သျှမ်းပြည် တာချီလိတ်မြို့ ရွှေတိဂုံစေတီတော်မှ ပျောက်ဆုံးနေသည့် စိန်ဖူးတော်ကို ဗျူဟာမှူး လာရောက်စစ်ဆေးပြီးနောက် ပြန်လည်တွေ့ရှိခဲ့ကြောင်း စုံစမ်းသိရသည်။
ဖေဖော်ဝါရီလ နောက်ဆုံးပတ်မှ စတင်ပြီး တာချီလိတ်မြို့ရှိ ရွှေတိဂုံစေတီတော်ကို လုံးတော်ပြည့် ရွှေသင်္ကန်း ကပ်လှူနိုင်ရန် ငြမ်းဆင်ခြင်းကို ဆောင်ရွက်ခဲ့ပြီးနောက် မတ်လ ၁၄ ရက်တွင် စိန်ဖူးတော်အား ဖြုတ်ယူပြီး တာချီလိတ်မြို့ ဆန်ဆိုင်း(က)ရပ်ကွက်ရှိ နဂါးနှစ်ကောင် ကျောင်းတိုက်သို့ ပင့်ဆောင်ခဲ့ချိန်တွင်မှ စိန်နှင့် ကျောက်မျက်ရတနာများ ပျောက်ဆုံးနေကြောင်း တာချီလိတ်မြို့ ဒေသခံများက ပြောသည်။
“စိန်ဖူးတော် ဖြုတ်လာတော့ စိန်က အပေါ်မှာ မရှိတော့ဘူး၊ ပျောက်တယ်လို့ ပြောရမှာပေါ့။ မနေ့က နေ့လယ် ၁၂ နာရီမှာ ထီးတော်ချမယ်ဆိုတော့ ဂေါပကအဖွဲ့တွေက ဘုရားရင်ပြင်ပေါ် တက်သွားတာ။ အလှူခံဌာနထဲမှာ ဖြုတ်လာတဲ့ စိန်ဖူးတော်ကို ဖွင့်ပြတော့ ထိပ်က စိန်တုံး မရှိတော့ဘူး။ မနေ့ည ၁၀ နာရီအထိ မတွေ့သေးဘူး”ဟု တာချီလိတ်မြို့ ရွှေတိဂုံစေတီတော်မှ ဂေါပကအဖွဲ့ဝင်တစ်ဦးက သျှမ်းသံတော်ဆင့်ကို ပြောသည်။
တာချီလိတ်မြို့ ရွှေတိဂုံစေတီ၏ စိန်ဖူးတော်ရှိ ပျောက်ဆုံးသွားသည့် စိန်တုံးမှာ အလေးချိန် (၈)ကာရက် ထက်မနည်းရှိပြီး ထီးတော် ငှက်ပျောဖူးနှင့် ငှက်မျက်နှားတော်ရှိ ကျောက်မျက်ရတနာအချို့လည်း ပျောက်ဆုံးနေကြောင်း သိရသည်။
“ဒီမနက် ၉ နာရီကျတော့ ဗျူဟာမှူးလာကြည့်ပြီး အပေါ်တက်ခိုင်းတာ။ အပေါ်က ရွှေမှိုက်တွေကို ကျုံးလာပြီးတော့ နေ့လယ် ၁၂ နာရီခွဲမှာ ပန်းတိမ်ဆရာတွေ လာကြည့်သေးတယ်။ အဲ့ရွှေမှိုက်ထဲ ရှာကြည့်တော့ ပြန်တွေ့တယ် ပြောတယ်။ တစ်ညလုံး ပျောက်သွားတာဆိုတော့ အစစ် ဟုတ်မဟုတ် ပြန်စစ်ဆေးကြည့်ရဦးမှာ”ဟု တာချီလိတ်မြို့ ရွှေတိဂုံစေတီမှ ၎င်းဂေါပကအဖွဲ့ဝင်က သျှမ်းသံတော်ဆင့်ကို ဆက်ပြောသည်။
လက်ရှိတွင် စိန်ဖူးတော်ကို ဖြုတ်ယူပေးခဲ့သည့် တာချီလိတ် ရွှေတိဂုံစေတီတော်၏ ဝေယျာဝစ္စအဖွဲ့မှ ဦးဝင်းနိုင်နှင့် ရွှေသင်္ကန်း ကပ်လှူရေး လုပ်ကိုင်ခွင့်ရရှိထားသည့် စွယ်တော်ဦးကုမ္ပဏီမှ ငြမ်းဆင်အလုပ်သမား (၆)ဦးထက်မနည်းကို တာချီလိတ် မြို့မရဲစခန်းတွင် ခေါ်ယူစစ်ဆေးထားကြောင်း တာချီလိတ်မြို့ ဒေသခံများထံမှ သိရသည်။
တာချီလိတ်မြို့တွင် တည်ထားသည့် ရွှေတိဂုံပုံတူစေတီသည် ဉာဏ်တော်အမြင့် ၁၀၈ ပေခန့် ရှိပြီး စတုတ္ထအကြိမ် လုံးတော်ပြည့် ရွှေသင်္ကန်း ကပ်လှူရန် သျှမ်းပြည်နယ်ဝန်ကြီး၏ လမ်းညွှန်ချက်ဖြင့် တင်ဒါခေါ်ယူခဲ့ကာ စွယ်တော်ဦးကုမ္ပဏီမှ ကျပ်သိန်းပေါင်း ၆၀၄၅ သိန်းဖြင့် လုပ်ငန်းအောင်မြင်ခဲ့သည်။
၎င်းနောက်တွင် စွယ်တော်ဦး ကုမ္ပဏီမှ ရွှေသင်္ကန်း ကပ်လှူနိုင်ရန် ဖေဖော်ဝါရီလ နောက်ဆုံးပတ်တွင် ငြမ်းဆင်ခြင်းလုပ်ငန်းကို စတင်ဆောင်ရွက်ခဲ့ကြောင်း တာချီလိတ် ရွှေတိဂုံစေတီတော် ဂေါပကအဖွဲ့ထံမှ သိရသည်။
