သျှမ်းပြည် ကျောက်မဲမြို့နယ် စစ်ကောင်စီတပ်က ပြည်သူပိုင်ကားများကို ချောဆွဲပြီး တပ်အင်အား ဖြန့်ကျက်နေကြောင်း စုံစမ်းသိရသည်။
ယမန်နေ့ (မတ်လ ၁၈ ရက်) နေ့လည်ပိုင်းမှ စတင်ပြီး ကျောက်မဲမြို့အခြေစိုက် စစ်ကောင်စီတပ်ရင်းများမှ ပြည်သူပိုင်ကားများကို ချောဆွဲ၍ ကားသမားများကို မောင်းနှင်ခိုင်းကာ အနီးပတ်ဝန်းကျင် ကျေးရွာများသို့ တပ်အင်အား ဖြန့်ကျက်နေကြောင်း ကျောက်မဲဒေသခံများက ပြောသည်။
“မနေ့က ပြည်သူပိုင် ဖောကားတွေကို ကျွဲကုန်းလမ်းခွဲနား ညနေစောင်းလောက် တားပြီး ချောပို့ခိုင်းတယ်။ နောင်ချိုဘက်က ဘိလပ်မြေတင်တဲ့ ၁၆ ပေကား တစ်စီး၊ ခိုမုန်းက ၂ စီး၊ မြို့ထဲက ၂ စီး၊ စုစုပေါင်း ၇ စီးလောက်ရှိမယ်။ ပန်ဟက်ရွာနဲ့ ကျောက်မဲကြီးဘက် ဖောကားတွေကို နတ်တောင်ဘက် ၅၀၁/ ၅၀၂ တပ်က ဒီမနက် ထပ်လာခေါ်တယ်လို့ ပြောတယ်”ဟု ကျောက်မဲမြို့မှ လုံခြုံရေးအရ အမည်မဖော်လိုသည့် အမျိုးသားတစ်ဦးက သျှမ်းသံတော်ဆင့်ကို ပြောသည်။
လက်ရှိတွင် ကျောက်မဲမြို့ အခြေစိုက် စကခ-၁၊ ခလရ-၅၀၁/ ၅၀၂ ၊ အမြောက်တပ်-၃၅၂ နှင့် ဆေးတပ်များမှ စစ်အင်အားများကို ပြည်သူပိုင်ကားများ အသုံးပြုပြီး အနီးတဝိုက် ကျေးရွာများသို့ တပ်ဖြန့်လျက်ရှိကြောင်း ကျောက်မဲဒေသခံများထံမှ သိရသည်။
“လူတင်ပြီး ဘယ်ကိုသွားလဲမသိဘူး။ ကျောက်မဲကနေ မြို့နားတစ်ဝိုက် နောင်ပိန်၊
နားခေါ် ဒီဘက်တွေ ပို့ခိုင်းတာပေါ့။ ၅၀၂ ထဲက ၂ စီး၊ အမြောက်တပ်ထဲက ၂ စီး လူတင်ပို့ခိုင်းတာ။ ဖောကားအိမ်က မြင့်တော့ ထိုင်ပြီးသွားတာ ကားအောက်ကနေ မမြင်ရဘူး။ တကယ်တမ်း သူတို့ကားရှိတာ အများကြီး မထုတ်သုံးဘူး”ဟု ကျောက်မဲမြို့မှ ၎င်းဒေသခံ အမျိုးသားက သျှမ်းသံတော်ဆင့်ကို ပြောသည်။
ကျောက်မဲ စစ်ကောင်စီတပ်မှ ယခုကဲ့သို့ ပြည်သူပိုင်ကားများကို ချောဆွဲပြီး အတင်းအဓမ္မ လိုက်ပို့ခိုင်းခြင်းကြောင့် ကားသမားများမှာ အသက်အန္တရာယ် စိုးရိမ်နေကြပြီး အချို့မှာ လုပ်ငန်းမထွက်ရဲကြောင်း ကျောက်မဲဒေသခံများထံမှ သိရသည်။
“တပ်ကားက ညီနောင်သုံးဖွဲ့ သိတယ်လေ၊ ပြည်သူကားဆိုရင် သူတို့ မသိဘူးလေ။ လူခိုးဖြည့်နေတော့ ထိပ်တိုက်ဆို ကားသမားသေပြီပဲ။ အခု အုတ်ရိုက်ပို့၊ သဲတင်ပို့တဲ့ ဖောကားတွေ ကြောက်နေရတယ်၊ မလုပ်ရဲ မထွက်ရဲတော့ဘူး”ဟု ကျောက်မဲမြို့မှ ၎င်းဒေသခံအမျိုးသားက ဆက်ပြောသည်။
အလားတူ မတ်လ ပထမပတ်ကလည်း ကျောက်မဲမြို့အခြေစိုက် စစ်ကောင်စီတပ်များမှ စစ်အင်အား အများအပြားသည် အနီးပတ်ဝန်းကျင်ရှိ ကျေးရွာများသို့ လမ်းလျှောက်ပြီး စစ်အင်အားဖြန့်ကျက်နေကြောင်း ကျောက်မဲဒေသခံများက ပြောသည်။
“၁၀၂၇ စစ်ဆင်ရေး”အတွင်း လက်နက်ချအညံ့ခံခဲ့သည့် လောက်ကိုင် ဒကစ ကို စစ်ခေါင်းဆောင် မင်းအောင်လှိုင် အမိန့်ဖြင့် ဖျက်သိမ်းပြီးနောက် ၎င်းလက်အောက်ခံ တပ်ရင်းများထဲမှ ကုန်းကြမ်း ခလရ (၁၂ ၂) နှင့် လောက်ကိုင် ခမရ (၃၂၂) တပ် တို့ကို ကျောက်မဲတွင် ပြန်လည်၍ တပ်တည်ဆောက်ရန် ပြင်ဆင်နေကြောင်း စစ်ရေးသတင်းရင်းမြစ်ထံမှ သိရသည်။
