယမန်နေ့ (ဧပြီလ ၅ ရက်) ညနေပိုင်းတွင် တာချီလိတ်မြို့၌ ကျင်းပပြုလုပ်နေသည့် နဂါးနှစ်ကောင်ကျောင်းတိုက် ဦးစီးပဓာနနာယက ဆရာတော် ဒေါက်တာဘဒ္ဒန္တ ဓမ္မသီရိ၏ အန္တိမအဂ္ဂိဈာပန အခမ်းအနားသို့ စစ်ခေါင်းဆောင် မင်းအောင်လှိုင် က နေ့ချင်းပြန် ရောက်ရှိလာခဲ့ကြောင်း စုံစမ်းသိရသည်။
ဧပြီလ ၃ ရက်တည်းက တာချီလိတ်မြို့သို့ စစ်ခေါင်းဆောင် မင်းအောင်လှိုင် ရောက်ရှိနေကြောင်း သတင်းထွက်ပေါ်ခဲ့ပြီး ကျပ်သိန်းပေါင်းများစွာ အကုန်အကျခံ၍ ဈာပန အခမ်းအနား ကျင်းပရန် ပြင်ဆင်ထားသည့် လောင်တိုက် ထားရှိရာ ကွင်းပြင်အနီးတဝိုက်နှင့် ရုပ်ကလာပ် ပင့်ဆောင်မည့် လမ်းတလျှောက်တွင် လုံခြုံရေး ထူထပ်စွာ ချထားကြောင်း တာချီလိတ် ဒေသခံများထံမှ သိရသည်။
ယနေ့ (ဧပြီလ ၆ ရက်) တွင် ကျင်းပမည့် နဂါးနှစ်ကောင်ဆရာတော်၏ ဈာပန အခမ်းအနားကို တက်ရောက်မည့်သူများအနေဖြင့် စာရင်းသွင်းရမှာဖြစ်ပြီး မှတ်ပုံတင်မိတ္တူပါ ယူဆောင်လာရမည်ဖြစ်ကြောင်း တာချီလိတ်ဒေသခံများက ပြောသည်။
ပြီးခဲ့သည့် ဧပြီလ ၄ ရက်နေ့တွင် နေပြည်တော်ရှိ စစ်ရုံးချုပ် (ကက ကြည်းတပ်)၊ အေလာ လေတပ်နှင့် မင်းအောင်လှိုင်နေအိမ်တို့ကို PDF တပ်ဖွဲ့က ဒရုန်းဖြင့် တိုက်ခိုက်ခဲ့ပြီးနောက် စစ်ခေါင်းဆောင် မင်းအောင်လှိုင်သည် ယမန်နေ့ (ဧပြီလ ၅ ရက်)တွင် တာချီလိတ်မြို့သို့ ရောက်ရှိလာခဲ့ခြင်း ဖြစ်သည်။
တာချီလိတ်မြို့မှ နဂါးနှစ်ကောင်ကျောင်းတိုက် ဆရာတော် ဒေါက်တာဘဒ္ဒန္တ ဓမ္မသီရိသည် သျှမ်းထေရ်ကြီးဝါကြီး ဆရာတော်တစ်ပါးဖြစ်ပြီး သက်တော် ၉၇ နှစ်၊ ဝါတော် ၇၇ ဝါတွင် သက်ကြီးရောဂါဖြင့် ဖေဖော်ဝါရီလ ၈ ရက်တွင် ဘဝနတ်ထံ ပျံလွန်သွားခဲ့သည်။
ထိုစဉ်ကလည်း စစ်ခေါင်းဆောင် မင်းအောင်လှိုင်သည် တာချီလိတ်မြို့သို့ လာရောက်ပြီး နဂါးနှစ်ကောင် ဆရာတော်၏ ရုပ်ကလာပ်ကို လာရောက်ဖူးမြှော်ခဲ့သည်။
ပြီးခဲ့သည့် ၂၀၂၁ ခုနှစ် စစ်အာဏာသိမ်းခါစတွင် စစ်ကောင်စီခေါင်းဆောင် မင်းအောင်လှိုင် ကိုယ်တိုင် နဂါးနှစ်ကောင်ကျောင်းတိုက် ဆရာတော်ထံသို့ “အဘိဓဇမဟာရဋ္ဌဂုရု” ဘွဲ့တံဆိပ်တော်ကို တာချီလိတ်မြို့အထိ လာရောက်ဆက်ကပ်လှူဒါန်းခဲ့သည်
