Sunday, July 14, 2024

ဖယ်ခုံနှင့် မိုးဗြဲမြို့တွင် တိုက်ပွဲပြင်းထန်နေ

Must read

သျှမ်းပြည် ဖယ်ခုံနှင့် မိုးဗြဲမြို့နယ်တွင် စစ်ကောင်စီတပ်နှင့် ကရင်နီအမျိုးသားများ ကာကွယ်ရေးတပ် KNDF၊ PDF ပူးပေါင်းတပ်ဖွဲ့တို့အကြား တိုက်ပွဲပြင်းထန်နေကြောင်း စုံစမ်းသိရသည်။

မိုးဗြဲမြို့နယ်အခြေစိုက် စစ်ကောင်စီ ခြေမြန်တပ်ရင်း ခမရ-၄၂၂ ကို ကရင်နီတော်လှန်ရေး အင်အားစု တပ်ဖွဲ့များဖြစ်သည့် KNDFနှင့် PDFs တို့က ဧပြီလ ၃ ရက်စတင် ဝင်ရောက်တိုက်ခိုက်ခဲ့သောကြောင့် တိုက်ပွဲဖြစ်ပွားနေကြောင်း စစ်ရေးသတင်းရင်းမြစ်ထံမှ သိရသည်။

အဆိုပါ တိုက်ပွဲအခြေအနေနှင့် ပတ်သက်၍ သျှမ်းသံတော်ဆင့်မှ KNDF ၏ပြန်ကြားရေးထံသို့ ဆက်သွယ်မေးမြန်းခဲ့ရာ “ မိုးဗြဲမြို့မှာတော့ တိုက်ပွဲဆက်ဖြစ်နေတယ်။ အခုတလော တိုက်ပွဲအခြေအနေကိုတော့ ဖြေကြားလို့ အဆင်မပြေသေးပါဘူး” ဟု ဖြေကြားထားသည်။

တိုက်ပွဲအတွင်း စစ်ကောင်စီဘက်က လေကြောင်းဖြင့် ဗုံးကြဲတိုက်ခိုက်ခြင်း၊ လက်နက်ကြီး ပစ်ခတ်ခြင်းများ အသုံးပြုပစ်ခတ်နေသည်ဟု သိရသည်။
ထို့အတူ ဖယ်ခုံမြို့တွင်လည်း စစ်ကောင်စီတပ်နှင့် KNDF PDF တပ်ဖွဲ့တို့အကြား ထိတွေ့တိုက်ပွဲ ဖြစ်ပွားနေကြောင်း သိရသည်။

“ဖယ်ခုံဘက်မှာလည်း အတူတူပဲဗျာ။ တိုက်ပွဲတွေဖြစ်နေတယ်။ စစ်ကောင်စီဘက်က လေကြောင်းကနေပြီး ဗုံးကြဲတာတွေလုပ်နေတယ်” ဟု ထွက်ပြေးနေရသည့် ဒေသခံအမျိုးသားတစ်ဦးက ပြောသည်။

ယင်းတိုက်ပွဲကြောင့် ဖယ်ခုံနှင့် မိုးဗြဲမြို့နယ်အတွင်းရှိ စစ်ဘေးရှောင်းများလည်း နေရာအတည်တကျမရှိပဲ ထပ်မံထွက်ပြေးနေရသည်။

ပြီးခဲ့သည့် ဧပြီလ ၁ ရက်မှစပြီး စစ်ကောင်စီသည် ပင်လောင်းမြို့ရှိ စစ်အခြေခံလေ့ကျင့်ရေး တပ်စခန်းအတွင်းသို့ သော်လည်းကောင်း၊ ညောင်ရွှေမြို့နယ် တောင်ဘက်ခြမ်းကျေးရွာများသို့ လည်းကောင်း စစ်အင်အား၊ လူအင်အားများ ဖြည့်တင်းခဲ့သည်။

ထို့အပြင် ဧပြီလ ၂ ရက်တွင်လည်း စစ်ကောင်စီမှ တိုက်ပွဲဖြစ်ပွားခြင်းမရှိပဲ ဖယ်ခုံမြို့နယ် အနောက်ခြမ်း၊ ရီနွဲ့ကျေးရွာအုပ်စုရှိ ဆိုင်ခွန်ဆောင်ငံကျေးရွာကို လေယာဉ်ဖြင့် လာရောက်ဗုံးကြဲခဲ့သောကြောင့် ၁၀ နှစ်အရွယ် အမျိုးသမီး ၁ ဦးအပါအဝင် အမျိုးသား ၃ ဦး ထိခိုက်ဒဏ်ရာရရှိကာ နေအိမ် (၁၀) လုံးထက်မနည်းပျက်စီး ခဲ့ကြောင်း Kayan New Generation Youth-KNGY က ဧပြီ ၃ ရက်တွင်ထုတ်ပြန်ထားသည်။

Leave a Comments

- Advertisement -spot_img

Latest article