သျှမ်းပြည် ကျောက်မဲမြို့တွင် လျှပ်စစ်မီး ဝါယာရှောခ့်ကြောင့် နေအိမ်တန်းလျား ၂ လုံး မီးလောင်ဆုံးရှုံးခဲ့ကြောင်း စုံစမ်းသိရသည်။
ယမန်နေ့ (မတ်လ ၁၉ ရက်) နေ့လည် ၂ နာရီကျော်တွင် ကျောက်မဲမြို့၊ ရပ်ကွက်(၂) မန်နား ရှိ စစ်ဘေးရှောင် မိသားစုများ ငှားရမ်းနေထိုင်သည့် နေအိမ်တန်းလျားနှင့် အဝတ်အထည်ဆိုင်၊ ဆိုင်ကယ်ပြင်ဆိုင်များ ဖွင့်လှစ်ထားသည့် နေအိမ်တန်းလျား ၂ လုံးတို့ လျှပ်စစ်မီးဝါယာရှော့ခ်ကြောင့် မီးလောင်ပျက်စီးသွားကြောင်း ကျောက်မဲဒေသခံများက ပြောသည်။
“မီးလောင်တဲ့အိမ်က အငှားချထားတဲ့ အိမ်တန်းလျားကို လောင်တာ။ ခုက စစ်ဘေးရှောင်တွေ မိသားစု ၄/၅ စုလောက် လာငှားနေတာလို့ ပြောတယ်။ ဘေးနားက ဝပ်ရှော့ဆိုင်နဲ့ အထည်ဆိုင်လည်း မီးဟပ်ပြီးတော့ အရောင်းပစ္စည်းတွေ မီးလောင်သွားတယ်။ ရေချောင်းနဲ့လည်း နီးတော့ လူအင်အားနဲ့ ဝိုင်းပြီး ငြိမ်းလိုက်နိုင်တယ်”ဟု မီးငြိမ်းသတ်ပေးခဲ့သည့် ကျောက်မဲမြို့မှ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
ကျောက်မဲမြို့ ရပ်ကွက်(၂) တွင် စစ်ဘေးရှောင်များကို အငှားချထားပြီး မီးလောင်ပျက်စီးခဲ့သည့် အိမ်တန်းလျားမှာ အုတ်ညှပ်ထရံ နှစ်ထပ်အိမ်ဖြစ်ပြီး မီးစွဲလောင်နေစဉ် မီးသတ်တပ်ဖွဲ့၊ ရပ်ကွက်နေပြည်သူများနှင့် လူမှုကူညီရေးအသင်းများက ဝိုင်းဝန်းငြိမ်းသတ်နိုင်ခဲ့ပြီး လူထိခိုက်မှု မရှိကြောင်း ကျောက်မဲဒေသခံများထံမှ သိရသည်။
ထို့အပြင် ၎င်းအိမ်တန်းလျားနှင့် ကပ်လျက်ရှိ အခြားနေအိမ်တစ်လုံးမှာ ပြတင်းပေါက် မီးစွဲလောင်ကျွမ်းပြီး အထည်ဆိုင်၊ ဆံသဆိုင်နှင့် ဆိုင်ကယ်ပြင်ဆိုင် ဖွင့်လှစ်ထားသော အိမ်တန်းလျားကိုလည်း မီးကူးစက် လောင်ကျွမ်းခဲ့ခြင်းကြောင့် အရောင်းပစ္စည်းများ မီးလောင်ပျက်စီးကာ ဆုံးရှုံးမှုတန်ဖိုးကို မသိရှိရသေးကြောင်း ဒေသခံများက ပြောဆိုသည်။
“ထမင်းဟင်းချက်ရင်း ဝါယာရှောခ့်ဖြစ်ပြီး မီးလောင်တာလို့ ပြောကြတယ်။ တချို့ပြောတာလည်း နေ့ခင်း ဖယောင်းတိုင်မီး ထွန်းလို့ လောင်တာလည်း ပြောကြတယ်။ အခုကတော့ နွေရောက်ပြီဆိုတော့ ရေခမ်းလာတာရှိတယ်။ ကလေးတွေလည်း မီးနဲ့ နီးတဲ့နေရာ ပေးမဆော့နဲ့လို့ ပြောချင်တယ်”ဟု ကျောက်မဲမြို့မှ ၎င်းဒေသခံ အမျိုးသားက သျှမ်းသံတော်ဆင့်ကို ပြောသည်။
ကျောက်မဲမြို့ရှိ မီးလောင်သွားသည့် အိမ်တန်းလျားတွင် ငှားရမ်းနေထိုင်သည့် စစ်ဘေးရှောင်များလည်း လက်ရှိတွင် ဆွေမျိုးများထံ ပြန်လည်ပြောင်းရွှေ့နေရပြီး နေရာထိုင်ခင်း အခက်အခဲ ကြုံတွေ့နေရကြောင်း သိရသည်။
အလားတူ မတ်လ မှ စတင်ပြီး သျှမ်းပြည်အတွင်းရှိ မြို့နယ်အသီးသီးတွင် ဆိုလာအားသွင်းပစ္စည်းများ အပူချိန်လွန်ကဲ၍ ပေါက်ကွဲခြင်းများကြောင့် လဲချားမြို့နယ်တွင် ဘုန်းကြီးကျောင်း မီးလောင်ပျက်စီးပြီး ကွတ်ခိုင်မြို့နယ်တွင် ပြည်သူနေအိမ် ၆ လုံး မီးလောင်ဆုံးရှုံးခဲ့ရသည်။
သျှမ်းတပ် ၂ တပ်ဖြစ်သည့် SSPP/SSA နှင့် RCSS/SSA တို့ကလည်း မီးဘေးအန္တရာယ် ကြိုတင်ကာကွယ်နိုင်ရန် ၎င်းတို့ထိန်းချုပ်နယ်မြေအတွင်း တောမီးရှို့မှုများ ပိတ်ပင်တားမြစ်သည့် အမိန့်စာကို ဖေဖော်ဝါရီ လလယ်မှ စတင်၍ အသီးသီး ထုတ်ပြန်လာခဲ့သည်။
Leave a Comments