မြောက်ပိုင်းညီနောင် မဟာမိတ် ၃ ဖွဲ့နှင့် KIA တို့ အနေဖြင့် ‘အင်မတန် မိုက်မဲသည့် လုပ်ရပ်” များ ပြုလုပ်နေသည်ဟု စစ်ခေါင်းဆောင် မင်းအောင်လှိုင် က ယမန်နေ့ (မတ်လ ၂၇ ရက်) တွင် နေပြည်တော်၌ ကျင်းပသည့် စစ်တပ်၏ တပ်မတော်နေ့ မိန့်ခွန်းတွင် ထည့်သွင်း ရည်ညွှန်း ပြောဆိုလိုက်သည်။

တိုင်းရင်းသား လက်နက်ကိုင်အဖွဲ့ အချို့နှင့် ပြည်ပ လက်ဝေခံ အဖွဲ့အစည်းအချို့၏ လုပ်ရပ်များသည် မြန်မာနိုင်ငံနှင့် နိုင်ငံသားများ၏ အကျိုးစီးပွား အတွက် မဟုတ်ဘဲ ၎င်းတို့ အဖွဲ့အစည်း အကျိုးအတွက်သာ ရှေးရှူလုပ်ဆောင်နေကြောင်း ၄င်းကဆိုသည်။

“ဒီမိုကရေစီနဲ့ ဖက်ဒရယ်စနစ်ကို အခြေခံတဲ့ ပြည်ထောင်စုတစ်ရပ် ဖော်ဆောင်ရေးကို ပျက်စီးအောင်လုပ်နေခြင်း ဖြစ်တယ်ဆိုတာ ရှမ်းပြည်နယ်မြောက်ပိုင်း၊ ကချင်ပြည်နယ်၊ ရခိုင်ပြည်နယ်နဲ့ နေရာဒေသအချို့မှာ ဖြစ်ပွားနေတဲ့ ဖြစ်စဉ်ဖြစ်ရပ်တွေက သက်သေခံလျက်ရှိတယ်။ ဒီမိုကရေစီနဲ့အညီ ဆောင်ရွက်နိုင်တာကို အဓမ္မနည်းနဲ့ ပြုလုပ်တာကြောင့် ဒေသခံများရဲ့ အကျိုးစီးပွား ပျက်စီးတာ၊ ကျောင်းနေအရွယ် ကလေးများ ပညာသင်ကြားခွင့် ဆုံးရှုံးတာပဲ ခံစားရတဲ့အတွက် အင်မတန်မိုက်မဲတဲ့ လုပ်ရပ်လို့ ပြောလိုတယ်” ဟု မင်းအောင်လှိုင်က ဆိုသည်။

အဆိုပါ မိန့်ခွန်းတွင် သျှမ်းပြည်မြောက်ပိုင်း၊ ကချင်ပြည် နှင့် ရခိုင် ပြည် အတွင်း ဖြစ်ပွားနေသည့် စစ်ပွဲများနှင့် ဦးဆောင်အဖွဲ့များကို ရည်ညွှန်းသော်လည်း စစ်ပွဲများကို ဦးဆောင် တိုက်ခိုက်နေသည့် မြောက်ပိုင်းညီနောင် ၃ ဖွဲ့နှင့် KIA အဖွဲ့အစည်း အမည်များကို တိုက်ရိုက် ထည့်သွင်း ပြောဆိုခြင်း မပြုသည်ကို တွေ့ရသည်။

သို့သော် အမျိုးသား ညီညွတ်ရေး အစိုးရ NUG ၊ CRPH ၊ PDF နှင့် NLD ပါတီအား အစွန်းရောက် အကြမ်းဖက် အဖွဲ့အစည်းများအဖြစ် ပြင်းပြင်းထန်ထန် စွပ်စွဲထားပြီး ပြည်တွင်း ပြည်ပ အနေဖြင့် ထောက်ခံ ပံ့ပိုးခြင်း မပြုရန် သတိပေးထားသည်။
ငြိမ်းချမ်းရေး လုပ်ငန်းစဥ်နှင့် ပတ်သက်၍ အပစ်ရပ်စာချုပ် အတိုင်း ဆက်လက်လုပ်ဆောင်မည်ဟု စစ်ခေါင်းဆောင်က ထည့်သွင်း ပြောဆိုသော်လည်း စာချုပ် လက်မှတ်ရေးထိုးထားသည့် အဖွဲ့အများစု စစ်ကောင်စီကို ပြန်လည်တိုက်ခိုက်နေသည့် ကိစ္စကိုမူ ထည့်သွင်းပြောဆိုခြင်း မပြုပေ။

ထို့အပြင် နိုင်ငံတဝှမ်း ပရမ်းပတာ ဖြစ်စေသည့် “ပြည်သူ့စစ်မှုထမ်း ဥပဒေ” နှင့် စစ်မှုထမ်းဟောင်းများ စစ်ထဲပြန်ခေါ်သည့် “အရန်တပ်ဖွဲ့ ဥပဒေ’ နှင့် ပတ်သက်၍ “ဒီဥပဒေနှစ်ရပ်ကို အကောင်အထည်ဖော် ဆောင်ရွက်တာကြောင့် ကာကွယ်ရေးအင်အားကို အထိုက်အလျောက် မြင့်တက်လာစေမှာ ဖြစ်ပြီး အဲဒီကမှ တစ်ဆင့် နိုင်ငံတော် တည်ငြိမ်အေးချမ်းရေးနဲ့ တရား ဥပဒေ စိုးမိုးရေးအတွက် လုပ်ဆောင်သင့် လုပ်ဆောင်ထိုက်တာတွေကို တစ်ဆင့်ပြီးတစ်ဆင့် ဆက်လက် ဆောင်ရွက်သွားမှာဖြစ်ကြောင်း ပြောကြားလိုတယ်” ဟု ထည့်သွင်း ပြောဆိုခဲ့သည်။

ညီနောင်မဟာမိတ် ၃ ဖွဲ့ ဖြစ်သည့်MNDAA၊ AA နှင့် TNLA တို့၏ သျှမ်းမြောက် ၁၀၂၇ စစ်ဆင်ရေး အတွင်း ကိုးကန့်ဒေသအပါအဝင် မြို့များ၊ ရာနှင့်ချီသည့် စစ်စခန်းများ သိမ်းပိုက်ခဲ့သည်။

လက်ရှိ ရက္ခိုင့်တပ်တော် AA အနေဖြင့် မြေပုံ၊ မင်းပြား၊ မြောက်ဦး၊ ကျောက်တော်၊ ပေါက်တော၊ ရမ်းဗြဲ၊ ပုဏ္ဏားကျွန်း၊ ရသေ့တောင်နှင့် ပလက်ဝတို့ကို သိမ်းပိုက်ထားပြီး ဘူးသီးတောင်၊ မောင်တောနှင့် အမ်းတို့ကို ဆက်လက် တိုက်ခိုက်နေသည်။

ထို့အတူ ကချင်လွတ်မြောက်ရေးတပ်မတော် KIA သည် ကချင်ပြည်နယ် အတွင်း ပြီးခဲ့သည့် ရက်အနည်းငယ်မှစ၍ ယနေ့အထိ စစ်ကောင်စီတပ်စခန်း ၅၀ ကျော်ကို တိုက်ခိုက်သိမ်းပိုက်ထားကာ ဆက်လက် တိုက်ခိုက်နေဆဲ ဖြစ်သည်။

ယမန်နေ့ ညနေ ၅ နာရီ ၁၅ မိနစ်က စတင်ကျင်းပခဲ့သည့် စစ်ကောင်စီ၏ တပ်မတော်နေ့ အခမ်းအနားတွင် ယခင်နှစ်များစွာကဲ့သို့ မဟာဗျူဟာမြောက် လက်နက်ကြီးများ၊ ယန္တယားများ၊ အထူးတပ်များ ထည့်သွင်း ခင်းကျင်းခြင်း မရှိဘဲ အမျိုးသမီး စစ်သည် အများစုကို လမ်းလျှောက် စစ်ရေးပြစေခဲ့သည် ဖြစ်ရာ စစ်တပ်၏ အင်အားချိနဲ့မှုကို မီးမောင်းထိုးပြနေသည်ဟု လေ့လာသူများက သုံးသပ်ထားသည်။