သျှမ်းပြည် မဘိမ်းမြို့နယ်တွင် စစ်ကောင်စီတပ်က လေကြောင်းဖြင့် ဗုံးကြဲတိုက်ခိုက်ခဲ့ခြင်းကြောင့် ကလေးနှစ်ဦးနှင့် ရဟန်းတစ်ပါး အပါအဝင် အရပ်သား ၆ ဦး သေဆုံးပြီး ၇ ဦး ထိခိုက်ဒဏ်ရာ ရရှိခဲ့ကြောင်း စုံစမ်းသိရသည်။
ဧပြီလ ၂ ရက် ည (၇) နာရီခန့်တွင် မဘိမ်းမြို့နယ်အတွင်းရှိ မိုးလုံးကျေးရွာကို တိုက်ပွဲ တစုံတရာ ဖြစ်ပွားခြင်းမရှိဘဲ စစ်ကောင်စီတပ်က လေကြောင်းဖြင့် ဗုံးကြဲတိုက်ခိုက်ခဲ့ခြင်းကြောင့် ကလေးနှစ်ဦးနှင့် ရဟန်းတစ်ပါး အပါအဝင် အရပ်သား ၆ ဦး သေဆုံးပြီး ၇ ဦး ထိခိုက်ဒဏ်ရာရရှိကြောင်း မဘိမ်းဒေသခံများက ပြောသည်။
“မိုးလုံးက မဘိမ်းမြို့နဲ့ တော်တော်လေး ဝေးသေးတယ်၊ စစ်ကိုင်းအဆက်က ရွှေလီမြစ်နားမှာ ရှိတာ။ အဲ့မှာ တိုက်ပွဲလည်း မဖြစ်ဘဲနဲ့ လေယာဉ်ပေါ်ကနေ ဗုံးလာကြဲသွားတယ်။ ဘုန်းကြီးကျောင်းနဲ့ သူ့နားက ဈေးတန်းပေါ် ကျကွဲပြီး ဦးပဉ္ဇင်းတစ်ပါးနဲ့ ယောကျ်ား ၅ ယောက်ကတော့ ဆုံးသွားတယ်”ဟု မဘိမ်းမြို့နယ်မှ ဒေသခံတစ်ဦးက သျှမ်းသံတော်ဆင့်ကို ပြောသည်။
မဘိမ်းမြို့နယ်တွင် စစ်ကောင်စီတပ်က လေကြောင်းဗုံးကြဲ တိုက်ခိုက်ခြင်းကြောင့် သေဆုံးရသူများမှာ မိုးလုံးကျေးရွာမှ ဦးနိုင်ဝင်းချို (၃၆ နှစ်)၊ ဦးချစ်ထွေး (၃၇ နှစ်)၊ မောင်တိမ်ယံမိုး (၂၇ နှစ်)၊ မောင်လင်းခန့်နိုင် (၁၆ နှစ်)နှင့် မောင်ဖူဆယ် (၅ နှစ်)တို့ ဖြစ်ကြောင်း သိရသည်။
ထို့အပြင် မိုးလုံးကျေးရွာအုပ်စုရှိ ပေါက်မွန်ကျောင်းတိုက်မှ အသက် ၄၀ ကျော်အရွယ်ရှိ ရဟန်းတစ်ပါးလည်း ပျံလွန်သွားခဲ့ပြီး ဘုန်းကြီးကျောင်းနှင့် ဈေးဆိုင်တန်းများလည်း မီးလောင်ပျက်စီးသွားခဲ့ကြောင်း မဘိမ်းမြို့နယ် ဒေသခံများက ပြောသည်။
စစ်ကောင်စီတပ်က လေကြောင်းဗုံးကြဲတိုက်ခိုက်ခဲ့သည့် မဘိမ်းမြို့နယ်အတွင်းရှိ မိုးလုံးကျေးရွာသည် သျှမ်း၊ ကချင်နှင့် စစ်ကိုင်းတိုင်း နယ်စပ်တွင် တည်ရှိပြီး မဘိမ်းမြို့နှင့် မိုင် ၂၀ ကျော် ကွာဝေးကြောင်း သိရသည်။
၎င်းလေကြောင်း တိုက်ခိုက်မှု မတိုင်မီ နာရီပိုင်းအလိုက မိုးလုံးကျေးရွာနှင့် အလှမ်းမဝေးသည့် ကျေးရွာတစ်ခုတွင် ကချင်လွတ်လပ်ရေးတပ် KIA နှင့် PDF တပ်ဖွဲ့များက အစည်းအဝေး ပြုလုပ်ခဲ့ပြီး ၎င်းနေရာသို့ ဗုံးလာကြဲခြင်း ဖြစ်နိုင်ကြောင်း မဘိမ်းဒေသခံများထံမှ သိရသည်။
မဘိမ်းမြို့ကို ကချင်လွတ်လပ်ရေးတပ် KIA နှင့် PDF ပူးပေါင်းတပ်ဖွဲ့များက ဇန်နဝါရီလ တတိယပတ်တွင် တိုက်ခိုက်သိမ်းပိုက်နိုင်ခဲ့ပြီး စစ်ကောင်စီတပ်က ဖေဖော်ဝါရီလ ၂၉ ရက်တွင် မိုးမိတ်နှင့် မဘိမ်းမြို့နယ်တို့ကို စစ်အုပ်ချုပ်ရေး မာရှယ်လော ထုတ်ပြန်ကြေညာခဲ့သည်။
