သျှမ်းပြည် နမ့်ခမ်းမြို့နယ်တွင် တအာင်း(ပလောင်) အမျိုးသားလွတ်မြောက်ရေး တပ်မတော် TNLA က စစ်ကောင်စီလက်နက်ကြီးများကို စမ်းသပ်ပစ်ခတ်နေခြင်းကြောင့် ဒေသခံများက လုံခြုံရေးစိုးရိမ်နေကြောင်း စုံစမ်းသိရသည်။

မတ်လ နောက်ဆုံးပတ်မှ စတင်ပြီး နမ့်ခမ်းမြို့နယ်တွင် တအာင်း(ပလောင်)တပ်ဖွဲ့ TNLA က “၁၀၂၇ စစ်ဆင်ရေး”အတွင်း စစ်ကောင်စီတပ်ထံမှ သိမ်းပိုက်ရရှိထားသည့် လက်နက်ကြီးများကို စမ်းသပ်ပစ်ခတ်လာခြင်းကြောင့် ပြည်သူများ လုံခြုံရေး စိုးရိမ်ထိတ်လန့်နေကြောင်း နမ့်ခမ်းဒေသခံများက ပြောသည်။

“သူတို့ စစ်ကောင်စီဆီက သိမ်းထားတဲ့ လက်နက်ကြီးကို စမ်းပစ်နေကြတာ။ ဒီလိုစမ်းနေတာ ၃ ရက်ရှိပြီ၊ တစ်ရက်ကို လေးငါးလုံး စမ်းပစ်နေတာ။ ပြည်သူတွေကတော့ တိုက်ပွဲမရှိဘဲနဲ့ လက်နက်ကြီးသံ ကြားလို့ ကြောက်လန့်ကြတာပေါ့”ဟု နမ့်ခမ်းမြို့မှ အမည်မဖော်လိုသည့် ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

၂၀၂၃ ဒီဇင်ဘာလအတွင်းက နမ့်ခမ်းမြို့ရှိ စစ်ကောင်စီတပ် စခန်းသစ်ကုန်းနှင့် တပ်စခန်းကြီး၊ ငယ် ၁၉ ခုခန့်ကို တအာင်း(ပလောင်)တပ်ဖွဲ့ TNLA က တိုက်ခိုက်သိမ်းပိုက်နိုင်ခဲ့စဉ် စစ်ကောင်စီ၏ လက်နက်ကြီး အပါအဝင် လက်နက်မျိုးစုံ၊ မိုင်း၊ ခဲယမ်းမျိုးစုံနှင့် စစ်အသုံးအဆောင် ပစ္စည်းများ ရှင်းလင်းသိမ်းဆည်းရမိခဲ့ကြောင်း TNLA သတင်းနှင့် ပြန်ကြားရေးဌာနက ဒီဇင်ဘာလ ၁၉ ရက်တွင် ထုတ်ပြန်ထားသည်။

“နမ့်ခမ်းက ဝိန်းဆာတောင်ခြေမှာရှိတဲ့ ပလောင်တပ်ထဲကနေ လက်နက်ကြီး ပစ်နေတာ။ အဲ့နေရာက ကြည့်ရင် နမ့်ခမ်းမြို့ဘက်ကို လှမ်းမြင်ရတယ်လေ။ အဲ့ဒီကနေ ဘယ်ဘက်ကို လှမ်းပစ်သွားပြီး ဘယ်နားသွားကျမလဲ မပြောတတ်ဘူး”ဟု နမ့်ခမ်းမြို့မှ ၎င်းဒေသခံ အမျိုးသားက သျှမ်းသံတော်ဆင့်ကို ဆက်ပြောသည်။

နမ့်ခမ်းမြို့နယ်တွင် TNLA တပ်ဖွဲ့က ယခုကဲ့သို့ လက်နက်ကြီး ပစ်ခတ်နေခြင်းနှင့် ပတ်သက်ပြီး သျှမ်းသံတော်ဆင့်မှ TNLA သတင်းနှင့် ပြန်ကြားရေးရုံးသို့ စာပို့မေးမြန်းထားသော်လည်း ပြန်လည်ဖြေကြားခြင်း မရှိသေးပေ။

ထို့အပြင် တအာင်း(ပလောင်)တပ်ဖွဲ့ TNLA က သိမ်းပိုက်ထိန်းချုပ်ထားသည့် နမ့်ခမ်းမြို့နယ်တွင် ‘ဝ’တပ်ဖွဲ့ UWSA ထိန်းချုပ်ဒေသမှ “WA”ကားနံပါတ်များ ဝင်ထွက် သွားလာနေသည်ကိုလည်း ယခုတလော တွေ့ရှိရကြောင်း နမ့်ခမ်းဒေသခံများက ပြောသည်။

“WA ကားနံပါတ်က နမ့်ခမ်းမှာ ခဏခဏ ရောက်လာတယ်။ ညသန်းခေါင်ဆို ကားသွားလာသံ ဆက်ကြားတယ်။ မနက် ၆ နာရီဆို စျေးသွားရင် WA နံပါတ်ပြားနဲ့ ကားအလွတ် သုံးလေးစီး ယာဉ်မောင်းတွေပဲ ရှိတဲ့ကားကို နမ့်ခမ်းမြို့ မိုင်းဝီး၊ မန့်ဝိန်းကြီးဘက် သွားတဲ့လမ်း ပြန်ထွက်တာ တွေ့တယ်။ VIGO 4×4 စစ်သားသုံးတဲ့ ကားတွေ၊ သေနတ်တင်တဲ့ နေရာလည်း ပါတယ်”ဟု နမ့်ခမ်းမြို့မှ အသက် ၅၀ ကျော်အရွယ် အမျိုးသားတစ်ဦးက သျှမ်းသံတော်ဆင့်ကို ပြောသည်။

သျှမ်းမြောက်တွင် ဟိုင်ဂင် သဘောတူညီချက်အရ ညီနောင်မဟာမိတ်နှင့် စစ်ကောင်စီတို့သည် “၁၀၂၇ စစ်ဆင်ရေး” ယာယီအပစ်ရပ်ထားသော်လည်း နှစ်လကျော်အကြာ မတ်လ ၂၆ ရက်က လားရှိုးစစ်ကောင်စီတပ်နှင့် ကိုးကန့်တပ်ဖွဲ့ MNDAA တို့ ထိတွေ့တိုက်ပွဲ ပြန်လည်ဖြစ်ပွားလာခဲ့ကြောင်း လားရှိုးဒေသခံများထံမှ သိရသည်။

အလားတူ ‘ဝ’တပ်ဖွဲ့ ဦးဆောင်သည့် ပြည်ထောင်စုနိုင်ငံရေး ဆွေးနွေးညှိနှိုင်းရေးကော်မတီ (FPNCC)တွင် ပါဝင်သော အဖွဲ့ဝင် အချင်းချင်းအကြား သျှမ်းမြောက်တွင် စစ်ရေးပဋိပက္ခ ပွတ်တိုက်မှုများ တွေ့မြင်လာရကြောင်း ဒေသတွင်း စစ်ရေးလေ့လာသုံးသပ်သူများက ပြောဆိုသည်။